A ya kodolongo eshi avaka ouleke

0
190

Windhoek – Omunamido 31 ha longo ongaomwameni womaliko, okwa ya kodolongo eshi a vaka ouleke, eetyokolate, oyoogata, oumbisikiti, ominghaka dikukutu, ombelela ya kukutikwa nominghaka dokeemboloto mofitola omo ye kwali ha tonatele.

 

Omwaameni womaliko ou, Junias Uukelo, okwa pewa ehandukilo leehani omulongo nanhano (15) modolongo.  Uukelo okwa li ha longo onga omutonateli pomahooli oPuma mOvenduka, okwa dimina kutya okudja nghee a tameka okulonga ponhele opo mohani Auguste odula ei, okwa kala ha vake oinima ya tumbulwa keshe efiku eli moilonga.

Okwa lombwela Mangestrata Justine Asino kutya  oumbudi owa etifwa kokukala a fya ondjala, netomhelo olo Mangestrata Asino ine li tambulako nande.  Okwa lombwela Uukelo kutya, ngeno okwali afya ondjala ngeno okwa vaka omboloto ndele haikulya oyo yokoindele.  “Omboloto otai dulu oku ku kutifa, oinima ei wa vaka oyo ku liudifa ashike nawa,” Mangestrata ta wedapo vali tati oinima ei ya vakwa ku Uukelo itai talwa ko onga oinima oyo ya pumbiwa kokukala momwenyo, ashike oya talwa ko onga oinima yokuliudifa nawa oyo a vaka molwa efupa.

Uukelo okwa pula omhangu opo a futifwe molwaasho oshikando shotete ta kaula onyanga.  Kakele, omhangu oya popya kutya ovanhu vahapu ovo veli oonaku kaula onyanga lwotete ve wete sha yuka okukufa oinima shiheli paveta.  Onghee nee, omhangu o ina oku kufa onghatu opo yi ulikile ovakauli vonyanga kutya omikalo doludi olo ita di keli didimikilwa nande.  Mangestrata Asino okwa lombwela Uukelo kutya oumbudi wokuvaka meefitola owa hapupala unene moshitopolwa shaVenduka nonghee nee omhangu oye shi ninga oshinakuwanifwa shayo okuamena ovakalimo unene oovene veefitola.

Uukelo okwa kwatwa po momafiku 9 Sepetemba, konima eshi omafano adja mokavidio komofitola a ulika nghee ta fininike oinima meendjato daye.  Oinima aishe ei a vaka  oina ongushu yeedola daNamibia 1 823.55.


Ku Roland Routh

 

LEAVE A REPLY

Please enter your comment!
Please enter your name here