Oilonga yokutunga pokakilinika kOmuhongo ili pokupwa

0
206

Eenhana  – OMinista yOuhaku noilonga  yOnghalonawa , Dr Richard Kamwi, oshivike sha dja ko okwa li a ka ninga omakonaakono e na sha nomatungo eli metifa okakilinika kOmuhongo moshitukulwahoololo Epembe moshitukulwa shaHangwena.Okakilinika kOmuhongo otaka ka  yandja  eenhele domayakulo ouhaku wopetameko koshitukulwahoololo eshi , osho shi li oule woshinano sheekilometa 160 okudja kEenhana, odo di li odoolopa yopokaiu mOshitukulwa shaHangwena. Kamwi,  oo a li a findikilwa kuNgoloneya wOshitukulwa shaHangwena, Usko Nghaamwa, okwa holola eudonawa laye molwaashi oilonga yokutunga ya yuka pehulilo.

“Oshikando sha huuninwa nda talela po onhele eyi yokomaushayi eedula nhano da pita,  koshivilo shokutamekifa oilonga , mongaha onda hafa okumu shiivifila kutya oshitukulwahoololo eshi otashi tyapula oiimati yemanguluko laNamibia. Otwa kala twe mu udanekela okumu pa omakwafo e na sha nefiloshisho louhaku wopetameko  nopaife okwa fika nee,  eli ashike poshivelo, “ Kamwi tati.

OMinista oya londwela  ovanashilonga vouhaku moshitukulwa va talelepo okilinika yOmuhongo lumwe keshe moshivike opo va tale nghee oilonga tayi humu komesho vo va kwashilipaleke kutya,  ovo va pewa oilonga eyi otave luufa tuu komilandu nomafaneko oo a udafanwa meepulana davo dopetameko.

Ongovakwashiwana , omwa kala hamu ende oshinano shi dulife peekilometa efele nomilongohamano okuya kEenhana nokOkongo oku ka konga omakwafo opauhaku ashike ngeenge okilinika eyi oya pu odula eyi , Omupelesitende wetu Omufimanekwa Hifikepunye Pohamba ote ke uya eyi yandje momake eni pambelewa. Otwa hala okumona oomeme vetu tava monene ounona ponhele yetu eyi , kakele komakwafo amwe vali opauhaku oo taa ka yandjwa koshiwana eshi sheni , “ Kamwi ta twikile.

Minista okwa  lombwela vali ovakwashiwana kutya epangelo oli li momukokomoko wokutota omandiki  ouhaku okudeulila mOtjiwarongo nomoKaiti omo tamu ka deulilwa ovapangi ovo tave ke li honga odipoloma yeedula nhatu okudja modula tayu uya. “Otuna omhumbwe ya kula yovapangi moNamibia , “ osho a tonga.Endiki eli lokudeulila otali ka kala tali deula ovapangi omafele avali nomilongo heyali,  keshe kodula. Namibia okuna lela omhumbwe ya kula yovapangi nomongaha ota longifa ovapangi vadja moilongo yaAfrica oyo twa panga oukaume nayo.

“Ohatu ka twikila nokukuta ovapangi okudja koilongo oyo twa panga oukaume nayo fimbo hatu deula ovapangi vetu vene. Fiyo opapa otwe shi pondola okudeula nokupitifa omundohotola womutima adja moshitukulwa eshi. Oshikondo shetu  shina sha nepango lomutima mOvenduka oshakwatelwa  ashike komesho  kovanailonga vadja kondje yoilongo nefimbo ola fika nee opo tu kale novana vetu vovamati noukadona tava longo oilonga eyi, “  Kamwi tati.

Ouministeli wOuhaku owa tuma ovanafikola 270 ve ke lihonge oundohotola wounamiti koCuba nokoRussia. “ Otuli tweli pyakidila nokutuma ovalihongi ve fike po 95 koUkraine navakwawo o 60 koBUIRUSSIA, “ osho a tonga.

Kamwi okwa holola ekemo  laye kombinga yonghalo yondjila  oyo ya fida kokalinika kOmuhongo. Ondjila oyina efululu,   ohayi dulu ashike okweendwa koiyendifo oyo ina ofoowila. “Ondjila oyili shili monghalo ii. Ohandi  kwashilipaleke kutya oupyakadi owu ohandi kewu lopota kOuministeli wOilonga nOyeendifo molwaashi otuna edilaadilo lo ku mu pa oambulasa yokakilinika keni, “ ta kwashilipaleke.


KuClemence Tashaya

LEAVE A REPLY

Please enter your comment!
Please enter your name here