Okatongotongo muudhano wokiliketa maandjetu wa kolekwa

0
224

………..Ya France a zi mokalungu

 

Omudhani gwokiliketa omuNamibia Pikky Ya France okwa halukitha aaholi yuudhano mbuka oyendji sho i ikutha mo inaashi tegelelwa mosheendo shaadhani yopashigwana yokiliketa mboka yayi ko United Arab Emirates (UAE) opo ya ka kuthe ombinga muudhano wopaigwana woInternational Cricket Board -Inter Continental Cup (ICC) moSharja, Dubai, oshiwike sha ziko.

 

Ya France, ngoka e li oye awike omudhani gwolwaala lwi ili mokati kaadhani yaandjetu, okwa tindi ehiyo lyoku ka kalela po Namibia, ta ti kutya a vulwa okuningwa nayi kaawiliki. Ya France otati okwa vulwa oku talwa ko aluhe a fa omuntu gwowala moshilongo she mwene. Shika okwe shi popi konima sho ali ina pewa oompito dha gwana a dhane pethimbo lyuudhano pokati kaNamibia na Cape Cobras omasiku ngaka mOvenduka shoka sha ningilwe pwaana omantompelo gofaafaa.

 

“Onda lombwele Kootja Doug Watson mOsoondaha konima yomaudhano naCobra kutya, kandi na we ehalo lyokuya koDubai nonda gandja wo omatompelo. Okwa li ta kambadhala a uvithe ndje ko kutya okuzamo kwandje ka kuna sha nomutungilo, ashike oshali ashike omukalo gwomalolelo gokutala nkene aadhani yalwe taa dhanene pamwe, ashike shoka hasho lela, YaFrance osho a ti mokuuva nayi. Omuntu gulwe ishewe gwomeni okwa yambidhidha shoka tashi popiwa ku Ya France  tati , etompelo ndyoka olya nathangwa molwashoka Pikky okwe shi pondola opo a tule mo uutanga owindji petameko na okwa li lela a gwana a pewe ompito komeho yaadhani yalwe ngaashi Raymbond van Schoor ngoka a mona onola muudhano wopetameko nonando a kala ngaa pehala lye petameko.

Muudhano wotango 20-20, Ya France oye wo a tulile mo Namibia uutanga owindji, ashike okwa li a pewa oshinakugwanithwa showala shomuhumbati gwomeya nonando a dhanene nawa pethimbo lyomaudhano gahugunina gaali moka aahogololi yaadhani yaka kutha mo ashike aadhani aatiligane- na shika oshili ompinge naanaa netsokumwe-uvathano lya ningwa pokati koNamibia Cricket Board (NCB) nomuyambidhidhi omunene MTC. Oonzo dhishi oku ineekelwa otadhi ti kutya, ya France okwa uvithwa nayi komutima, ta nyenyeta kombinga yaashoka ta ningwa nayi, ta gwedha ko tati kapena nando mpoka a pelwe ompito yokuthigathana po ye a holole uunongo we mokiliketa, omanga iillumbu oyo a shike tayi mono omauwanawa noompito odhindji dhoku dhana. Naamboka ya tseya nawa iineya mbyoka hayi ningwa mokililketa yaNamibia otaya ti, aakomeho ohaya gandja lela ompito kaadhani yamwe, nashika oshiwetike kutya oshiningilawina tashi ningwa opo aaluudhe ya sithwe uunye yo ya ze mo muudhano mbuka.

 

“Osha yela lela nawa kutya kandina mo onkalamwenyo yokomongula mokiliketa ya Namibia, shaashi shoka ndi wete osha fa kutya ohandi pewa ashike uumpito uushona opo ndi ndope, omanga yalwe taya pewa oompito odhindji e taya welima nawa.” “Shika otashi etitha u hulithe to ti kutya aadhani yokiliketa aaluudhe oye li po ashike aahumbati yuuyemele womeya mokapale, omanga iilumbu yimwe tayi ningi ashike sho ya hala mokapale, gumwe gwomaadhani ngoka ina hala edhina lye li tseyike molwashoka okwa tila  a ka mbandamekwe, osho a ti. Okwa popya lela nomuthindo tati, ngele aadhani ohaya dhana nawa, naya pewe ashike ompito yokudhanena oshilongo shawo pwaana okutala kolwaala, keitaalo, komuhoko, koohedhi dhokukala nokatongo kuukwashike ko okantu.

Petameko lyomvula ndjika pethimbo lyuudhano woosipana ne moka Namibia, Kenya, Netherlands naSouth Africa ya dhanene, mpoka Namibia a li a sindana sho a dhana naKenya, Ya France okwa li omudhani dhingi shoka ali lela eshi ilongela.

Omapulo omanene otagi ipulwa kombinga yaadhani haya hogololwa ashike, oyo owala mboka ya pamba aasimani naanenentu mokiliketa yaNamibia. “Kootja yopashigwana Doug Watson ota lundilwa kutya okuna omukalondjigilile wokudheula ponto iilumbu mbyoka aadhani yokiliketa, omanga taku tiwa shi valelwe ngaa a dheule aaluudhe aadhani yokiliketa. Otashi uvitha nayi okumona kutya kootja nomahewa ge otaga longo ngaashi taya vulu opo ya sithe uunye aadhani aaluudhe. Ishewe, oshi li  omupya omunene kutya aadhani yokiliketa ayehe mboka ya shaina etsokumwe-uvathano naamboka haya pewa iimaliwa oyindji moNamibia, okangundu ashike okashona kiilumbu, omanga aaluudhe taya thigwa po ya toole po uundjagumuke, omuholi gumwe gwuudhano wokiliketa osho a ti e uvite nayi.

 

Petameko lyomvula ndjika, MTC na Cricket Namibia ayehe oya tsu kumwe kutya elundululo neningululo lyefano lyokiliketa moNamibia otali ende shokahima kaandoli, nashika osha etitha opo pu tulwe iilalakanenwa mushika. Okwa li kwa tsuwa kumwe kutya aadhani yokiliketa aaluudhe ya 3 sigo ya 4, naya kale mosheendo shokiliketa, haku kala mo ashike ndele naya dhane wo. Mosipana yokiliketa yopashigwana omwa tegelelwa mu kale aadhani aaluudhe ya 4 moka yaali ya tegelelwa ya pewe ompito yokudhana lela omanga yakwawo yaali taya kala ngaa omutumba taya tala yo taya ilongo manga ya tegelela yi ithanwe.

Namibia sho a dhana naCape Cobras, Ya France oye awike a li mosipana omudhani gwomuluudhe. Namibia okwa dhanene omaudhano gaali gomugatatu kena nando omuluudhe, shoka inashi tsa kumwe neuvathano ndyoka lyokulundulula li li pokati kaMTC, Okiliketa yaNamibia naakuthimbinga yalwe. “Shika osha li lela oshisithahoni molwashoka mokapale, osipana yaCape Cobras oya li naaluudhe ya adha poopelesenda 80 nenge dhi vulithe po”. Oonkambadhala dhoku mona omauyelele okuza kOmukuluntuwiliki gwoCricket Namibia, Graham McMillan odha hulile muunyengwi molwashoka ongodhi ye itayi yamukulwa.

 

KuCarlos Kambaekwa

 

LEAVE A REPLY

Please enter your comment!
Please enter your name here