Omafele va tandwa omesho

0
292

OSHAKATI – Oshivike sha djako onghalo meesaala domoshopangelo shaShakati ka yali ngaashi hai kala shito ya nyika oudu nouyehame, ndele okwali i yadi ehafo neenghuwilili unene kovakulupe ovo kwali ihava monoko.

Ovanhu veli 303, vahapu vomuvo ovakulupe ovo va tandwa omesho oshivike sha djako moshipangelo shaShakati, ovamwe vomovanhu vedulife 1300 va mona etando lomesho oshali okudja mu July.

Kakele ko mOshakati, etando lomesho olo hali puununa ko eenhumba odu hadi mene no hadi eta oupofi, okwali la kwatelwa komesho kundohotola womesho Helana Ndume oo a kwali ta yambididwa keendohotola domoshilongo nosho yoo dimwe dadja koilongo yokombada youmafuta ngaashi koUnited Kingdom no koAmerica ngaashi Dr Reed Kindermann and Dr Thomas Schwarz.

Omundohotola Ndume oo a tumbalekwa kohanaudo vaye okwa ti oshikonga eshi osha li sha kwatela mo oipangelo yepangelo ngaashi Oshipangelo shaShikuku mOmusati, Oshipangelo shaKatima Mulilo moZambezi Region, shaRundu moKavango kOkoushilo nomEngela mOhangwena Region.

“Ame onda ninga eedula 16 iha ndi mono ko, paife ngaha nombiibeli oha ndi lesha. Naashi ha ndi i keumbo ngaha oikombo ondi iwete lela nomaluvala ayo ondi a wete lela. Omundohotola wange oo Helena Ndume onde mu panda neenghono. Na kale nomwenyo,” umwe womwaavo va mona etando tati.

Oupyakadi weenhumbwa hadi tutuma momesho noha di tuvikile omuni, odo hadi ufanwa cataract, okwa konekwa kutya ohadi etifwa komutenya wa pitilila ile ngee omunhu a monene oshiponga keisho. Monakudiwa, ovo va kala nokuhepekwa keenhumba edi ova kala tava lumbu noulema womesho, hano va twika nonande ongalo ya tya ngaha oha i dulu oku keelelwa, nokuhakulwa.

Etomhelo limwe ololo kutya ovaNamibia vahapu, unene tuu ovo veli moitukulwa yokoushayi ova hepa no kave na oshimaliwa shoku li hafulifa, omanga vamwe kavena eudeko kutya oupofi wouludi olo oha u dulu oku hakulwa.

Omudohotola Kamwi okwa ti , oshikonga shokutanda omesho moNamibia osho sha tameke mo 1996 osha kwafela ovanhu vedulife 15 000 noshatula Namibia pondodo yotete mokukondjifa ouleme womesho moshitukulwa sha SADCC.

“Nena onda hafa mokupopya kutya oshikonga eshi osha kula okudja mo 1996 shi kwali hashi tande ovanhu 150 kodula, fiyo onena eshi sha dula oku kwafela ovanhu 1 309 modula imwe aike. Omatano omesho eli 3 506 oo a ningwa odula yadja ko, oa tula Namibia komesho yoilongo ikwao ngaashi South Africa, Angola and Zambia,” Kamwi tati

Umwe womeendohotola Dr. Jeremy Joseph okwati, kakele koikongo yetando lomesho oyo hai ningwa moNamibia, ye opamwe neendohotola dikwao odo da dja ko America, Gemany no United Kingdom ovehole oikonga oyo hai naingilwa moNamibia, shaashi ohai kala ya longekidwa nawa.

“Onda enda moilongo ikwao ngaashi oyo opo ta i putuka ngaashi  Kenya, Liberia, Zambia naZimbabwe, ashike yomoNamibia ohai kala ya longekidwa nawa. Ovaunganeki voshikonga ohava kala nale va longekida ovanhu omayovi ovo hava kala va talwa nale nova pulwaapulwa, fwe oha tu uya ashike twa yuka koshitandelo, ina shifa moilongo ikwao,” Joseph tati.


Ku Helvy Shaanika

LEAVE A REPLY

Please enter your comment!
Please enter your name here