Omalaka gOshiAfrica naga yambulwepo

0
179

KuSimon Shiwanda

Omalaka gOshiafrica oga pumbwa okuyambulwapo, opo  wo oshilongo shetu shi hume komeho moohedhi nomomithigululwakalo. Ngele otaku popiwa omalaka gOshiafrica okwa dhiladhilwa omalaka gaavalelwamo menenevi lyAfrica, ano kwa dhiladhilwa omalaka gOshimbantu. MoNamibia otu na mo omalaka gaavalelwa mo ogendji, ihe nonando ongawo oga dhinika, Onkee Aanamibia otwa pumbwa okuyambulapo omalaka getu tse yene.

Konyola oosikola odhindji muNamibia odha simaneka elaka lyopambelwa (Oshingilisa). Sho yene inashi puka ngele aanona taa  tsuwa omukumo ya longithe elaka lyopambelewa, ashike elaka lyopambelewa ina li longithwa wee okulyatela pevi omalaka gomavalelwamo. Omunona ngele ke shi elaka lyayina nena ita tseya oohedhi nomithigululwakalo dhoshilongo shawo nenge dhandjawo. Opo nee omalaka gomavalelwamo ga hume komeho, epangelo, omahangano gayama kepangelo, omahangano gopawumwene, oosikola, aalongi osho wo aantu koohadimwe oya pumbwa okulonga nuudhigini opo ya humithe komeho omalalaka gaavalelwamo moshilongo shetu.

Omwedhi gwa za ko okwa li pwa ningwa ethigathano lyoompata dhoshingilisa lyaningilwa kOshomeya moshitopolwa shaShikoto. Ethigathano ndika olya li lyoosikola adhihe Moshilongo. Omathigathano goludhi nduka oga pumbiwa, oshoka otaga kwathele aalongwa opo ya tseye elaka nokuninga omapekapeko miinima yi ili noyi ili ya pamba onkalamwenyo.

Eindilo lyandje onde li ukitha koNIED koshikondo shomalaka, opo shi yambule po omalaka gaavalelwamo moshilongo nokuninga omathigathano goompata ngoka taga kwathele aalongwa opo ya kale ya pyokoka mokupopya nawa Omalaka gooyina, yo ya wape wo okupita ekonakono lyawo lyopakana lyondondo 12.

Inashi kala ashike oshinakugwanithwa shoNIED, ashike omahangano gohandimwe, aantu kohadimwe osho wo iinyanyangidho yomambo gomalaka gaavalelwamo nayi kuthe wo ombinga okuyambulapo omalaka goonekulu. Ngele otu na omwaalu gwaantu oyendji ye shi nawa okupopya nokunyola omalaka gooyina oko woo kuuwindji waantu taa kutha ombinga mokushanga nokundulukapo iinyolwa momalaka gooyina yo yi wape okunyanyangidhwa nokulandithwa. Momukalo nguka aagundja otaa mono mo okathilinga kokwiikwathela nokukandulapo oluhepo tashi zi muunongo wawo yo yene.

Oshilongo otashi vulu wo okuhogolola limwe lyomomalaka gaavalelwa mo ndyoka tali ningi hali longithwa onga elaka lyomakwatathano moshilongo notali ningi hali popiwa kaantu ayehe moshilongo. Iilongo ngaashi Botswana oshi na elaka ndyoka hali longithwa onga elaka lyomakwatathano kaakalimo yomoshilongo ashihe. Ngele otu na elaka lyomakwatathano lyaavalelwa mo moshilongo otashi tukwatha wo okutseya oohedhi nomithigululwakalo dhomihoko dhilwe moshilongo.  Iilongo yAfrica mwa kwatelwa Namibia otwa pumbwa okuza konima yesiga nokukala twa landula omithigululwakalo dhaatiligane, oshoka elaka ohali endele pamwe nomuthigululwakalo. Otu li po tatu kanitha omithigululwakalo dhokuku, oshoka otwa tala ko omalaka gaakwiilongo ogo ga simana komalaka getu yene.

Omuwambo okwa tile: “ndago iha ninge iyali”, sho “Oshilongo  shaa na Omuthigululwakalo osha fa olweendo lwa tumba lwaa na mpoka lwa thinda.” Nonande tu hokwe nokupanda omalaka gaakwiilongo kape na esiku tu ka  ningeni aakwiilongo. Onkee otu na okuyambulapo omalaka getu tseyene.

 

LEAVE A REPLY

Please enter your comment!
Please enter your name here