Ovalongifikola ova pumbwa eendjambi dili pauyuuki

0
177

OMUTHIYA: Ominista onkuluntu Hage Geingob okwa hala ovalongifikola va pewe eendjabi di fike poilonga yavo, ta popi tati ovalongifikola ovena oinakuwanifwa ihapu mokukwashilipaleka kutya onakuiwa yoshiwana shokomongula oya pewa ehongo olo tali va kwafele oku vapa exumokomesho lopetameko mounyuni.

 

Geingob okwa li ta popi poshihongi shovalongifikola moshikandjofikola pOmuthiya metitano loshivike sha dja ko. Okwa lombwela yoo ovalongifikola kutya ova pumbwa okukala vena ounongo womoule opo va nduluke omaunongo nongushu yelongo kounona, mwa kwatelwa omikalo doku lumbakanifa eenghatu dopamifyuulukwakalo shi li mekwatelo kumwe nounongo wopashinanena.

“Onghee nee oshinakuwanifwa shovalongifikola meyambulepo loshiwana ina shi pumbwa okutalwako shi hena ongushu yasha” Okwe shi popya ta weda po vali tati, opo ovalongifikola va kale velitula mo mokuwanifapo oinakuwanifwa yavo ovena okukala ve udite etumba meifano lavo novena oku ulika oulongelwe wavo efimbo keshe meni no sho yoo kondje yongulu yofikola.

“Omikalo dovalongifikola vetu odi na okukala delikalekelwa nodina oku kala oshiholelwa no tadi yandje efano liwa keifano louhongi olo la kala ko pomafimbo oo fye twali ovalongifikola,” ta popi.

 

Okwa weda po yoo kutya ovalongifikola nava kale veshishi kutya omesho oshiwana okuvo a tala, nomalihumbato avo novahongwa oku na oku kala omalihumbato oo taa eta ounwa moshiwana ndele ha ma lihumbato taa eta ohoni.

Pefimbo tuu opo oMinista yEhongo David Namwandi okwa popya kutya epangelo kalina efiku la talele omaudjuu ovalongifikola lihena esho la ninga po ashike ole li pyakidila nokuva xumifa komesho ngaashi oku xumifa komesho eendjabi dovalongifikola moshilongo ashishe  nosho yoo okuva futa nawa no pefimbo.

 

Namwandi okwa popya kutya epangelo otali ka yandja omakwafelo oo taa ka kwafela ovalongifikola va longe oilonga yavo nawa, ngaashi omambo ovalongifikola.  “Epangelo ola kala leli pyakidila oku yandja omaumbo kovalongifikola eli 190 oo taa tungwa modula 2013/2014,  oshipopiwa sha Namwandi sha lesha.  Okwa ti kutya oinakuwanifwa imwe yepangelo oku xwepopalifa ongushu yovalongifikola oya kwatelamo okutota po okuyandja omapandulo kovalongifikola.


KuLoide Jason

 

LEAVE A REPLY

Please enter your comment!
Please enter your name here