DJ CK a yemba ovakwatingalo

0
289

EENHANA – Ovakwatingalo koshitukulwa shokolundume lwoshilongo, ova yemba ovo ve li ninga ovakwatingalo vomoinheya  ovo inava deuka  va ninga eestudio tava ti,  omukalo ou tava longifa ota wii moshipala eyokomesho loshitukulwa sheengalo moNamibia, unene kombinga yokolundume lwoshilongo.

 

Kauko Negongo ha ifanwa oshilukadina DJ  CK, okwa yemba ovatotingalo novakwatingalo kombinga yokolundume ta ti, otava ningi nai ovaholingalo ovo ve hole  ewi nomukwelengedjo u li nawa. Okwa ti: “ Ngeenge to popi ongalo iwa, okwa dilaadilwa nghee ya longikidwa paitya,  nongushu yekwato lomukwelengedjo wewi”.

“Ashike oto hange  ongushu nomukwelengedjo wewi leengalo da shikilwa momaumbo,  itau shambula ovapwilikini molwaashi, eengalo edi oda kwatelwa  meenduda inadi tungwa pamukalo wokukwatelwa eengalo / omaimbilo”.

Omushikingalo mukwao womunyasha Nestor womEenhana a teelelwa a ete po oAlbum  ipe muKotoba yedina“Back up Plan”, naye okwa  endulula eendaka  daDJ CK kutya, ovashangi voitya yeengalo nava  longele kumwe novanhu ve na eshiivo va dule ku va kwafela  mokukwata eengalo  ilo oyiimbo yavo.

Ta fatulula kutya: “Ovaimbi vape, otu na ku ilongekida nefimbo la wana  tu dule ku pitifa eengalo detu.  Vamwe ohatu  endelele unene  okuya keestudio shaashi twa hala omadina omangha omaimbilo etu kae li nawa.  Mupya munene,  ngee ove omwiimbingalo wa fya ondjala  yoimaliwa,  oto ka dopa meifano loye loushikingalo”.

 

Ashike , Eddy Katele a li nostudio Mamboflani moShomeva/Tsumeb paife oku li koWalvis Bay okwa ti,  kadi fi doshili kutya  ovakwatingalo hava kwatele momaumbo ohava kwata oiimbo ihe na ngushu.

Okwa ti, okwa kwata omaimbilo e dule pu a-3  e li nawa lela pamufika moshilongo, amwe  okwa tofwa mo pefimbo lefiyafano leyandjo lomapole oNAMA. Okwa ti: “Ondi udite kutya,  ovanhu ove na eineekelo kutya,  meenhele detu dimwe dokukwatela omaimbilo inadi tungwa di li pamufika wokukwatelwa omaimbilo. Vamwe ohave di ula oukololo nokuli.”

Kadi fi doshili kutya eestudio detu  neenduda omo hatu kwatele inadi tungwa pamukalo

wokukwatela eengalo dongushu nokadi li pamufika wopautechnology,  paife ohatu longifa omukalo upe wopashinanena (software) to kwata eimbilo newi la yela li na ongushu shihe na kutya ou li monhele ya tya ngahelipi noto longifa oilongifo ya fa peni”.

Eddy Mamboflani okwa  kwata eengalo ngaashi Ivan Chippa, Hazard, Respect, M-Gee odimwe domeengalo da tofwa mo pefimbo leyandjo lomapapa omanyakwa ovaimbingalo mefiyafano loNAMA.

Eemhata kombinga yokukwatela eengalo momaumbo koshitukulwa shokolundume lwoshilongo oule woivike ya dja ko, oda  kala pokati kovakwatingalo moradio yovakwashiwana  yaHangwena, oshoyo pokati kovashangi voitya yeengalo  novashikingalo ova ninga omafiku tave li  kumike nghee ve na ku imba eengalo dongushu.

Okwa teelelwa elunduluko li iwetikile okudilila kovaimbingalo va kwatela eengalo davo  “moukololo”.   Ovashikingalo vape ove li yambula po voovene  moushikingalo moshilongo ngaashi ooBig Sound Richie ova kwatela eengalo davo meestudio doludi eli naEddy  Mamboflani okwa kwata omukwelengedjo muwa eshi a kwatela eengalo moTsumeb.

 

Vamwe vomovashikingalo  va kwata eengalo davo vene inadi fa odo da kwatelwa meestudio tadi shekwa da lukwa omadina ngaashi “mooKambashu ilo Meendjuwo, ova shika eengalo diwa da hokiwa moshilongo nova findana  mefiyafano leyandjo lomapapa  oNAMA.

 

KuClemence Tashiya

 

LEAVE A REPLY

Please enter your comment!
Please enter your name here