OKUHOKANA AAKIINTU OYENDJI PETHIMBO LIMWE NASHI KALE PAMPANGO

0
249

 

WINDHOEK – Kansela gwaMuni waVenduka gwokoshikandjohogololo sha Katutura, Benestus Kandundu otati ethimbo olya thika ku tulwe poshitaafula oshikundathanwa shoshinima shondjokana yaakulukadhi oyendji pamuthika gwopashigwana oshoka osho ashike inashi kambadhalwa nasho ongeyamukulo lyokushunitha pevi oHIV/AIDS nomala inaaga halika.  Ta gwedha ko kutya oshinima shika okwe shi tseyitha wo komutumba hagu ithanwa Annual Partners Orientation Conference omwedhi gwa zi ko, ngoka  gwa li gwa ningilwa kOshiwakopo no gwa li gwa gongalwa kaakalelipo yomalelo giilando noondoolopa.

“ Osho oshili kutya oHIV/AIDS nomala inaaga halika oya ninga endangalati  enene moshigwana shetu, unene tuu momahala ngoka ga dhengwa nayi koluhepo. Molwoshinima shino otu na okutala komikalo dhilwe po , Kandundu osho a ti sho a li ta pulwaapulwa   ko New Era mOmaandaha.

“Kakele kookoondoma nokunkekwa,  mbyoka oyo owala omayamukulo mokushunitha pevi etaandelo  lyoHIV/AIDS, omukalo gwokulundulula omulandu gwopampango okupitika aahokanwa  yi indjipalekwa /ooyatatu  nenge omulongo ogu na okukambadhalwa, “ osho a ti.

“Osha yela kutya  omu na aantu oyendji moshilongo muka itaya ka tsa kumwe nedhilaadhilo ndika, ashike inekela ndje owala,  ndjika oyo owala ondjila tatu vulu okuya nayo komeho, naMayola gwaVenduka omusimanekwa Agnes Kafula ota popile edhilaadhilo ndi, “ ta popi nomuthindo.

Ehokano lyaakulukadhi oyendji olya kala oshitopolwa shomuthigululwakalo gwandje ndele omanga gwa longa methimbo lyookuku. Inashi kala uupyakadhi ngele osha kambadhalwa, “ ta dhenge po omuthindo.

Kansela ta tsikile tati opu na aalumentu oyendji ya hokana ashike natango otaya gandja omala kaakiintu yalwe, naashika otashi eta omala inaga halika, na okwi itaala kutya ngele ondjokana yaakulukadhi oyendji oya pitikwa yi kale paveta otashi ka kandula po omukundu nguka.

Kandundu ta tsikile tati omaluvalo  aluhe ohaga ka hulila owala mokukala aanona yomomapandaanda molwaashoka oohe oya tila okuya ulukila aanegumbo lyawo sho ya tila oondjokana dhi teke.

“Shotangotango na tu taambe ko kutya atuhe aakengeleli minima yopahole, nandjika oyo owala ondjila tu na okweenda nayo tu kandule po omukundu gwoHIV/AIDS ngoka gwa londa pombanda nomala inaaga halika, “ ta popi nomuthindo.

Okwa hiya wo aanapolitika ooyakwawo ya tale ko oshinima shika ongoshinima sheendelela.

Osha simana unene opo ku kundathanwe oshinima shino pamuthika gwopashigwana oshoka otashi  ka kwathela oofamili odhindji moshilongo opo dhi hume komeho mengungumano nomombepo yeyambidhidhathano, ta popi nonyati.

Nonando ehokano lyaakulukadhi oyendji ohali ningwa pamanguluko momithigululwakalo nomomaitaalo gamwe, okushi talela momumbwalangandjo kashishi naanaa oshinima tashi endele pamwe noshigwana sha putuka. Yamwe yo mwaamboka taa longitha natango oonkuluhedhi dholudhi nduka moNamibia oyo Aaherero/Aambanderu.

Oshikwawo omapekaapeko ga ningilwe koTNS moSouth Africa mo2010 oyendji  ka ya li taya popile ehokano lyaakulukadhi oyendji. Oopelesenda o74 dhaa South Africa 2000 mboka ya pulaapulwa oyu uvite kutya ondjokana yaakulukadhi oyendji omukundu, naakiintu itaa tsu kumwe nayo  shi vulithe paalumentu.

Maaluudhe mboka ya pulwaapulwa,  oopelesenda 68 itadhi tsu kumwe nasho, omanga dhaatiligane o  86,  dhooMbinzimbali (Kalada)  odhili 85 nodhaa India 78.

Oopelesenda 64 dhaalumentu oye  li ompinge nokukala naakulukadhi ye vulithe gumwe noopelesenda 83 dhaakiintu ya pulwaapulwa nayo oye li ompinge nasho.

Oopelesenda owala 18 dhaamboka ya pulaapulwa taya zimine kutya kashishi uupyakadhi ngele omulumentu oku na aakulukadhi ye vulithe gumwe.

 

KuKuzeeko Tjitemisa

LEAVE A REPLY

Please enter your comment!
Please enter your name here