Iimaliwa ayishe yomukulupe ya ya motombo

0
334

UUKWIYUUSHONA – Ovakwapata vomukulupe weedula 84 womomukunda Okashandja kAndili moshikandjohoololo Uukwiyuushona mOshana Region, ova tokola opo va popye na kansela wavo osho yo opolifi yomoshitululwa omo opo ve va kwafele, omolwa omukulupe womepata lavo oo ha longifa nai oikolwifa.

Nonande ovakwapata va kendabala oikando ihapu oku oku pukulula noku kaleka meekulu Hanna Timoteus kokule nomalodu, omukulupe ou, onghee ta twikili noku longifa nai oikolwifa unene tuu otombo.

Oshikando sha xuuninwa, meekulu Timoteus vati  okwa lya eengunga doN$250 motombo.  Ehalasha lotombo ha li kosho oN$2 nomukulupe ou okwa longifa hanga etata lopenzela oyo ha pawa kepangelo, oku futa engunga  dotombo oyo a nwa poundingosho vo popepi neumbo laye.

“Ngee ta i koukamba oha i ta ende, ndee eshi ta aluka oha di ko te li koko, yee ta nangala mondjila molwa oukolwe. Nefimbo limwe okwa ka nangele kopolifi konima eshi a hangwa a nangala mopate,” Andreas Amundjindi oo eli Kansela wOshikandjohoololo shUukwiyuushona, ta ti.

Omushingi wotuwa oyo hanga ya lyata Timoteus vati okwa dengela opolifi oyo ye uya i mukufe mo mopate ndee tai i naye ko staishina.

Omafiku aa vamwe vo movakwapata va meekulu Timoteus ova kwatafana na Amundjindi opo e va kwafe, mokukeelela meekulu ou a ha longife vali oikolwifa. “Paife otwa dilaadila opo tu ye kombelewa yopopilifi kOndangwa opo tu ka pewe ko ombwaapila oyo ta i kunghilile ovanhu vopomukunda apa va hape vali meme omalodu. Ngee twa pewa ombapila ohatu ka pitula kansela opo tu ye naye poukamba fye tu twale po ombapila oyo,” umwe womovakwapata ta ti.

Ovakwapata ota va holola kutya onghalo yokunwa omalodu oya nyonauna nai onghalamwenyo ya Timoteus, oo paife a taataa ovatekulu meumbo.

Omukulupe ou ota ku hoolwa kutya okwa taatela ovatekukulu va dalwa komona a xulifa komaumbo ovayeni ye a kale meumbo oye aeke.

Kakele kokushangela ovanamukunda ombapila opo vaha pe vali omukulupe ou omalodu, ovakwapata ova tokola yoo oku ya kombelewa yonghalonawa, opo openzela ya meekulu Timoteus i kale ha i tambulwa ko ku umwe womovakwapata, ndele ha komukulupe yee mwene.

Omolwa onghalo yokulikalela, ovakwapata ova kendabala yoo opo va kufe mo Timoteus meumbo laye vo va ka kale naye ve mu file oshisho, ashike okwa anya filufilu.

“Ame ondili ashike nawa, i na ndi pumbwa nande omunhu a kwatele nge openzela, ile ta kufa nge meumbo lange, shaashi ame iha ndi kala nondajala oha ndi pewa oikulya yoshikukuta ku kansela, ondili ashike nawa,” Timoteus ta ti.

 

Ku: Helvy Shaanika

LEAVE A REPLY

Please enter your comment!
Please enter your name here