Omukainhu a dipaa omukainhu mukwao medina loihole

2
274

 

ONGWEDIVA – Omukainhu omunyasha lela, okwa holoka mOmhangu ya Mangestrata mOshakati shi nasha nediapao lomukainhu mukwao eshi vali ta va kondjele ohonda.

Omukainhu weedula 25, Ester Taati Nakapela, oo a li omunafikola koshiputudilo shopombanda sho International University of Management (IUM), okwa xulifila mOshipangelo shEpangelo mOshakati, eevili donhumba eshi vali tava lwile omulumenhu nomukainhu omunamido 20, Ester Ndapandula Konias womOshakati.

Omakonaakono oo aningilwa omudimba okwa holola kutya efyo Nakapela ola etifwa eshi a mona oshiponga komutwe.

Ota ku hokolowa kutya Konias okwa monifa Nakapela oshiponga komutwe pefimbo lolwoodi ola tukuka pokati kovakainhu ava va vali, ovo tava hokololwa kutya okwa li ve na ohonda imwe.

Omunambelewa omukulunhu wOpolifi mOshitukulwa shaShana Komishina Ndahangwapo Kashihakumwa ota hokolola kutya, oshivike sha dja ko, Nakapela oo a dile komukunda Onayena mOshitukulwa shaShikoto, okwa hangwa meumbo lohonda yaye ku Konia oshivike sha djako.

Ota ku hokololwa kutya Konias oo ena okaana nomulumenhu ou, okwa li a nofwelwa komumhu wonhumba kutya ohonda yaye oi li  meumbo nomukainhu umwe.

Eshi osha eta opo Konias a ye meendelelo keumbo lohonda yaye nokwa fikila ta konghola.

Ota ku hokololwa kutya, omulumenhu okwa lombwela Nakapela ngeno a faduke po, molwaashi oku e shi nawa kutya ina yokaana kaye omupyakadi nokuhole omapove, ashike nakusa okwa anya oku faduka po.

“Omanga Nakapela a li ta pitifwa mo meumbo kohonda, Konias oo a li pomuvelo ta konghola okwe munukila. Omulume okwa kendabala ngeno e va hangukunune ashike Konias va ti okwe mu lumata osho sha eta opo omulumenhu e va efe, nokuva fiya po ndee ta shuna meumbo.

“Konias va ti okwa shikula Nakapela oo kwali ta ende ta i, fiyo omepandaanda. Konima yefimbo, (Konias) okwa alukila meumbo lohonda yavo, noikutu ya twimaana, osho ta shi ulike kutya ovafa kwa li tava lu,” Kashihakumwa ta hokolola.

Vamwe vomookaume va nakufya ota va hokolola kutya, konima yolwoodi, Nakapela okwa ya komuhandjo koIUM oko kwali ha di, ndee ta hokolola osho sha ningwa po.

Konima ashike yefimbo eshi eshi a mana oku hokolola, okwa tameke ta ti keudite nawa, nokonima yokafimbo okwa tameke oku kunga.

“Vakwao ove mutwala koshipangelo, ndee nghee a enda ta kungu ondjila aishe. Konima ashike yefiku eshi a tambulilwa moshipangelo, ye okwa xulifa,” umwe womookaume ta hokolola.

Komishina Kashihakumwa okwa lombwela Kundana kutya, motete, opolifi oya li ya patululila Konias oshibofa shokuehameka nokunyenyepeka olutu, ashike paife oshibofa eshi osha ningululwa, noshaningwa oshibofa shedipao. Oshibofa sha Konias osha undulilwa kuNovember.


KuHelvy Shaanika

2 COMMENTS

LEAVE A REPLY

Please enter your comment!
Please enter your name here