Omukiintu a kwatwa sho a li ta yulu oohi momeya ga nyata

0
238

 

RUNDU – Pethimbo lyongula onene mEtitano lya za ko, aanambelewa yokutula oompango miilonga yomElelo lyomoshilando shaRundu, oya kwata po omukiintu gumwe sho a li ta yulu oohi la oohi momeya ga nyata. Irma Kakoko gwoomvula 27 opamwe nooyakwawo yalwe, oya li taya yulu oohi pethimbo lyongula onene potundi 03:00. Manga ya li yi ipyakidhila, omunambelewa gumwe gwegameno okwe ya mono . Yamwe oye shi pondola okufadhuka po ashike, Kakoko okwa kwatwa.

“Out shishi kutya inatu pitikwa okuyula oohi metoto muka, shoosho tatu shi ningi uusiku,” Kakoko osho a ti.

Omatale gokuya omeya ngoka ga nyata inaga tulwa momudhingoloko gwondhalate na shika osha ningitha ompito ompu kaakwashigwana ya ye mo.

Pampango yomalelo goondolopa otayi ti, napu kale omatale gomeya gonyata ano gohanya e taga longithwa okupungula omeya ngoka ga longithwa muundjugo ano gonyata yomomagumbo. Ashike, aakalimo yamwe yomoRundu oya hwepopaleke onkalo ndjika opo ya likole mo sha sho ku ikwatha noya ningi omatale ngaka omahala gokuyula oohi.

Nonando omeya ngaka inaga longululwa opo ga kale omawanawa ishewe, shika inashi piyaganekela aakalimo yomudhingoloko ngoka okukwata oohi ndhoka haya li momagumbo manga dhilwe taye kedhi landitha po kaantu mboka itaya fekele sha mondoolopa yomoRundu.Elelo lyoshilandi otali lundile wo aantu mbaka kutya otaya yonagula omutunda womatale  opo shi kale omukalo omupu gwoku kwata oohi.

Nando Kakoko eshishi kutya oohi ndhoka taa yulu kadhishi oombwanawa noku liwa kaantu, oluhepo olwo ngaa lwemu ningitha opo e dhi kwate mo metale lyomeya ga nyata.

“Otwa li tatu yulu oohi nomusamane gwandje naantu yalwe ashike ayehe oya matuka po. Uuna tatu kwata oohi, omo owala tatu idhongo momeya ngoka ga nyata nayi molwashoka uuna twa kwata mo sha, twa mona ngaa omuyelelo ngaaka wo nuuthigona wayi kokule molwashoka dhimwe otadhi ka landithwa po kaalandithi yomomapandaanda mboka taye kedhi landitha po ishewe kaalandi yalwe,” Kakoko osho a ti.

Elelo lyoshilando olya ti kutya momathimbo ga piti olya kala nokutula po omambaapila ga nyolwa omalombwelo opo aantu yaa kwate we oohi dhomomatale ngoka ashike, aakalimo ohaye ga kutha po noku ga yonagula po. Omukuluntu gwoshikando shuundjolowele womomudhingoloko moshilando,  Sitembinkosi Moyo okwa lombwele oshifokundaneki shoNew Era mEtitano ta ti, molwashoka momatale moka ngashingeyi omuna oombuto dhomavu nosho tuu iikwauzigo oyindji, aantu otaya londodhwa opo yaa lye sha sha za momatale ngoka oshoka ope na ompito onene shi tulu uundjolowele wawo moshiponga.

“Otashi vulika shi kale oshiponga oshinene okulya oohi ndhoka dha za momatale na otashi vulika lela shi fale sigo omeso molwashoka iinim ambyok ayi li momatale moka oyi n auuzigo yo kayishi iiwanawa kuundjolowele womuntu,” Moyo osho a fatulula.Moyo okwa holola wo kutya itaya ka geela Kakoko molwashoka Elelo lyoshilando kalina naanaa ompango ndjoka tayi vulu okupangulitha eyono ngaa ndika.

Elelo lyoshilando shaRundu otali londodha aakalimo opo ya kale ya kotoka uuna taya landa oohi momapandaanda molwashoka oohi odhindji odha za momatale gomeya ganyata.

 

 KuMathias Haufiku

LEAVE A REPLY

Please enter your comment!
Please enter your name here