Opolifi ota i handukile ovahepeki voinamwenyo

0
161

ONGWEDIVA – Opolifi moshitukulwa shaMusati, oya tokola oku katukila onghatu yopaveta ovanhu ovo tava hepeke oinamwenyo.

Omupopiliko wopolifi mOmusati Warrant Officer Lineekela Shikongo okwa lombwela Kundana kutya opolifi oya didilika kutya ope na ovakwashiwana vahapu ovaNamibia novaAngola ovo va ama keengaba doilongo ei ivali hava hepeke oimuna unene tuu eendongi.

“Opolifi oya didilika kutya ovanhu vetu, ka ve shi kutya oinamwenyo nayo oi na oufemba nope na okatendo mekotamhango loshilongo oko ka keelela ehepeko loinamwenyo.

“Ngee owe uya kOshitopolwa Omusati , oto hange ovanhu tava longifa outemba veendongi, oku ka teka omeva keenhele dokokule odo di li fiyo oposhinano sheekilometa 10. Ndee nghee tava ende oshinano ashishe osho eendongi ota di dengwa, dina oipute, doo odo ngoo ta di nane okatemba oko ka humbata ovanhu nomandini omeva. Unene tuu ounona oha va hepeke oimuna neenghono, ovakulunhu na va popye navo,” Shikongo ta ti.

Shikongo ta hokolola yoo kutya ovanhu vamwe unene tuu ovaAngola ohave uya oku konga oipumbiwa yavo keefitola moNamibia ta va longifa outemba veendongi, ashike efimbo nefimbo oha va fiye oimuna pomutenya i li kokatemba efiku alishe, i he na oikulya ile omeva.

Omupopili ko wopolifi ota ti oimuna na i filwe oshisho unene tuu pefimbo eli loluteni la hanya.

“Ita tu ti oimuna i na i longifwa, ohatu ti oimuna i na i hepekwa. Nge twa hange omunhu ta hepeke oshinamwenyo, oha tu mu katukile onghatu yopaveta. Oimuna nayo oi na oufemba,” Shikongo ta kunghilile.

Shikongo okwa holola yoo eudo nai lopolifi omolwa ovanhu ovo hava mangele oiti meefingo doimuna unene tuu eengobe, oikombo noingulu onga onghendabala oku i kelela iha ye momakove pefimbo loufita.

Okwa ti eshi na shi mone exulilo, ovanhu na va tameke okulifa oimuna yavo ile ve uye po nomukalo umwe oo i ta u hepeke.

“Ootatekulu nghee vadja oha va lifa, oimuna na i lifwe. Ngeenge ovanhu i tava lifa nava tule ko eengubu komakove avo, di ha pitwe koimuna ile va konge po omukalo umwe ashike hamukalo wo ku mangela oinamwenyo omati male male meefingo,” Shikongo ta ti.

 

 KuHelvy Shaanika

LEAVE A REPLY

Please enter your comment!
Please enter your name here