Pwa totwa oshikondo sho ku ungaunga naanyasha ye na uulema

0
225

ONGWEDIVA – “Aantu mboka ye na uulema moNamibia otaya ti tse katu shi iilema, inamu tya itatu vulu okulonga , tse otatu vulu okulonga. Shoka tatu popi osho shika kutya shotangotango tse aantu, opo nee ku landule uulema. Sho osho nee tashi  ti aantu mboka ye na uulema kaye shi iilema” shika osha li sha endululwa komupeha Minista gwAayasha, Omaudhano nOmithigululwakalo, Julitte Kavetuna sho a li ta popitha Omutumba gwOpashigwana  gwAanyasha mboka ye na uulema mOshitopolwa shaShana nena.

Kavetuna okwa ti Uuministili owa tota po oshikandjo shi na sha naanyasha mboka ye na uulema moNamibia okuhumithakomeho nokupendula po onkalo yomauhupilo gaanyasha mboka ye na uulema. Okwa holola ishewe kutya epangelo olya e ta po omilandu dhoku kwashilipaleka kutya aanuulema otaa tyapula ekuthombinga, uuthikepamwe nenkondopeko koombinga adhihe dhevi lyetu.

Okwa hiya aakwashigongi ayehe ya kuthe ko omukundu gwokwaana iilonga maanyasha mboka ye na uulema ongoshinima shotango moonkundathana dhawo oshoka oku na iiputudhilo mwa kwatelwa iiputudhilo yepangelo mbyoka tayi tongola aanuulema.

“Iiputudhilo yepangelo ohayi tongola aanuulema ka shi li pawuyuuki netompelo lyokutya aniwa ka ye na oonzapo dha pumbiwa nonando oye na ngaa otseyo yasha miinima yontumba. “

Kavetuna okwa kwashilipaleke aakwashigongi kutya epangelo olya dhindhilika onkalo yokwaaniilonga kwa ya pombanda mokati kaanyasha yaanuulema na olya indile aagandji yiilonga moshilongo ashihe ya gandje oompito dhiilonga kaanuulema. Okwa lombwele wo iiputudhilo mbyoka tayi longitha omikalo ndhoka dhokutongola ya tameke okutala oonkalo niinima mbyoka ya pumbwa okutalwa nawa ngele tashi ya kwaamboka ye na uulema.

Moshipopiwa she,  Kavetuna okwa dhenge omuthindo kiipumbiwa yoveta yokuthikitha pamwe oonkalo dhaamboka inaya mona oompito dha gwana (Affirmative Action Act) na okwa gandja omayele kuuMinistili welongo wu gandje oompito  dhelongo dha gwana  kaanuulema molwaashoka ope na omwaka gwaaniilonga yanuulema. Okwa gwedha ko ishewe no ku indila iikundaneki yi nyanyangidhe omahokololo taga popi nawa kombinga yaanuulema nelalakano lyokulundulula efano lyaanuulema moshigwana.

Omupeha Minista okwa pe aanuulema omayele yi ilonge ya mana mo yo ye ki ihumithe komeho kiiputudhilo yopombanda ngaashi sha UNAM (University of Namibia) . “Otwa  pumbwa  okumona omwaalu gwetaambo lyaalongwa aanuulema tagu londo pombanda mo UNAM. “

Ngoka wo a li ta popi poshigongi mpoka, oNgoloneya gwOshitopolwa sha Shana Klemens Kashuupulwa , ngoka a kwashilipaleke aanuulema kutya okukala nuulema itashi ti kutya omuntu ita vulu okulonga sha, ashike otashi ti ota vulu okulonga  na ota vulu okuwilika, shoka sha faathana nashoka sha popiwa kOmunashipundi gwEwawa lyAanyasha mOshikandjo shaNgwediva Hofnie Iipinge, ngoka a ti “Okukala nuulema itashi ti okukala ito vulu okulonga.”

KuNuusita Ashipala

LEAVE A REPLY

Please enter your comment!
Please enter your name here