Simon a findana, ashike olwoodi laye kala li li fuula

1
250

WINDHOEK –  Enyakwa likulu laNamibia Harry ‘The Hurricane’ Simon a  findana epapa lounyuni lwoikando i-2,  ashike oku na ku litala kutya okwa findana kelao oshikando shotete meifano loudengingonyo ina dengwa nale komukondjifi waye.

Molwoodi lweengonyo la lwila Olomakaya pofabrika yoRamatex  moWindhoek , Simon okwa denga omukondjifi waye omuSerbia Geard Ajetovic , ta findana epapa loshivixa  shoInternational Boxing Federation (IBF) International Light Heavyweight.

Simon ou a shiivika ependa shito moudengingonyo, okwa kendabala okukandeka omukondjifi waye Ajetovicou a li nomukumo kutya oye omufindani, ashike eshi oitwa ya ka yandjwa kovayandji voitwa,   ya findanifa Simon, ovavaluli ova valula ngaha 116-113, 117-111, 117-111.

Nande ovaNamibia vahapu va li va teelela Simon a xupipike efimbo lolwoodi  lavo nomuSerbia,  Simon ‘The Hurricane’ okwa nyengwa ku  wanifa po eudaneko lokudenga imwe nopedu omolwa omukalo weumbo leengonyo daye inau shambula ovatali va li neteelelo liwa kutya ote shi pondola ngaashi meedula do90. Simon oo shito ha lu noikuko , okwa kala nokwaamena oshipala  noshe mu katasha a kale nokukondaekwa a ha mone omhito yokutopifa eengonyo dipyu mefimbo lixupi ngaashi shito. Omukondjifi okwe mu kondeka meemhito dihapu.

Momalweefo aeshe okwa kendabala  nande ina ya poshi, okwa keelela  nokwa yandja eengonyo dongushu da ukilila nande a nyengwa kudenga diva omukondjifi. Simon  ou shito iha tewa, osha li shidjuu okushoneka omukondjifi waye ngoshito, a lwe nonyati e mu ehameke nawa .  Osha yandja omhito kuAjetovic a longife omikalo daye okukondeka Simon  moshinyanga sha Ramatex sha li shiyadi ovaondolimesho . Simon okwa findana omalwoodi 29 ina dengwa, omalwoodi 21  okwe a findana inaa fika pexulilo, mangha omukondifi waye a dengwa momalwoodi 9 omomalwoodi 33 mwa kwatelwa nolwoodi omu a dengwa lwOlomakaya .

Molwoodi likwao, omudengingonyo omuNamibia wondjudo yoFeatweight Gotlieb Ndokosho, oku na alushe  omukumo neteelelo lonakwiiwa mokulikola oshishani shounjuni  pamufika oo.

Eshi, Ndokosho okwe shi koleka  eshi a denga mo omudengingonyo wondjudo  International Boxing Federation  (IBF) Africa Feathrweight  omukwashiwana waParaguay Feliciano Dario Azuaga a dengwa  imwe nopedu medingonoko eti-3.

Ndokosho okwa findana omalwoodi 15, a findwa momalwoodi 3  mokati komalwoodi 18 a lwa, petameko lolwoodi  lavo naAzuaga  woshipombolutu .

Molwoodi likwao, Eradius ‘Pohamba’ Hamunjela  okwa dengwa mo medingonoko eti-8 kenyakwa dingi moudengingonyo Philipa Ndou omuSouth Africa moshivixa shoWelterweight.

David Kashela okwa  denga Lucas Muktete, ta findana oshishani shovadengingonyo vondjudo yoJunior Welterweight, yee Frans Niilo Hifindobe okwa  denga mo Johannes Ishono. Mefiyafano lovadengingono voshivixa shoLightweight, Rocky Haraseb okwa denga Philip Swartbooi  imwe nopedu medingonoko eti-3.

Pokati opo otwa kundana kutya, Varde Nyambekwa woshivixa shoWelterweight, okwa kendabala  eshi a denga mo Paulus Petrus , omanga Mathew Kandala  wondjudo yoFeatherweight a denga George Iita mongonga onhi -4.


KuOtniel Hembapu

1 COMMENT

LEAVE A REPLY

Please enter your comment!
Please enter your name here