‘Tu tungeni oshilongo’, Haimbodi ta ti

0
209

 

ONGWEDIVA – Eedula omulongo nambali da pita po Veikko Haimbodi okwali ashike omunailonga, wekwashilipaleko, ha kwata ashike okamaliwa ke fike po N$700 komwedi.

Nena Haimbodi oye umwe womovanangeshefa vopokati monooli yoshilongo, e na eengeshefa momatungo nomeepate ta tungu oshilongo, nokuli yoo omuyandji woilonga kovanhu ve dule o200. Mongeshefa ove li mo yoo nomukadi Aili oo ha landifa eenhele odo ta di tungwa komushamane waye.

“Eshi sha etifa opo ndi tameke ongeshefa oluhepo. Oluhepo ku ame mwene, oluhepo mofamili nomoshiwana. Onda tota nee ongeshefa opo ndi kwafele ofamili yange, ame ndi yandje yoo oilonga kovaNamibia vakwetu.

“Ame onda li handi longele oilumbu handi kwata oN$700 komwedi. Kakele koshimaliwa osho shokomwedi, kanda li handi mono nande ouwa washa, kandali handi mono openzela, ile oshimaliwa shomakwafo opaunamiti, omunhu oho pewa ashike oN$700 opuwo,” Haimbodi ta ti.

Mo 2002, Haimbodi okwa tameka ongeshefa mo Gababis, nokonima oko Rundu no Witvlei. Mo 2005, okwa patulula oDolly-Mall mOnandjaba mOkalongo.

“Onda ka diladila kutya omunhu ito dulu okukomba mepya manga meumbo mwa kaka. Omolwaasho nda tameka ongeshefa nde i lukila omukulukadi umwe womomepata letu, meeDolly, shaashi ongeshefa onde i tunga ponhele opo pa li oshihondjelo ame vali onde mu lukila okaana. MeeDolly omukulukadi ena eenghono shili,” Haimbodi ta ti.

Metungo loDolly-Mall yokOkalongo, okwa patulula mo ongeshefa yomalandifilo hano omaalaka yoikulya. Metungo omo tuu omo, omo muna ongeshefa ya kula yoStyle Clothing, oufitola vova China nosho tuu.

Nonande ongeshefa ta i kulu, Hambodi ota ti omu na omashongo mahapu, ashike omashongo aa manene okwa etifwa komulandu womangeshefelo a manguluka oo wa etwa po kepangelo.

Omolwa omulandu ou, ovanangeshefa vomoshilongo unene tuu ovo va nini, ova fininikwa opo ve linyekafena ovalandi vo neengeshefa odo da kula da dja kondje yoilongo.

“Diladila ashike omunangeshefa omuIndia ta patulula ongeshefa kOkalongo, osha yela kutya oungeshefa aveshe vashona tava hangwa po tava landifa oilongomwa yafa yomuIndia oo, ove na okupata.

“Opa pumbwa oku tulwa omulandu opo ovanangeshefa ovo tava di koilongo, va kale ashike tava ngeshefele moilando, nomeedolopa da kula, vo oudoolopa venya vashona tava efelwa ovanangeshefa vanini,” Haimbodi ta ti.

Omunangeshefa ou okwa twa yoo omukumo ovadali opo va tekulile ounona ongeshefa, ta weda po ta ti, ovanyasha -oshiwana shokomongula, ova pumbwa oku kufa ombinga mongeshefa opo va tunge oshilongo.

Ota ti, nonande oshilongo sha pumbwa ovanhu vomaifano elili nakulili, ovanangeshefa ova fimana neenghono moshilongo keshe, shaashi ove hava tungu oshilongo.

 

KuHelvy Shaanika

LEAVE A REPLY

Please enter your comment!
Please enter your name here