Aaleli yopamuthigululwakalo kotokeleni aahakuli yopamuthigululwakalo yiifundja moshigwana

0
286

Swakopmund- Aaleli yopamuthigululwakalo naakotokele nokutidhila kokule aahakuli yopamuthigululwakalo yiifundja mboka ye li taa pukitha aakwashigwana noku shi fundjaleka kutya otaa vulu oku aludha omukithi gwo-HIV/AIDS. Omupresitende gwoshilongo omusimanekwa Tatekulu Hifikepunye Pohamba okwa popi shika oshiwike shika pethimbo a li ta egulula oshigongi oshitimulongo nahamo shongundumutima yaaleli yopamuthigululwakalo shoka shi li natango metitha koSwakopmund. Oshigongi osha gongalwa koyendji yomaaleli yopomuthigululwakalo okuza kiitopolwa ayihe yaNamibia notashi hulu nena mEtitano.

Pohamba ta tumbula tati okwa vundakanekwa noku uvite nayi omolwa aahakuli yopomuthigululwakalo taa popi kutya  ohaa hakula noku aludha omukithi gwo-HIV/AIDS noshinima shika otashi pukitha mboka ye li ya hala okwaaludhwa omukithi gwo-HIV/AIDS.

Aaleli yopamuthigululwakalo kotokeleni nokugamena oshigwana shi ikaleke kokule naahakuli yiifundja yopamuthigululwakalo mboka taa yugu oshigwana moku shi lombwela iifundja kutya yo ohaya aludha omukithi gwo-HIV/AIDS. Momukalo nguka oyendji oya kanitha omaliko gawo omolwiifundja mbyoka. Natu takamitheni aantu yetu kaya ehamekwe  nokukanitha oshishona shawo ye shi ilikolela  omolwiilyo mbyoka, Omupresitende osho a tumbula.

Ta tsikileko ta ti Oministeli yOshikondo shUundjolowele nOmayakulo gOpankalathano, omusimanekwa Richard Kamwi okwa pula eitulomo lyu udha okuza kokabinete opo ku tungwe iiputudhilo yuundjolowele unene tuu komahala gokuushayi ano momikunda. Ta gwedha po nomukumo kutya, Kamwi oku na epopilo lya kola okuza kegumbo lyopombada hali ningi omatokolo muNamibia notatu indile kaaleli yopamuthigululwakalo ya ninge omakwatathano nUuministeli wUundjolowele nOmayakulo gopankalathano mokutota po iipangelo komikunda ya kambadhale oku thikitha aalelwa yawo komahala guundjolowele.

Omupelesitende okwa tumbula wo kutya omukithi nombuto yo-HIV/AIDS oguli gumwe gwomomashongo gookambadhala dheputuko moshilongo. Oshizemo shomukithi gwo-HIV/AIDS oshu uvitike poonkatu adhihe moshigwana shetu. Nomukumo Omupelesitende ota ti, epangelo onkene ta li kondjo nokukondopeka elongelokumwe naaleli yopamuthigululwakalo ku vulwe okugandjwa omayamukulo gi ihwa po okukondjitha omashongo taga etithwa komukithi gwo-HIV/AIDS mwa kwatelwa omatondathano.  Omolwaasho otatu tsu omukumo elongelokumwe molwashoka atuhe otu na oshinakugwanithwa metaandelo lyombuto yo-HIV nokusila oshimpwiyu kwaa mboka taa lumbu nombuto.  Okwa tumbula wo kutya shimwe shi li monomola yotango sha dhindolwa mo kepangelo, ekeelelo lyomukithi moku ungaunga no-HIV/AIDS. Omolwashoka ekuthombinga lya dhiginina okuza kaaleli yopamuthigululwakalo olya pumbiwa mokulwitha omukithi nguka.

 

KuEveline de Klerk

LEAVE A REPLY

Please enter your comment!
Please enter your name here