Ame kanda li mo Koevoet – Sigo Amunyela

0
493

ONGWEDIVA – Omunangeshefa a shiivika nawa monooli yoshilongo Mathias Sigoaluhe (Sigo) Amunyela okwa ekelashi omapopyo oo ta e mu popilwa kutya okwa li moukakunya pefimbo loukoloni.

Oshivike sha dja ko, shimwe shomoikundaneki yefiku yomoshilongo osha nyanyangida okatumwalaka kaxupi (oSMS) oko ta ka holola kutya Amunyela oo e li omupopiliko wovanangeshefa vo Swapo mOshitukulwa shaShana, nokuli yoo omuleli woshitai shoSwapo ha shi ifanwa Ndengu, okwa li ekakunya, metanga lopaukwaita la South Africa, loKoevoet.

OSMS oya landula ehololo lomadilaadilo olo kwali la tokolwa li ningwe ngeno kovanangeshefa voSwapo, ovo ve li omhinge na umwe womovaleli voRally for Democracy and Progress (RDP) oo a popile kutya oRDP ngee oya i koshipundi ota i ka hanauna po oihongwafano yOmukokoli Pelesitende Sam Nujoma oyo i li peenhele da yooloka moshilongo.

Omushangi wo SMS ota ti, Amunyela ke na oufemba oku kwatela komesho ehololo lomadilaadilo li na sha nomukokoli Pelesitende molwaasho okwa li moukakunya.

Amunyela okwa lombwela oshifo sha Kundana kutya ye ka li moukakunya, naavo tava tumu eesms koikundaneki ota ve mu totele ashike eendaka notava nyateke edina laye.

“Nghee nda dalwa ndi ende moukakunya. Kofikola yopombanda ame onda ya ko mo 1989, efimbo olo onda li ndi na eedula 18, no ndali mongundu onhiheyali nongundu onhihamano onde i pita mo1988 kOmukwiyugwemanya kOshigambo. Moukakunya onda ya mo naini ngeenge eshi hatu i mOfikola yopombanda yaLuno mo1989 otwa ya mo hatu li pingafana na (United Nation Transition Assistance Group) UNTAG?” Amunyela ta pula.

Amunyela ta hokolola kutya, mwaavo a li navo mofikola omwa kwatelwa oMinisteli yoPedu yOikwapondje yOshilongo Peya Mushelenga, osho yo umwe womeekansela delelo laNdangwa Elia Irmari.

“Aveshe ovo ota va dulu oku yandja oumbangi kutya ove shi nge nawa otwa li  navo kofikola, no ve shi yoo kutya nghee nda dja onda kala omuwiliki moNanso nomo SCM, ndele ngha li ekakunya,” Amunyela ta hokolola.

Amunyela ta ti nonande keshi kutya olye e mu totela eendaka, ye ota fekele kutya okwa totelwa eendaka dahafele,  molwaasho kwali ta yambida Dr. Hage Geingob oo paife oye a ulikwa a ka ninge Peletende.

Ta ti onghalo i li ngaha i na i pumbiwa shaashi oshilongo mafiku osha yuka pomahoololo opaupelesitende, novanhu i na va pumbwa oku li totela eendaka shaashi ota va eta edundakano mongudu yoSwapo.

“Kombinga imwe ondi udite ngaa ounwa shaashi ovanhu i ha va popi omunhu ehe na eshi e na. Ngeenge ngeno ope na elai ta li ende opo, kape na ou te li popi. Sha hala kutya eshi ovanhu tava popi nge ngaho, ondi munhu lela, no nda tilika ku vamwe,” Amunyela ta ti.

 

 KuHelvy Shaanika

LEAVE A REPLY

Please enter your comment!
Please enter your name here