Ehangano loMCA la andjaneka omeva kovakwashiwana komikunda

0
167

OMBOTO – Oshivike sha dja ko,  oThe Millenium Challenge Account (MCA) Namibia oya yandja eepomba domeva dongushu yeeN$3.5 kovakwashiwana momikunda domoshitukulwa shaShikoto. Ovanahambo  ve n’eehambo momikunda Nangolo dhaAmutenya novokoKalongo kooxumba moshikandjohoololo shaMufiya, otava nwefa peepomba opo.

 

Omupedu wahamushanga moshikondo shounamapya, omeva nefiloshisho loushitwe woixwa Desmond Tshikesho okwa ti,  oMillenium Challenge Acount (MCA) Namibia  otai yambidida oinakuwanifwa yoshikondo  shi dule ku tula diva moilonga omalandulafano  manene oilalakanenwa tai kwafele eyokomesho lounamapya moshilongo.

Tshikesho ta ti, edike po leeprojeka  domaludi,  oMCA Namibia otai kwafele ovanafaalama  va dule ku likola oyuuye mo tashi pitile mokumuna oimuna yeembuto diwa noleedjo doushitwe.

Eepomba oda tambulwa ko kuTshikesho, ou ta longo ponhele  yangolonea woshitukulwa shaShikoto Max Nekongo, koshiwana shomomikunda , oilyo yongeleka novaleli vopamufyuululwakalo.

Omunambelewa omukwateli komesho wehangano MCA Namibia ,Penny Akwenye  ou e shii nawa ouwa hau di meenhele doulifilo okwa  tumbula kutya,  onhele youlifilo waNangolo dh’Amutenya oimwe yomaulifilo e yadi omaufita oimuna, nde omu na omaumbo manini.

MCA Namibia otai longo pashikulafano loule womido 5 okuyambidida oikondo  ya yooloka moyeetwa po yomaludi  kombinga yehongo, oshitukulwa shoutalelipo sha kwatela mo ounamapya. Mokukatukila momudo omuti 5, modula tai ya,  ehangao otali longifa N$ ebilijuna 3.

Paendjvo daAkwenye,  oimuna imwe otai dulu ku nwa meepomba dipe opo da totwa po, ndee natango otai tavakana oinano ile okufika komeva, shaashi eepomba di li popepi okudja puNangolo dhaAmutenya  ope na oshinano sheekilometa 11.

“Ngeenge otashi dulika, ohatu diki oyuunda poupepi nomeva opo tu kwashilipale kutya,  opa tulwa elandulafano lokuxwiila.   Onghene  kashi fi oshinakuwanifwa shoMCA Namibia i ninge etokolo, ndee oshiwana osho vene shi na okuhoolola eekomitee naau ta kala ha patulula eemboola domeva “, Akwenye ta ti.

 

Oulifilo waNangolo dhaAmutenya  oumwe womomaulifilo omoshitukulwa shaShikoto  u na eepomba domeva  4. Nekongo okwa ti, edike po leenhele dokunwina oimuna  puNangolo dhaAmutenya nopOkalongo kooxumba, onghatu yotete yeandjaneko lomeva a yela  a etelwa oshiwana  momidingonoko ei.

Okwa pandula oMCA Namibia  kekwafo eli nokepangelo laNamibia  eshi la ninga elongekido liwa  momudingonoko  ou wa hokiwa yoo kovayambididi vamwe va dule ku kwafela oshiwana.

“Omwa ninga onye oovene  veepomba edi 5,di kwateni noundalapata, di dule ku lognifwa fiyo okomapipi tae ya. Ohandi ka nyemata ngee onde ya ndi mu talele po efiku limwe  ndee handi  udu kutya,  eepomba oda pata shaashi omeva inaa futwa, futeni omavalulo eni omeva pefimbo”, Nekongo ta ti.

 

 

KuHelvy Shaanika naNuusita Ashipala

LEAVE A REPLY

Please enter your comment!
Please enter your name here