Mwene womukunda i na keelela ehavalo loshikukuta

0
203

ONDUNGULU – Mwene womukunda Ondungulu Wilbard Kapula okwe li kala omapopyo oo te a tongelwa kutya okwa keelela ovanhu vomomukunda waye va pewe oikulya yoshikukuta oyo ya dja kElelo laUkwanyama.

Kapula ota ti ye i na ka tala ko oushako voufila oo wali keumbo lelenga Elias Waandja, shaashi ova li va nini unene, ashike i na keelela nande oumwe womovanamukunda vaye va ka pewe oikulya yoshikukuta.

Edina la Kapula ola kala nokudenga onghandangala moikundaneki oivike ya dja ko, nokwa hololwa kutya Kapula okwa anya oku pa ile oku tukulila ovanhu vomomukunda waye oushako voufila va dja kElelo laUkwanyama.

Vamwe vomovakalimo vomOndungulu ova ninga nokuli ehololo lomadilaadilo omo va hokolola kutya Kapula okwa tula mumwe elelo nopolitika.

Ashike mwene womukunda ou, ota hokolola kutya oukutu voufila oo wa li kooWaandja owa li ashike oushako vahamano nokwali e udite kutya omwaalu ou oushona neenghono, no tau dulu oku eta epiyaano momukunda.

“Nghee ndi li po efiku limwe ndi li kofuka ohandi dengelwa ongodi ku kapatashu wange, ta ti oku na oikulya ili koo Elias ya Waandja, vati oukutu veli vahamano va dja kelelo. Ame onda ti momukunda wetu oha mu uya oukutu ve li nande 30 vadja kombelewa ya Kansela, ngeno tuva pe ovo ita va tema omundilo nandenande, ndee oha tu nyengwa oku va tukula. Onda ti pooElias opo pepi, omunamukunda ou a hala naye mwene koo Elias shaashi fye ita tu dulu oku tukula oukutu vahamano,” Kapula ta ti.

Kapula ta hokolola kutya, ohaluka efiku limwe a dengelwa komutoolinghundana ta pula kutya okwa anyena oshiwana oikulya yoshikukuta.

Kakele komutoolinghundana, Kapula okwa yakula yoo eembilive nhatu odo de mu pula opo e li lopote kOuhamba waUkwanyama.

Omafiku ha male eshi a yakula eembilive, Kapula okwa dengelwa vali ongodi komutumwa wokouhamba oo a udaneka kutya ote mu ile e mu twale kouhamba notuwa yepangelo, ndee te mu alula.

“Efimbo olo omutumwa a dengela nge onda li kOshikuku koudu wa mumwameme. Onde mu pukulula apa nda li ashike i na ndi mu mona fiyo opapa,” Kapula ta ti.

Kapula ta hokolola vali kutya ye i na nyamukula keshivo lokouhamba lopambapila oyo kwali ye mu pula ngeno e li lopote omwedi wa dja ko shaashi keshi ou e mu ifana.

Okwa ekelashi vali omapopyo oo taa hokolola kutya ota tula elelo mumwe nopolitka, ta ti nonande e li mongudu yopolitika yehoololo laye, okwa yoolola opolitika kelelo.

“Ame onda lela oshiwana shange nale omanga oshilongo i na shi manguluka, ndee nghina efiku limwe ndi tongole ovanhu vange medina lopolitika,” Kapula ta ti.


KuHelvy Shaanika

LEAVE A REPLY

Please enter your comment!
Please enter your name here