Omukiintu omusimba i itsa ye mwene nombele nokusa

0
236

WINDHOEK- Omukiintu omusimba gwomimvo o 28 okwi ikutha omwenyo  sho i itsu ye mwene  pomutima nomwele. Pauyelele mboka tu na po, omukiintu nguka gwedhina Hambeleleni Kadjuu, tango okwi itsu, ashike omwele kagwali gwa tsa nawa gu pite meni montulo gu mu dhipage meendelelo, onkene okwa kutha ondhopi e ta dhengele mo omwele montulo ye.

Kadjuu okwa li ha kala nayinagona molukanda lwaHavana  kombinga yepandaanda enene lyaMonte Christo , mOvenduka. Shoka a ningi osha halutha oyendji oshoka okwi ikutha omwenyo momukalo omwiinayi.

Oombangi ndhoka dha li po, otadhi popi kutya uukolele waKadjuu  owa kala ngaa wa nika iipa yombwa  iiwike ya piti. Okwali nee a yi kokakilinika hoka a lombwelwa kutya omusimba.

Aapopepi na nakusa otaya holola ngaa kutya nakusa okwa kala ngaa ku uvitile nawa etegelelo lye, na okwa kala nale ha ningi omatilitho kutya oti ikutha omwenyo.

Metine lyoshiwike sha zi ko lwopotundi o  6 yongula, aniwa okwa penduka sho u uvu yinagona a za mo megumbo. Megumbo oye li mo  wo na hegona omusaane gwayina na okwa li ta dhilaadhila kutya ngiika na ye okwa ya kiilonga.

“Okwa dhilaadhila kutya ayehe oya ya kiilonga,  okwa edhile nduno omweelo gwegumbo e ta kutha omwele gwomokombitha e ti itsu ye mwene montulo. Sho a ndhindhilike kutya omwele inagu hita muule, okwa kutha ondhopi nokwe gu dhengele mo. Hegona sho a zi mondunda okwa adha ti idhenge nondhopi,”  mushiinda ngoka ina hala edhina lye li tseyike ta ti.

Hegona ngoka a li mondunda a kotha  sho nakusa  a li ti itsu, okwe shi pondola okukutha ko ondhopi ku nakusa e ta hili mo omwele montulo,  naashoka sha landula ko Kadjuu okwa gwile po nokusa pethimbo mpoka.

Sho oambulasa yAapolisi yaMuni ya thiki po poshiningwanima, oya adha nale Kadjuu e gu inana.

Omakonaakono gomudhimba oga ningwa na oga kwashilipaleka kutya oku na oshilalo sha tsuwa montulo ye, omunambelewa omupopiliko gwopolisi Omukonaakoni Gwopondondo yopombanda Kauna Shikwambi a ti.

Inapu monika  omukanda gu na sha neikuthomwenyo, ashike omakonaakono gopolisi otaga tsikile. Kadjuu ina thiga ko nande hembudangele

 

KuAlbertina Nakale

LEAVE A REPLY

Please enter your comment!
Please enter your name here