Otashi ka djuupala kovanhu vamwe mounjuni va finde Nambia ngee oudano weengonyo osho wa kala ngaho

0
194

WINDHOEK – Ngeenge oudano wOlomakaya  osho wa kala ngaho, nena otashi ka djuupala kuvamwe  mounjuni va finde Namibia meengonyo.

 

Eshi oshe li ulika moudano wenyakwa leengonyo moudengingonyo Boxing Organisation (WBO) International Lightweight Paulus ‘Hitman ‘ Moses ou va  palamenafana nomukondjifi waye omuArgentina  Leonardo Esteban Gonzalez e mu dengela mongongo onhi-7 imwe nopedu.  Onguloshi yOLomakaya eshi va shakena moshinyanga shoRamatex moWindhoek, natango oye a ya noshishani shondjudo yoWBO International Lightweight. Okudja petameko ledingonoko eti-3,  okwa denga nawa eengonyo da ukilila molutu nokomutwe womukondjifi waye omuArgenitna ou a li moudju wokushuna konima neengonyo.

Hitman omunanghono,  peemhito dimwe okwa denga nonyanya Gonzales. Ou a li nale noshishani shounyakwa woLightweight mounjuni okwa yandja eengonyo da shoneka neke lokolulyo komukondjifi waye mokati kokapale.   Okufika pedingonoko eti-6 neti-7, Hitman woido  35 okwa li ta endelele unene nokwa li ta kondeke Gonzales, ta yepa eengonyo da umbwa moshinano shixupi ashike Hitman okwa li ta umbu eengonyo dipyu da shoneka ngolongo omushikishiva omuSouth Africa  Jaap van Nieuwenhuizen  ina dula vali kulididimikila  Gonzales ta dengwa nai  keengonyo dipyu daGonzales, okwa mweneka olwoodi konima yominute 2 okudja petameko ledingonoko eti-7.

 

Enyakwa loshivixa shoWBO Africa Welterweight Tyson Ushona , ola udaneka petameko kutya,  olina kudenga omukondjifi walo omuSouth Africa  Kaizer Mabuza a dengwa a fa omutameki mefiyafano loudano weengonyo. Tyson okwa longifa oikuko yaye  mokukwatela po oshishani shaye shondjudo yoWelterweight nopehe na omukondjifi. Mokukufa ombinga molwoodi eli la pewa oshipalanyole “Road to World Titles” wa danaukilwa moshinyanga shoRamatex , Tyson okwa Tameka  nonyati ta umbu eengonyo  da shoneka  omukondjifi waye Mabuza ina mona omhito  okuumba eengonyo da shila.

Nande Mabuza  omudengingonyo omunanghono shito, Tyson okwa tana omuSouth Africa ou  eshi a twikila kuumba eengonyo diwa  neke lokolumosho. Tyson oha endelele mokulongifa omukalo waye e shii kuhenuka ha umbu eengonyo diwa da ngwangwanifa Mabuza, naashi va ka fika poshikako shaxuuninwa, Mabuza okwa fika ko a kanifa omhepo yefiyafano,  eshi Tyson a twikila nokudenga eengonyo da shoneka moutu nokomutwe.

Mefiyafano loudano ukwao, Vikapita ‘Beast Master’ Meroro  okwa denga omukondjifi waye Pascal Ndomba  omuTanzania medingonoko eti-2 eshi e mu denga ongonyo imwe nopedu. Natango oye e na oshishani shoWBO Africa  Cruiseweight . Meroro omunanghono okwa denga  a diinina Ndomba  komutwe nomolutu a nongonyo yaHalulyo, tashi  handula omuTanzania  ashike nande a handuka ina pondola  sha , okwa ka dengwa eengonyo da shoneka fiyo a  xulila medingonoko eti-2.


KuOtniel Hembapu

LEAVE A REPLY

Please enter your comment!
Please enter your name here