Ezimo lyandje olya za peni

0
483

Kundana ota kala noku ngonga oshikalimo shembo:“Where Others Wavered, The Autobiography of
Sam Nujoma oshiwike kehe.”Ndika otali ndjokonona olweendonkalamwenyo lwOmukokoliperesidende na
He yoshigwana sha Namibia.Lesha engongo lyotango kombinga yembo ndi ngaashi tali landula.

 

Tatekulu kezimo lyoomeme, Kondombolo ka Kambulua okwa putukile mUukwambi pethimbo lyOmukwaniilwa, Nujoma ua Heelu[wEelu ].Omukwaniilwa Nujoma Heelu okwa li a simanekwa moshitunda shUukwambi pethimbo ndyoka.Kondombolo okwa li omukwiita ofule nomunongo mokupanga niigwanga yuunamiti yopaushitwe. A li ena ontseyo yomaludhi gomidhi odhindji dhimwe dhomudho hadhi aludha omavu noshowo okupanga mboka ya lika komayoka mwa kwatelwa ndyoka lyontoka. Okwa li omukwiita ofule ye ishewe oku na ondapo .Uufule okwe wu ulike pethimbo lyiita ya li pokati kaaPutu naaMbadja muumbugantu wAngola sho a li gumwe gwomaakwiita mboka ya li ya tumwa kOmukwaniilwa gwa Ngandjera ya ka popile Omukwaniilwa Shitekela sha Hiudulu.

Aakwiita mbaka ya li ya homata omagonga nuutati oya kondjitha omuPutu nongeyi oye mu keelele opo kaakutheko oshitopolwa sha Namibia, oshoka ngiika okwa li hayo andola uumbangalantu wa Namibia otashi vulika wa ka ninga oshitopolwa shaAngola.Kondombolo miita mbyoka okwa dhipaga omukwiita gwomuPutu negonga noku yugako ondjembo ndjoka a li eetelele kOngandjera. Okwa li a talika gumwe gwomomapenda moshitunda sha

Ngandjera naashika oshemu pethitha iimuna oyindji kOmukwaniilwa gwaNgandjera.Ongo’matyona onda li nduuvite uuntsa mokuvalelwa mezimo ndika lyasimana.
Aakuluntu yandje ngaashika wo Tatekulu nomapipi ngoka geya tetekela oya valelwa moshitunda shUukwambi, yavalwa momazimo gaawa yaamoka. Tate o Utoni Daniel Nujoma, Nujoma ua Mutshimba gua Kandenge ka Negumbo lya Koongoti, mbaka oyo oohekulu. Yo ayehe mbaka omaluvalo gaawa yUukwambi, Tate okwa ka shashwa Daniel Utoni Nujoma. Omahokololo guuyuni wonale otaga ti aakwaniilwa yetu oya ka kongelwe komahala gokokule , hoka kwa li kwa tumwa oontumwa, ndhoka olundji dha kwata omimvo okumona omuwiliki omupe, mokati kaantu mboka yali haya popi elaka ngaashi lyetu.
Omukwaniilwa omupe ngoka oha ziwako naye, noku tulwa a kale mokati kaakiintu aawanawa mboka ya hogololwa mokati kezimo lyaaKwambi.Omuulikwa kwaniilwa ngoka ohi ilongo elaka okuza kuyo opo ihe ta langekwa oku ninga omukwaniilwa. Pethimbo aakuluntu yandje taya putuka aavalwa aagundjuka yomezimo lyaawa oya li aluhe muudhigu woku dhipagwa oshoka olundji oya li ya dheulwa okugamena Ombala yOmukwaniilwa, naashika osheya ningi omandangalati mondjila yaawa yalwe mboka wo ya li ngiika nehalo lyokulala oshilongo.

Pethimbo elela lyuunona waakuluntu yandje Omukwaniilwa okwa mana oondjenda nokonima, shoka sha landulako osho ehilathano mokati kezimo lyaawa kutya olye ena okulala oshilongo. Onkene Tate naakuluntu ye oya li ya tuminwa kOngandjera oku yanda omahilathano melalo lyoshilongo.Shika osha ningwa woo kezimo lyoomeme ano kooKondombolo.Nando Tate a zi moshitunda shaandjawo, kOngandjera okwa kala a simanekwa molwashoka okwa za mezimo lyaawa, na okwa putudhilwa mezimo lyaawa ya Ngandjera, nokwa li a pewa oshinakugwanithwa shokulitha oonkambe dhomukwaniilwa, nolundji okwa li edhilitha eli kohambo yi li kokule nomagumbo hoka kwa li kuna uulithilo wuli nawa.

Mokulitha ngaaka Tate okwa putuka naayelele nenge naaKwankala mboka ye mu longo uunongo owindji ngaashi mboka wo teleka uuzigo mboka wa hawu tulwa kiikuti yaakongo yiiyamakuti. Okwa li woo iilongo omaludhi agehe gomayoka nokutseya kutya ogeni gena uuzigo naangoka gaana uuzigo noshowo ngoka haga liwa ngaashi ombome nonkene hayi telekwa.Pethimbo ndyoka Tate okwa li omukongo olundji ha ka konga iiyamakuti ngaashi ombahe noshowo ongalangombe. Omanga a li omumati, kali ha kayile onkambe ngele yeli kuukongo , ndele okwa li a ende koompadhi omanga omalenga gomukwaniilwa ogo ga londa oonkambe. Sho a koko okwa ka tameka okuya kuukongo a kayila onkambe nokwa kala ha soshimpwiyu kutya uuna aakongo ya tidha ombahe nenge ongalangombe, oyena okweendelela omanga iihwa moka mwa piti iiyamakuti mbyoka inaayi shuna kumwe opo mboka yaatsuwagulwe kuyo.Tate okwa li omutondoki dhingi, okwa li woo omuumbi guuta wa nangongo a pyokoka, okwa ningi woo ondjumbeta uuna a longitha ondjembo unene tuu shoka a putuka mombala moka iilongo okulongitha omatati agehe ngoka.

Meme naye ogwomezimo lyaawa, oye Mpingana Helvi Kondombolo ka Nakathingo ya Kaambulua ka Hango ya Ndjuluua ya Kiinge ka Mukongo gua Tshijala tsha Namundjanga gua Nambala.
Omadhina ngaka ogomezimo wo lyaawa yUukwambi, moshitopolwa shaMusati.Meme okwa ka shashwa Helvi Kondombolo. Ngame ongame osheeli shaamwameme nda valwa mesiku 12 lya May 1929 moshitunda shaNgandjera. Shilandula shandje Maria okwa mana oondjenda manga omushona, nguno okwa landulwa ku Frieda ngoka a li nameme sho a ningi omuselekadhi.
Otwa li omulongo nagumwe ndele ngashingeyi otulipo ashike yahamano, aalumentu yatatu, Ngame, Hiskia na Noah oshowo aakiintu yatatu, Frieda, Sofia na Julia. Yatano yetu oya ka lala nale.
Moku putuka ongo sheeli shaandjetu onda li nda kwatha nokusiloshimpwiyu aamwameme ayehe. Yamwe ndeya humbata nokuli kombunda yandje omathimbo gamwe omanga yalwe nde ya kwata mokwaako. Shika osha li sha yolitha ndje kuumatyona uukwetu , mboka wa kala nokupula kutya omolwashike ndina okuhumbata aanona kombunda ndafa omukadhona.

Shaashi ongame osheeli nonando ngame omumati kapwali ompito yimwe onda li ndina oku shininga.Shika osha kotodha ndje onkene onda kala handi ka litha komahala gokokule hoka itaandi tsakanene naasita ooyakwetu mboka haya yolo ndje. Ondiilongo oku kanda noshowo oku hika omahini opo kuze omagadhi. Iinakugwanithwa mbika oya longekidha ndje oku ithikamena ongo omuntu nomukwatelikomeho monakuyiwa.

LEAVE A REPLY

Please enter your comment!
Please enter your name here