Namibia ota ka dhana na Zambia, SA ota taalele Seychelles muudhano wo COSAFA womanyakwa kohi yomimvo-20

0
200

WINDHOEK –Namibia okwa pewa oshilonga oshidhigu ongaashoka shokweenda kombanda yomeya sho a tulwa mongundu yuudhano wetanga lyokoompadhi niilongo iinankondo ngaashi South Africa na Zambia oshowo Seychelles.Shika osha ningwa konima yomahogololo goospana ndhoka tadhi ka kuthombinga muudhano womanyakwa wa COSAFA waadhani yo kohi yomimvo 20.

Uudhano mbuka owa thanekwa tau ka dhanenwa moMaseru na Mafeteng moLesotho mu Desemba nuumvo.

Namibia niilongo mbyoka iikwawo itatu oye li mongundu ya C.South Africa oye enyakwa lyongashingeyi lyekopi lyuudhano mbuka, omanga Zambia oshilongo shoka konyala sha sindana ekopi ndika omalweetho geli lwopomulongo.
Shika oshikando shotango uudhano mbuka tau dhanwa konima sho wa li inaau ningwa omumvo 2012 molwashoka COSAFA okwa li iipyakidhila nelongekidho lyuudhano wetanga lyokoompadhi moshitopolwa oshitihamano shuudhano moAfrica.

Muudhano wotango Namibia ota tsakanene na Zambia ngoka a sindana uudhano mbuka olundji okuza tuu nkene wa dhikilwepo omimvo dha pita.South Africa ngoka oye ewetike tashi vulika a ka sindanepo ishewe uudhano mbuka ota ka dhana tango na Seychelles. Lesotho ngoka oye ta edhilile uudhano mbuka ota dhana mongundu yi na Kenya, uuntuntu wa Comoros,noshowo Mauritius mongundu ya A.
Omanga mongundu ya B omuna Angola, Mozambique na Madagscar.
Ye Botswana , Zimbabwe na Swaziland otaya ka kondjithathana mongundu ya D.

Uudhano otau dhanwa molupe lwoliha sho kehe oshilongo, kehe mongundu shina okudhana niikwawo ayihe mongundu ndjoka nokumona iitsa ngele sha sindana nenge sha dhana shithike pamwe. Oshilongo shoka sha mono iitsa oyindji osho tashi ka ya kedhingoloko lya landulako.
Mongundu ya B na D moka muna ashike iilongo itatu kehe mbaka otaya ka kondjithathana , sho ospana ndhoka dhili pombanda tadhi kadhana naandhoka dhili puutiyali mongundu onkwawo.
Uudhano otau ka dhanenwa moMaseru na Mafeteng moLesotho pokati komasiku 3 sigo 14 ga Desemba nuumvo.
Aadhani mboka taya ka kuthombinga oomboka ashike ya valwa okuza mu Januari 1994.

Omudheuli gwospana yaagundjuka mbaka gwa Namibia ota ka tseyithwa mbala kutya olye pahapu dha Amushangandjayi gwa Namibia Football Association, Barry Rukoro.


Ku Otniel Hembapu

LEAVE A REPLY

Please enter your comment!
Please enter your name here