Oliha ya Namibia yopombanda ota yi tameke kongulohi nena

0
180

WINDHOEK – Ospana FNB Orlando Pirates otayi ka taalela ndjoka yo African Stars moku egulula ethimbo epe lyuudhano woliha ya MTC ndjika wo 2013/2014 . Oospana ndhika mbali otadhi kadhana uudhano wotango pokapale ketanga ka Sam Nujoma moKatutura ongulohi yetitano ndika.

Ospana ya FNB Orlando Pirates mewiliko lyomudheuli gwayo Ali “Mr Fix It” Akan oya li yuulukilwa komutse gwondjamba kospana ompe muudhano woliha ndjika yo Tura Magic pethimbo lyuudhano wekopi lyo Namibia Premier League.Oyendji oya li ya tegelela andola Pirates oye a sindanepo uudhano mboka.
Ndele shika inashi ningwa oshoka ospana ndjika hayi ithanwa wo nedhina Buccaneers oya umbwamo mekopi ndyoka kokaspana kanathangwa ko Tura Magic , hoka wo ke, ke shi pondola oku sindanapo ekopi lyuudhano mboka.Tura Magic, ospana tayi dhana olutiyali moliha yopombanda ndjoka ta yi tameke nena.

Akan, gumwe gwomaadheuli yaadhani yetanga lyokoompadhi a pyokoka ota ningi oonkambadhala opo ospana ye ndjika yina aadhani aagundjuka yi dhane nawa noku adha omasindano ogendji.Unene tuu oku shi talela monakuziwa sho ya kala ta yi shuna monima okuyeleka noospana oonkwawo oonene ngaashi Black Africa na African Stars.
Uudhano mbuka pokati koospana ndhika otawu kala owo etameko ku Akan mokutungulula Orlando Pirates , noku yi shuna pomuthika mpoka yi shiwikile shito kaayambidhidhi yayo.
“Ondina oshinamumwe shaadhani ya pyokoka noshowo mboka opo ya tameke uudhano naayehe oye na enota lyokusindana, naashika osha kumike ndje.Onkene ondina omukumo kutya oshikako shika shuudhano ota tu ka adha oshindji nonando katuna aadhani aanamadhina metanga lyetu. Oshikwawo okwaana aadhani aanamadhina hasho andola tashi tu tulitha omutse kepepe.Ospana ndjika oyo onene nethimbo, ongashingeyi opo yi tameke ishewe oku kondjitha oonkwawo ya manamo okusindana omakopi unene tuu ndyoka lyoliha yopombanda.”Akan te shi tumbula shuukilila.

Omaudhano galwe oongoka go Black Africa no Rundu Chiefs pokapale wo ka Sam Nujoma. Omanga palwe ospana yo Tigers ota yi ka pwakela no United Stars poRundu.
Pokapale kaKuisebmond mOmbaye ospana yo Eleven Arrows ota yi ka talelwapo ko Civics omanga ndjoka ya PC Blue Boys tayi palamene ndjoka yo Tura Magic ya Katutura, nuudhano mbuka okwa tegelelwa wu ka tsimike ontsi kombanda yefuta.Ospana yo Ramblers otayi edhileko kuudhano wesiku ndika sho tayi ka ngongola nokatanga yuukitha ombinga yaatalelipo okuza komunkulofuta yo LHU Blue Waters pokapale ka Sam Nujoma. Omaudhano agehe oga tegelelwa oku tameka potundi 16h00 komatango.
Ku Carlos Kambaekwa

LEAVE A REPLY

Please enter your comment!
Please enter your name here