Omulilo gwa hanagulapo iigandhi ine megumbo lya Mbwalala moNalukanga

0
202

OTAMANZI- Omukulupe Matias Mbwalala gwomimvo 92 naakwanezimo lye, oye li muupongo sho egumbo lye mwa kwatelwa iigandhi ye yiilya yi li ine lya hanagulwa po komulilo mEtitatu lya zi ko.

Oshiponga shomundilo osha holoka omanga ooyene yegumbo ye li kehugilo, yo ya thiga okambiga komwiha peziko. Egumbo lya tatekulu Mbwalala oli li momukunda oNalukanga moshikandjohogololo shaTamanzi mOngandjera na olya pilepo mokati komutenya lela.

Pauyelele wa gandjwa ku Kansela gwaTamanzi, Johannes Iiyambo, egumbo alihe olya lunguna po inapa hupa tuu nande osha mwa kwatelwa iigandhi mbyoka ya li meni lyegumbo.
“ Elago enene olili mpaka kutya yimwe yomiigandhi oya li yi li kondje yegumbo onkee mbyoka inayi gumwa nande okomulilo.” Kansela ta ti.
Nonando kapu na nande ogumwe a ehamekelwa moshiponga shika shomulilo, Kansela okwa ti omambo gaanasikola noshowo omaukwatya gawo gopashigwana oga pila mo.

“ Ombelewa yandje otayi ya kwathele nokuyapa uusila noshowo omweelelo okwiikwatha pethimbo ndika lyoluhepo, kombinga yiizalomwa katu na po tuu nando ekwatho onkee otu na okuninga omaindilo kombelewa onene moshitopolwa noshowo kombelewa yOmushigakano Omutiligane opo yi kwathele aakulupe mbaka,” Iiyambo ta ti.
Okwa ti ngashingeyi tatekulu Mbwalala naanegumbo lye yahetatu kaye na mpoka taya lala oya thigwa pomutenya, ashike ombelewa yaKansela otayi ningi onkambadhala, opo yi ya monene nando oyo otenda yokulala yopokathimbo.

Iiyambo okwa ti moshikandjohogololo she, ndika egumbo etiheyali momusholondondo gwomagumbo ngoka ga pya nuumvo.


KuLoide Jason

LEAVE A REPLY

Please enter your comment!
Please enter your name here