Ondudu ya ningila opolifi omatilifo opa undudu opo i ha kwatwepo andola kuvo

0
492

OMUTHIYA – Ovapolifi, ovatoolinghundana noshoyo ovakwashiwana vamwe ova talele oipwe noidila eshi ondudu oyo kwali ta i kwatwa po kopolifi ya kendabala oku ninga omatilifo nomambadameko opaundudu opo ngeno iha ye kodolongo.

Oshiningwanima eshi osha ningilwa momukunda Omalindi mOmuthiya meumbo la meme, Penehafo Timoteus oo kwali vati a idilila ondudu ei yomukwashiwana wa Angola oyo taku hokololwa kutya ka i na oufemba oku kala moNamibia.
Ota ku hokololwa kutya oshivike sha dja ko omulumenhu weedula 23 oo a dile kolukanda, Hochland Park moWindhoek, okwa lopotela opolifi kOmuthiya kutya vati okwa ehamekwa neenghono komutwe kondudu yedina, Nghitekanghedi Shoongeleni nomukwafeli waye Tasiza (27) eshi ve mu denga nokumufangaula komutwe.

Kakele komahepeko oo a ningilwa, omumati okwa lombwela yoo opolifi kutya vati koomeme Timoteus oku na omukainhu e na oulema womaulu, oo ha tetwa nomakatana efiku keshe ku Shoongeleni nomukwafeli waye, onga oshitopolwa shepango.
Omumati ta lombwele yoo opolifi kutya vati keumbo oko oku na vali okaana keedula heyali ke na eefindja keemhadi, no ha ka fengaafengifwa eemhadi dako poukainhu wa inakulu, naashi vati oshili yoo oshitukulwa shepango.
Omahokololo aa ma halula nomatilifi okwa etifa opo opolifi i ye pamwe nomumati kOmalindi, i ka kwalishipaleka omalundilo aa.
Konima ashike eshi opolifi ya fika meumbo la meme Timoteus oya tameka okupula Shoongeleni oufemba wokukala moshilongo. Shoongeleni okwa tameka oku ninga omawi a fa oinamwenyo, ta nhuka, ta hele, yee ta mbunyu, ta ifana ovakwamhungu.

Okudja opo okwa ya monduda imwe omo a aluka mo a djala oukafa voifitukuti i lili nakulili a humbata omaonga avali.
Okwa tameka vali oku twa Hamutwe waKafidi, ye te li ifana Tjipalanga, edina olo vati he li ifana ngee a di mo momhepo younhu a ye mwaayo yopaundudu.
“OTjipalanga ta popi, ileni! Ovalumenhu veya, ileni mupopilenge,” Shoongeleni ta ti.
Mokutwikila nomatilifo aa, Shoongeleni okwa tameka te li tile omeva, ye ta kwata oxuxwa ilaula, ta tameke oku i duda omalwenya ye ta ifana ovakwamhungu, ye ta twikile ngoo nokuninga omawi a fa oinamwenyo.
“Ame meumbo omu ita ndi dimo nena, ngeenge ota mu pula nge okamutwe ota mu handukifa nge ashike. Ame onde ya medu leni, handi velula ovanhu veni, paife omwa hala kukwata nge po… Valumenhu ileni mupopile nge, oTjipalanga, ovalumenhu veya…” Shoongeleni ta kaluluka.

Konima etanga lovapolifi, ola kwata po Shoongeleni, oo a twikila nokuva tilifa kutya, omaonga aye oku na oshidila no iha va kwatwa nande okulye.
Omumati ou a etifa opo Shoongeleni a ye konima yekumba ota ti okwa twalelwe kovakulunhu vaye keumbo la Timoteus omwedi wa djako shaashi okwa li e na oupyakadi wefindakano lomadilaadilo.
“Okwali handi longifa oingangamwifi (epangwe) ndee handi shi xulifa po eemwedi nhatu da pita. Eshi osha etela nge efindakano lomadilaadilo. Tate na memegona ova twala nge ku Tjipalanga, oo a ti na ndi kale po shaashi oha ndi i eemhwengu. Onda kala nda kalelwa ku memegona,” omumati ta hokolola.

Omumati ta ti, nande a fiwa ku xe meumbo omo mu na ondudu ka li eshi panda. Eshi osha etifa opo ngeno a fiye po eumbo olo oikando ivali noshititatu eshi pondola.
Oshikando shotete Shoongeleni nomukwafeli waye Matias ove mu kwata ndee tave pu pandekele momuti u li mepya nelyenge. Oshikando oshitivali omumati okwe shi pondola oku enda fiyo okopoplifi kOmuthiya oko a lopotela opolifi. Ashike eshi i na shi kwafa sha shaashi ooyinagona vavali ove mu ila ko kopolifi ndee ta ve mu shuna ko kondudu.
“Eshi ve uya kopolifi ova ti natu ye kOmalindi ndi ka tale ko oikutu yange, ndee eshi twa fika Nghitekwanghedi na Tasiza ova kwata nge ndee tava tameke oku dengange neengonyo voo tava fange nge komutwe, ndee ta va pandeke nge vali,” omumati ta hokolola.

Konima yomwedi, omumati okwa ka mona vali omhito yokulimangulala mo melyenge, mokati koufiku ndee ta ende fiyo okopolifi kOmuthiya.
Omumati, ta kwafelwa komumwaina kadona ova patululila Nghitekanghedi oshipofa shekwatepombabyona noshoyo shokuehameka nokunyeyepeka olutu.
Ashike konima yefimbo, oshibofa eshi okwe ke shi kufa mo, shaashi osha li shi na oku kwatela mo ooinagona ovo vemu ilile kopolifi ndee ta ve mu shunifa ku Shoongeleni nonghalo yekengelelo.
“Ita ndi dulu oku tuli fa memegona modolongo oshipofa oha ndi shi kufa mo ashike,” omumati ta ti.

No nande oshipofa sha kufwa mo, Omupolifi Omukulunhu mOmuthiya Paul Leo okwa lombwela Kundana kutya opolifi ya Namibia ita i efa Shoongeleni a shune kOmalindi, ndele ota i kemushunifa koAngola oko a dile.
Opolifi i na i dula oku kwashilipaleka omalundilo e nasha nokamatyona keedula heyali nomukainhu woshilema.

 

KuHelvy Shaanika

LEAVE A REPLY

Please enter your comment!
Please enter your name here