Oukadona vahapu moshitukulwa sha Hangwena va fiya po ofikola molwomateelelo

0
371

EENHANA Omuvalu woukadona veedula dinini elela, vamwe vena omido omulongo nane oha va i meemhalo inadi amenwa. Oshinima eshi osha etifa ehapupalo loufimba mokati koukadona ovo nosho yo etandavelo lomikifi yohoni moshitukulwa sha Hangwena.

Omapekaapeko a ningwa koshikundaneki Kundana kumwe novahongifikola noshoyo ovashivinawa mouhaku okwa ulike nokutya ovanyasha vamwe ohava i momilalo ina di amenwa. Shimwe vali ekonakono eli ola ulika nokutya ovakulunhu vounona ava, ina ve li longekida oku tumbula sha koiningwanima oyo, osheshi oshinima eshi kashi kundafanwa moitanaisho panghedi yovaWambo.
Oku ya meemhalo ina di amenwa mokati kovanyasha vopetameko moshitukulwa eshi, okwa tula omuvalu woukadona vena omateelelo pombada, nosho yo etandavelo lomikifi dohoni mokati kavo.Ovanailonga vouhaku moshipangelo shoshitukulwa mEenhana ova ti oku hena eshivo kombinga youndjolowele wopaidalifo mokati, kovanyasha ava osho shimwe shomo i eti yetandavelo loufimba mokati kavo.

Na vali moshitukulwa sha Hangwena omuna omhumbwe inene yeenhele douhaku oku yandja omayakulo kovanyasha nopehena omapulapulo mahapu.
Eshi osha didilikiwa shimwe shomo mbide oyo ta yi piyaaneke etulomoilonga le andjaneko lehongo loilyo yopaidalifo mokati kovanyasha ava.
Ekonakono eli ola koneke yo nhumbi ovanafikola vamwe va ningi oihakanwa yovashingi veetaxi noshoyo vovalumentu ve va dule meedula.
Ava ohava heka ounona voukadona nomaano mawa, opo va nangale navo pehena eameno lasha. Oukadona vamwe ohava yadje omalutu avo kovashingi veetaxi opo va kale tava twalelwa inaa va futa sha, unene tuu pefimbo lomafudo ofikola.

“Ovanafikola ovakainhu oha ve uya kufye, osheshi ova hala tu va twalele inaava futa sha”paendjovo da Paulus Amukwaya, omushingi wotaxi halongele mondjila pokati kEenhana-nOshikango.
“Ngenge onda twalele omunyasha ou , oku na ofuta sha pamukalo wokunangala naame, osheshi ngenge ina i shi ninga ye ota ka nangala na mu kwetu umwe, nde va tala ile te ke shi ninga nomunhu umwe elili, onghene naame ondina oku shi longa.” Amukwaya ta ti ngaho.
Omukwatakanifi pashitukulwa moipambele yokapangelo kovanyasha,Risto Mushongo okwa ti eshongo likwao olo eli, kutya ovanyasha kavena eshivo moshinima shomayakulo ena sha noilyo yopaidalifo.
Nomolwa shi ihava dulu oku ka konga omakwafo a tya ngaho ngeenge kave shishi kutya oko eli.
Okwa ti efamilia olo onhele omo oshinima eshi shomateelelo mokati kovanyasha shi na oku kundafanwa, ndele nee omfyuululwakalo inawu shi pitika.
Eshi osha etifa ovanyasha ava va ka konge ouyelele okupitila motelevision ile mo Internet.

Paimayalulo a yadjiwa koshikondo shouhaku mOhangwena oshitine shoukadona pomido dopokati 13-17 ova tameka nale okumona ounona.
Eeperesenda hanga 92 doukadona ovo va tameka eemhalo ove li mekwatafano lopaihole. Omudo waya oukadona 1 691 mOhangwena ova fiyapo ofikola eshi va ninga omateelelo, pa mayalulo opambelewa.
Eshi osha li sha fininike ombelewa yehongo moshitukulwa osho opo i edile eengulu domanongelo 58 omudo 2011, 57 momudo 2010 noshoyo 56 momudo 2009, sha ningwa osheshi eengudu odo ka da li novahongwa va henena okuhongwa ovo aveke.
Omukulunhu wOuhaku mOhangwena, John Hango, naye oku wete omuvalu womateelelo mokati kovanyasha wa hapupala, neeperesenda 25 mokati kaavo veli pomido 14 no17 osho yo eeperesenda 35 mokati kaavo vepupi lomido 19 oku yuka pombada.

Hango okwa ti omiyalu odo otadi ulike kutya eshongo olo ola kula, unene tuu eshi oiningwanima imwe yomateelelo iha i shiivifilwa eembelewa.
Oshinima eshi osha hapupala mokati kovanyasha vopehovelo moshitukulwa shaHangwena unene tuu komikunda , na ohashi nyonauna oudjolowele wohanana na ina.
Okwa ti ovanyasha vamwe eshi va ninga omateelelo ova kendabala oku a kufamo .
Pamavalulo oshikondo shouhaku mOhangwena oukadona omilongo 80 ova li veli kufa omadimo omudo 2012 fimbo neudo oiningwanima yoludi eli oya lopotwa yili omilongo 74 okudja mu Januari fiyo omu Auguste.
Omunawino moinima ya pamba oilyo yoludalo moUnited Nations Population Fund (UNFPA), Josephine Mwaetako okwa ti ounona vamwe ova tameke omilele veli pomido 14 osheshi oha va tale eekino domilele kotelevision, keengodi davo nosho yo okupitila meekompiuta.

Shikwao vali Mwaetako okwa ti osho eshunomonima momaihumbato ovakulunhu eshi omafimbo amwe tava holoka moifo eshi iha ve lididimikile meehombo davo ndele vati ohava vake mokunangala novanhu velili.
Efilima domoteevee nado yo odina etumwalaka tali etifa omahalo omilalo mokati kovanyasha.
“Oku hena ouyelele kombinga yekoko lovanyasha kombinga yoilyo yoludalo okwa twala vamwe moshiponga eshi va tameke oku li kongela ouyelele wapuka,” Mwaetako a ti.


Ku Clemence Tashaya

LEAVE A REPLY

Please enter your comment!
Please enter your name here