Aakalimo ha ya nu omeya gohanya

0
207

WINDHOEK – Aakalimo yamwe yomolukanda inaa lu yalulwa, lwedhina Thlabanelo oya thiminikwa konkalo oku longitha omeya ga luudha.Aakalimo molukanda nduka luli popepi nodama ya Goreangab, oha ya telekitha, oha ye giiyogitha, nomathimbo gamwe oha ya nu wo omeya ngoka. Oya ti shika oye shi ningi molwashoka  ka ye na aniwa mpoka taya adha omeya ga yela. Ishewe oopomba aniwa odhi ya li kokule, shoka tashi ya pula okweenda ookilemata dhili ntano nenge dhi vulepo oku ka teka omeya.

Eshongo enene oondyoka kutya omeya ngaka ta ga longithwa koshigwana shika ogo modama ya Goreangab ndjoka ya luudha nenge ya zigopala nokuli.

“Oha ya nu omeya ngoka omalupita molwashoka omeya ge li nawa oge ya li kokule’ osho amushanga gwewawa lyaagundjuka yo Swapo, Elijah Ngurare eshi koleke. Ngurare na amushanga gwewawa lyaagundjuka moshitopolwa sha Khomas, Paulus Emmanuel, oyo yamwe iilyo yewawa ndyoka ya yungile ontanda pondama ya Goreangab.Elalakano lyawo oku eta elunduluko opo omahala ngoka ha ga ithanwa gaashi gopaveta , ga ninge gopaveta, osho wo ngoka inaa ga yalulwa ga vule oku yalulwa ongo omahala goku kalwa ga longekidhwa.

Pauyele mboka Ngurare a pewa kaakalimo, okwa koleke kutya yamwe oha ya ka teka omeya gokunwa kolukanda lwa Havana.

“Aantu ota ya mono iihuna” Emmanuel ta ti. “Ka shi shi oshaawana oku shi mona”Ngurare ta gwedhako.Okwa fatulula wo kutya aakwashigwan mbaka oha yi ikwathele momasilu gomulonga moka noshowo mooshako dhoplastika, ndhoka hadhi ekelwahi uusiku.

Sho twa talelepo ehala ndyoka, aakalimo oya koleke wo ehokololo ndyoka kutya yamwe oha ya longitha omeya gohanya okutelekitha, molwashoka oopomba dhaangoka omawanawa odhi li pale.Yamwe oha ya ka teka kolukanda lwaHavana, yo ya kwawo ta ya ende ookilometa dhi vule pu hamano oku ka konga omeya ga yogoka.

“Opo handi teke omeya gokunwa noku telekitha, oshoka hoka kuna omeya ga yogoka oko kule noonkondo.Omeya ngaka ina ga yela.Jason Shaanika omukalimo gwomo Thlabanelo ta ti.Omukalimo omukwaw ngoka a li ta yogo iizalomwa ye podama okwa zimine kutya ye oha longitha omeya ngoka oku opaleka iikutu no kwiiyoga. Omanga ngoka gokunwa ohe ga mono mo ku tuma omushiinda she eke mu tekele.

Emmanuel okwa ti aakalimo yaampoka oyi ilongekidha oku futa omeya gawo, na oya tegelela ashike uuna eyakulo ndyoka tali thiki kuyo.

Kansela gwoshikandjohogololo sha Samora Machel, Absai Angula, sho a pulwa kombinga yaashika okwa ti ite shi itaale kutya aayakulwa ye oha ya ka teka omeya ga yogoka koHavana , a ti omalukanda ngoka gaali oge nyaathane kokule.

Angula okwa ti “Aantu yamwe moshikandjohogololo shoka oye na omeya, yo mboka yaa ga na oha ya ka teka momagumbo gopopepi moshikandjohogololo shoka.

 

Ngurare na Emmanuel oya ulike wo kutya aailongi yamwe yoko Unam na palwe mboka ha ya zi molukanda nenge moshikandjohogololo shoka oha ya zimbuka unene uusiku yo ishewe oha ya helulilwa kokule nomagumbo gawo. Ngurare okwa ti oompumbwe dhaantu yetu otadhi vulu oku gwanithwapo, oshoka shoka ya pumbwa osho ashike oompumbwe dha kehe esiku.

Okwa ti oompumwbe dhawo odhina oku gwanithwapo onkene ina dhi ethiwa dhi tegelele, oshoka ndhika ota dhi yelekwa nomuntu a sa kondje, iha vulu oku tgelela ndele nguka oha tondoka mbala./

Aagundjuka oya uvaneke ta ya ka gandja otenga yomeya koshigwana shomolukanda ndoka.

Ndele shika osho oshinakugwanithwa shepangelo oku pa aantu mbaka omeya noshowo eyakulo lyeyogopeko.

 

“Ka li shi eiyuvo ewanawa. Ishewe omuntu ito vulu oku kotha nawa ngele owa mono aantu mbaka nkene ha ya hupu esiku kehe.

“Omapopyo igidho ita ga gandja iikulya.Nongele epopyo lyetu kehe esiku kutya aagundjuka oyo onakuyiwa ya Namibia, nena shika nashi popiwe noshili yoyene.’a ti oonzo ndhoka tadhi kwatha aagundjuka opo yi ilongekidhile ekwatelokomeho ongula ya ye dhi pewe nena.

Shika oshikando oshitiyali aagundjuka moSwapo taya lala koontuni dha Goreangab oku lola onkalo yaakalimo momalukanda inaa ga yalulwa. Ngurare okwa ti “Ina tu ya ashike kaantu mbaka pethimbo lyomahogololo, a gwedha ko kutya oyendji yomwaambaka oyo aahogololi yo Swapo sho ta yi wilike nena,onkene yo oya talelepo oshigwana shoka opo shi ya pe omakemo gasho.

Mayor gwa Venduka, Agnes Kafula, pamwe nookansela yamwe mewiliko  lyoshilando  oya li oshitopolwa shetalelopo ndika nonando kape shiwike ngele mboka oya li woo ya lala montanda koontuni dhodama.
Ku Alvine Kapitako

LEAVE A REPLY

Please enter your comment!
Please enter your name here