Iilonga yokomake ya Kay Cowley osho ya thiki pehulilo

0
206

WINDHOEK – Euliko lyiilonga yokomake yaKay Cowley hayi  ithanwa “Earth, Love and Crazy” shono tashiti “evi, ohole nuuyanankwengu’ mbyono ya ningi ethimbo tayi ulikwa kehangano lyo Namibia Business Innovation Center (NBIC) mondunda yoInnovation Village, osho ya thiki pehulilo no tayi kapwa ku ulikwa mu Kotoba 30.

Ndino olyali euliko lyiilonga yokomake etine, lya landula omaulikilo gehangano olyo tuu ndika iikando itatu yapiti geendele nawa noga ningilwe ku Gerdis Stadherr, Ndasuunje “Papa” Shikongeni na John Sampson.  Momaulikilo gatya ngeyi omo moka omwaalu omunene gwomapaindilo gwamono egumbo epe.

Iilonga mbino iipe yokomake ya Kay oya kwatelamo omapaindo gali ko nale naangono opo ga ndulukwa. Ehuku lyiilonga ya Kay otali tsu omuthindo kiilonga yokupainditha omahooli, mbyono ya talikako ongo okupainda kopaushitwe, no tayi ulike omafano genasha nomaupyakadhi gonkalathano, unene tuu omashongo gataalela aakiintu aaNamibia naanona. Omafano gamwe giilonga yomugundjuka nguno otaga ulike aakiintu yomiihwa yaliko nale, omanga omakwawo taga ulike uuwanawa wuushitwe nosho woo oonzo dheshito.

 

Iilonga yokomake oyo yili ehuku lyii ulikwa po Namibia Business Innovation Centre. “Okuza ngaa esiku lyotango twa tameka nomaulikilo getu ngano mpano, otwa kala aluhe noku ulika aanamagano oyendji ya yoolokathana yiilonga mbika yiikaha, monkambadhala yokutsa omukumo oongeshefa dhilwe, iiputudhilo naakuthimbinga woo yalwe oku kutha ombinga okupendulapo uungomba wopankalamwenyo”, Omunambelewa mewiliko lyo NBIC Zodidi Gaseb ta ti ngaaka.

Gaseb okwa gwedha ko woo kutya nonando aauliki aathaneki yetu moku kwatathana no NBIC ye tu uvithako omatumwalaka taga monika miilonga yawo ngono yo ya hala okugandja moshigwana, otashi vulika oshigwana kaashi ga uveko lela nenge pamwe inaashi itulamo moku kuthako omatumwalaka ogo tuu ngoka.

Nonando ongaaka, Kay Cowley okwa wina omapapa ogendji momaulikilo giipindi yiilonga yokomake, moshilongo nosho woo puushiinda poSouth Africa. Cowley ngono eli woo omulongi gwiilonga yiikaha koUniversiti yaNamibia (UNAM) okuna woo ompito ombwanawa okutaambakanitha ontseyo ndjika moshigwana, tashi pitile maanasikola mboka ta longo koshiputudhilo hoka, mbono yena ehalo okuuvako iilonga yiikaha, ongele oye mwene nenge ya yalwe.


Ku Pinehas Nakaziko

LEAVE A REPLY

Please enter your comment!
Please enter your name here