Okaana Dulikeni natango otaka kondjo

1
363

ONGWEDIVA – Okaana Dulikeni Mwanyekange, oko ka dalelwe kena omeva mahapu momutwe osho sha eta omutwe wako u kule neenghono, nghee ota ka ulike oupenda, nonande kanyika ounghundi.

Dr. Tshali Iithete, Omukulunhu wOshipangelo mOngwediva Medipark, oshipangelo osho she liyamba okutanda Dulikeni oshali, ota ti onghalo yokaana oko kena eedula nhatu paife ka i li lela nawa, ashike ita i limbilike.

Iithete ta ti nonande Dulikeni a tandelwe nale etando omo a kufwa omeva momutwe odula ya djako, okamunino oko kali ka tulwa opo ka pombemo omeva okafita, osho sha eta omeva a ongale natango momutwe.

Dulikeni okwa tambulululilwa moshipangelo shaMedipark, na Iithete otati onghalo yaye hayo naana.

“Keshi Dulikene ou tushi shito hakala  ahafa. Paife omunhu ou wete kutya okwa nyika ouvela, ashike oku li ngoo xwepo,” Iithete ta ti.

Iithete ta hokolola kutya etando olo kwali la ningwa odula yadjako ku Profesa Kazandi Kalangu, omundohotola a kula adja ko Belgium, ola endele nawa nokwali eshi pondola okupomba eelitela domeva 16 momutwe wa Dulikeni. Elalakano, okwali okuninga etando etivali opo omakipa omutwe oo a hangwa a kula no a  dja ponhele eshi omutwe wa fula, a ningwe nawa. Ashike konima okamunino oko kwa li a tulwa momutwe opo ka twikile okupomba nomeva oka fita, osho sha eta omeva opo a ongale, nomutwe ukule vali.

Iithete tati, Dulikeni okwali e na oku alulilwa koshipangelo, eshi kwa monika kutya omutwe owafa ta u kulu natango ashike ovalongi voundjolowele vepangelo ovo have mu talele po keumbo i na va yandja omayele ku ina opo a shunwe koMedipark.

Mongaha, oshipangelo shaMedipark, otashi ningulula vali etando oku kufamo omeva momutwe wokaana aka, nelalakano opo vakashune omakipa peenhele ngaashi sha kala sha dilaadilwa. Iithete ta ti oshikando eshi, Profesa Kalangu ota kwafelwa ku Dr. Imannuel Thobejane.

“Vamwe ota va pula kutya omolwashike hatu kondjele omwenyo wokaana aka. Omolwashike itatu ka efa ashike? Ashike ngee owa tale, Dulikeni naye mwene oku na oupenda, nokwa tokola a kale nomwenyo. Omolwashike mbela ita tu mukwafele? Efimbo olile ashike Dulikeni opo eli ena omwenyo.

“Ounona ovo hava dalwa ve na ounghundi woludi eli iha va kala nomwenyo efimbo lile ngee i nava mona ekwafo diva, ashike Dilikeni oko eli,” Iithete ta ti.

Profesa Kalangu okwa tile i na mona nale okaana kena ounghundi womeva momutwe ka kala nomwenyo fiyo omutwe ta u kulu ndee ta u fiki puwa Dulikeni. Tati oshiningwanima shokaana aka oshikumwifalonga.
KuHelvy Shaanika

1 COMMENT

LEAVE A REPLY

Please enter your comment!
Please enter your name here