Okamatyona ka kwatwa onkonga

0
180

WINDHOEK- Opolisi ya Namibia yoshikondo shegameno lyomeme naanona  oya ti yo ina yi tinda oku kwatha aatekuli yomumatyona ngoka a kwatwa koonkondo moKatutura omasiku gapiti. Etindo ndika olya landula sho aatekuli yomutyona ngoka ya li ya lopota oshiningwanima sho poombelewa dhoshitopolwa shegameno lyaakiintu naanona moVenduka. Ndele aniwa omunambelewa gwopolisi okwa  tindi okupitika mboka ya gandje omahokololo, oshoka aniwa naku longela omunona ngoka omuyonena keshiwike.

Oshiningwanima shika osha ningwa omwedhi nguka sho aanona yaali ya li ta ya dhana pomudhingoloko gwegumbo lyaandjawo poSingela moKatutura.Yinakulu yomumatyona ngoka a kwatwa koonkondo okwa li a ka vululukwapo kashona esiku oshinima shoka sha ningwa.

Konima sho a penduka komatango gesiku ndyoka okwa li a hala oku yoga omutekulu gwe ndele sho emu itha opo eyee eke mu yoge ngoka ina itaala, ye ishewe ka li ta monika kutya okwa gama peni. “Onda mono kutya okwa toka onkene ondi na oku mu ithana opo ndi mu yoge”osho omukulupe Elisee Lukas a ti. Okwa ithana noku ithana ndele omutekulu gwe ina itaala. Pethimbo ndyoka opo nee kuume komutekulu gwe a hokolola shoka sha ningwapo. A ti manga ya li ta ya ende yuuka kegumbo omulumentu omule gwoshipa oshi yedhi a li ena oshilalo kolupanda lwokolumoho okwa kwata kuume ke noku mu kookololela momulonga. Omumatyona ngoka sho oshinima shoka shaningwa ka li eke shi tseyithila mbala aakuluntu ya kuume ke oshoka ngiika okwa li a tila kwaashoka a mono, okwa yi ashike kegumbo eta mwena osho Lukas a hokolola.

Sho yuuvu ehokololo ndyoka Lukas naashiinda oya yi molukongo oku konga omunona ngoka ndele ina ye mu mona ,opo ihe oya ka konga ekwatho kopolisi. Oya tameke posasiona oshona ndjoka yili pOsingela, ndjoka oye ya tumu ya ka kuge ekwatho kwaandjoka ya Katutura. Popolisi ya Katutura oya udhithilwa oofoloma opo omunoona ngoka a vule oku tseyithwa kutya okwa kana no ke wetike. Olwindj omatseyitho gaantu ya kana oha ga tulwa kotiivii yoNBC. Aanegumbo noshowo aashiinda sho ya galuka kopolisi, opo nee oya lombwelwa kutya omumatyona okwa monika, aadhika pomarobota ngoka ge li popepi nosasiona yomahooli geli poSingela mpoka. Omumatyona okwa hokolola kutya omulumentu ngoka emu koololele mesilu lyomulonga okwe mu longele iilonga iiwinayi oshoka okwa tula uulumentu we momatako ge, nopethimbo ndyoka okwa li ena uuwehame. Ehokololo ndyoka okwe li pe omusamane Lukas omanga nguka a li ta kambadhala ando opo e mu yoge, omumatyona okwa li iindile yinakulu Lukas opo kee mu gume komatako oshoka okwa li ta ku ehama. Konima sho aanegumbo ya konakona omumatyona nawa oya tondokele koshipangelo noshowo kopolisi yokugamena aakiintu naanona ya ka hokolole oshinima shoka. Omunambelewa ngoka aadhika po okwa li aniwa a tindi oku kutha ehokololo ndyoka molwashoka aniwa naku longa omuyonena ke shiwike. Opolisi konima sho ya ka pulwa kutya omolwashike, omunambelewa omukuluntu gwayo , Inspekta Zimmer okwa ti osha fa pwa li okwaa uvathana nawa, hoka oko kwa fala opo ngiika omunambelewa a kale inaa pa aantu mboka ompito opo ya gandje ehokololo lyawo noshowo oku patulula oshipotha. Oshinima shika osha ka potokononwa nomahokololo oga shangwa kopolisi.

Omumatyona gwomimvo hamano pamwe naanegumbo lye oya yugwa enyanyu lyawo shoka ya li  netegameno lyelago noshowo lye nyanyu sho ya li melongekidho lyoku dhimbulwa evalo lye , ndele omalongekidho oga yonagulwa koshiningwanima shoka .

Aanegumbo lyomumatyona ngoka oya kala  yena omaipulo kutya olye eshi ningi nosha ningilwa shike pethimbo ndyoka, New Era a li eya talelepo mesiku lyevalo lyomumatyona ngoka.Elisee Lukas yinakulu yomunona ngoka okwa li natango mepiyagano okwiipula koshinima shoka sha ningilwa momulonga poSingela moKatutura.

Omumatyona ngoka okwa gumwa koshinima shoka oshoka okwa lombwele yinakulu opo a kale a kotoka oshoka otashi vulika pamwe omuntu ngoka eli pehala lyontumba a hala natango oku mu ehameka.

Omumatyona okwa li a longekidhilwa iikulya okudhimbulukwa evalo lye nokwa imbilwa omaimbilo oku mu halela esiku lyevalo lina elago, nelalakano opo pamwe a dhimbwe oshiningwanima shoka. Evalo lye olya liko metitano lyomasiku 18 ga Kotoba nuumvo.


KuAlvine Kapitako

LEAVE A REPLY

Please enter your comment!
Please enter your name here