Ondudu Nghiteka i na i shunifwa natango koAngola

0
474

ONGWEDIVA – Ondudu oyo ya kwatelwe po oshivike sha djako molwa oku kala moNamibia ihena oufemba, nomolwa omatilifo oo ya ningila opolifi, i na shunifwa natango koshilongo shavo.

Komufala wopedu mOpolifi yomOmoshitukulwa shaShikoto Naomi Katjiua, okwa lombwela Kundana kutya Nghitekanghedi Shoongeleni nomukwafeli waye Matias Tasiza weedula 27, ove li natango konima yekumba modolongo yaNdangwa omo veli momake ovatonateli vokeengaba.

Shoongeleni, oo ha ifanwa Nghiteka, nokwa shivika yoo nawa nedina laye lopaundudu Tjipalanga noshinghumbi shaye Tasiza, ova kwatelwe po oshivike sha djako, va hangwa momukunda Omalindi mOmuthiya, meumbo lameme Penehafo Timoteus omo kwali hava hakulile.

Ovalumenhu ava vavali ovakwatelwe po konima eshi omumati weedula 23 oo a dile kolukanda Hochland Park moWindhoek, a lopotela opolifi kOmuthiya kutya okwa ehamekwa neenghono kumotwe ku Shoongeleni na Tasiza  eshi ve mu denga nokumufangaula.

Omumati okwa lombwela opolifi kutya omafimbo kemale, eshi ovakulunhu vaye ve mutwalele keumbo la meme Timoteus, opo a ka hakulwe ku Shoongeleni, omolwa oupayakadi wefindakano lomadilaadilo.

“Okwali handi longifa oingangamwifi (epangwe) ndee handi shi xulifa po eemwedi nhatu da pita. Eshi osha etela nge efindakano lomadilaadilo. Tate na memegona ova twala nge ku Tjipalanga, oo a ti na ndi kale po shaashi oha ndi i eemhwengu. Nonda kala nee nda kalelwa ku memegona,” omumati ta hokolola.

Omumati vati okwa kala nee ta hepekwa, a pandekwa nelyenge momuti uli mepya, ta dengwa ye ta fangwa kovalumenhu ava vavali.

Omumati okwa lombwela yoo opolifi kutya koomeme Timoteus oku na omukainhu e na oulema womaulu, oo ha tetwa nomakatana efiku keshe ku Shoongeleni, onga oshitukulwa shepango. Ta hokolola yoo kutya keumbo oko oku na vali okaana keedula heyali, ke na eefindja keemhadi, odo hadi fengaafengifwa poukainhu wa inakulu, naashi vati oshili yoo oshitukulwa shepango.

Omahokololo aa ma halula nomatilifi okwa etifa opo opolifi i ye pamwe nomumati kOmalindi, i ka kwalishipaleka omalundilo aa.

Mokupulwaapulwa kopolifi, namunganga ou okwa tameka oku ningila opolifi omatilifo opaundudu, ta ningi omawi a fa oinamwenyo, tanhuka, ta hele, yee ta mbunyu, tatu Hamutwe waKafidi ta ifana eemhepo dovakwamhungu.

” OTjipalanga ta popi, ileni! Ovalumenhu veya, ileni mupopilenge… Ame meumbo omu ita ndi dimo nena. Ngeenge ota mu pula nge okamutwe ota mu handukifa nge ashike. Ame onde ya medu leni, handi velula ovanhu veni, ndee paife omwa hala kukwata nge po… Valumenhu ileni mupopile nge, oTjipalanga, ovalumenhu veya…” Shoongeleni ta kaluka.

Omatilifo, noushenu ovo a ninga i na va halula opolifi oyo konima yemutula moipandeko.

Opolifi i na i dula oku kwashilipaleka omalundilo e nasha nokamatyona keedula heyali nomukainhu woshilema. Ashike ovatoolinghundana ova mona oipute komatudji nomeenhafaulu domukainhu, oyo ta i monika yafa ya tetwa noshiima shi na eemhemo.

“Popya oshili Mukwaudimbe, lombwela ovanhu kutya ou na oipute komaulu, ya ninga ko eshi to likoko shaashi ihodulu oku enda,” omukainhu oo taku hokololwa kutya ohonda ya Shoongeleni ta lombwele omukainhu ou e na oulema, oo kwali ta pulwapulwa kovatoolinghundana.

Komishina wopedu oo a lombwela Kundana kutya Shoongeleni na Tasiza ova twalelwe kodolongo kOndangwa momafiku Oktoba 14 okudilila kOmuthiya, okwa kwashilipaleka kutya omalongekido oku shunifa namunganga ou noshinghumbi shaye koAngola oku va dile, oku li metifa.

 

KuHelvy Shaanika

LEAVE A REPLY

Please enter your comment!
Please enter your name here