Aagundjuka yo NYC ya ninga ondjambi kUukwiyu

0
240

ONGWEDIVA-Omukuluntu gwoshikandjohogololo shUukwiyu-Uushona Kansela Andreas Amundjindi okwa tumbaleke aagundjuka yIilonga yOpashigwana [National Youth Service (NYSs)] mOndangwa sho ya tondokele kondjambi ye ndjoka ahiya opo a yambidhidhwe okufula  omukanka gwomeya ngoka gwakwata oshinano shuule wookilometa 16.

Omolwonkalo yoshikukuta shoka tashi dhenge Namibia alihe, Amundjindi nosheendo she oya tokola opo yi iyambe ya fule omukanka gwawo gwomeya ngoka gwaza kOmukandu sigo Okoshituntu.

Kansela okwa lombwela Kundana ta ti, aagundjuka mbaka oya li aanyanyudhi oshoka okwa li yi itulamo noonkondo no ya fulu  oshinano oshile nonando okwa li kwa kukuta.

“Ngele aanona yetu otaa yi momadheulo go pashigwana ngaashi aagundjuka mbaka yo kOndangwa oshilongo shetu otashi humu komesho oshoka iilonga yawo  oya yooloka kwaambi yaagundjuka mboka inaa ya enda momadheulo,” Kansela ta ti.

Okwa ti nonando aagundjuka oya li ya nyanyudha, aanamukunda nayo woo oya kwathela noku eeta oontaku noshowo iikulya mwa kwatela onyama yongombe ndjoka yali ya iyambelwa komunamukunda gumwe David Kiimba.

“Otatu kumike aakwashigwana opo yi itulemo miilonga oshoka omukanka nguka ogwa simana uunene tuu komagumbo noshowo kiinamwenyo,”Amundjindi a ti.

Amundjindi okwa ti wo ngashingeyi aanamukunda ota ya ka ninga ontanda pomukanka na ota kumike wo opo mboka ya za pomukunda ngoka ye li kuushimba ya ambidhidhe naashoka ye na po opo omukanka gu pwe mbala.
KuLoide Jason

LEAVE A REPLY

Please enter your comment!
Please enter your name here