Eipumomumwe lyaantu niiyamakuti tali kundathanwa

0
236

WINDHOEK  – Opwa tamekwa ishewe oonkundathana kombinga yonkalo pokati kaantu niiyamakuti. Oonkundathana odha landula iiningwanima ya yooloka miitopolwa sha Kavango no sha Zambezi moka aantu ya dhipagwa kiinamwenyo yomokuti.Omaipulo nkene tapa ningwa niikwakuti mbika oga holoka unene sha landula eso lyomunona gwomimvo hetatu ngoka a li mondjila oku ya kenongelo. Omunona ngoka okwa kwatwa kongandu moshimpanalonga Nantungu , shomulonga gwa Zambezi.

Aantu niinamwenyo oha ya longitha oonzo dhuushitwe ndhika ethimbo limwe. Oshiningwanima shika osheeta omwaalu gwaakalimo ya dhipagwa kiilikama yomomeya paantu yatano nuumvo.Omaso gaantu yaali oga lopotwa moshitopolwa sha Zambezi omanga gaantu yatatu oga tseyithwa moshitopolwa shaKavango.  Omumvo gwayi moshitopolwa sha Zambezi inamu sa omuntu kiiponga yeetwa koongandu, omanga moshitopolwa shaKavango omwa li mwa si aantu yaheyali sho ya ponokelwa noku lika koongandu.Aakalimo momudhingoloko gwa Nantungu oye li konyala omathele gaali na oyi ikwatelela momulonga ngoka, ongo onzo yomeya gokunwa,onzo yoohi,yomeya gokwoopaleka iiyogomwa noshowo omeya goku tekela iimeno yawo.

Kansela gwoshikandjohogololo sha Kabbe , Raphael Mbala okwa gandja ombedhi kUuministeli wOmudhingoloko nOmatalelopo aniwa sho aanambelewa yawo inaa ya pulakena omakemo gaanamukunda sho ya indile opo omwaalu gwoongandu momudhingoloko gu shonopekwe.

“Oongandu ndhika odha gamenwa nongashingeyi  otadhi dhipaga aantu. Oshikondo shOmudhingoloko oshe tu lombwele kutya otse tweya oku hinda iinamwenyo mbika sho twa tula popepi nomulonga.Otatu yi hindi ngiini  uuna tatu teke omeya momulonga nenge ta tu kwata oohi mugo?Ota tu kanitha oomwenyo dhaantu noshowo ota tu kanithile po iimuna yetu pomulonga” Mbala ta ulike. Eipumomumwe pokati kaantu noongandu momudhingoloko ngoka gu li moshikandjohogololo sha Kabbe olya talika ongo eshongo enene, molwashoka ndika otali indjipala sho oongandu tadhi ponokele aantu noshowo oongombe dhawo.Omasiku gaziko omunona gwomimvo hetatu okwa ponokelwa noku dhipagwa kongandu sha landula iiningwanima yilwe ya fa shika moka iimuna noshowo oombwa dha ponokelwa koongandu omanga dha li tadhi nu momulonga. Omuwiliki gwoshitopolwa shiikunino yiinamwenyo mUuministeli wOmudhingolo nOmatalelopo, Colgar Sikopo okwa ti oshikondo she ina shi tya aakalimo oya ka hinda iikwakuti mbyoka yili oongandu, ndele okwa fatulula kutya ota pa kala aluhe pena omaipumomumwe pokati kawo niinamwenyo , naangaka oga pumbwa ashike oku kondololwa nuukeka opo aantu yaa kanithe oomwenyo dhawo omolwa iilikama mbyoka.

“Oongandu ohadhi kala momeya na ohadhi longitha omeya ngoka woo haga longithwa kaantu. Otatu gandja omayele kaantu opo uuna ta ya taaguluka omulonga ya longithe uuwato ndele, yaa ende momeya kolupadhi oshoka shika osha nika oshiponga. Okwa indile aakuluntu noshowo aawiliki yopamuthigululwakalo ya soshimpwiyu kutya aanona ina ya kala ta ya yogo momulonga omolwa egameno lyawo” osho Sikopo a gwedhapo.

Okwa ti oshikondo she osha tulapo elandulathano lyuukongo woongandu kaantu mboka ya hala oku dhi yaha momahala ga gamenwa  muuzilo woshitopolwa sha Zambezi.”Otuna omwaalu gwoongandu ngoka guna oku yahwa pamukalo nguka omumvo kehe momahala ngoka. Go omahala ngoka ota ga vulu okulongitha oongandu ndhoka oku imonena iiyemo noshowo oku shonopeka  omwaalu gwadho.”

Sikopo okwa ti uuministeli we owa tulapo elandulathano lyo ku tulapo omahala  mpoka ta pa tulwa omalugumbo moka ta mu kala oongandu uuna dhili mokati koshigwana.

Mbala okwa ti omasiku gaziko ongandu oya ponokele ongombe ndele ndjika oya hupithwa kaakalimo, natango ongandu ndjoka oya li ya ponokele ombwa ndjoka woo ya hupithwa kaakalimo.

Olutitatu oya ponokele ondumetana yimwe eta yi yidhipaga nokweehameka onkwawo. Opo ihe oya ka ponokela omunona ngoka a li mondjila uuka kenongelo nokumudhipaga.

Moshiningwanima sha fa shoka omukiintu gumwe okwa zi konyala a dhipagwe kongandu omanga a li toopaleke iikutu ye pomulonga. Okwa li eshi pondola oku fadhuka po na okwa li ashike eehamekwa kashona kokwaako.

Mbala okwa ti osha pumbiwa opo iinamwenyo mbyoka iipyakadhi yi dhipagwepo. Unene tuu sho ngashingeyi yaa wete we oohi ndhoka oonene yi igilila oku kwata, onkene oya fululukile maantu noku ya ninga iihakanwa ngaaka.

Ongandu oha yi vulu oku vala omayi  geli pokati komathele 200 sigo 500 komumvo.

 

Ku Albertina Nakale

LEAVE A REPLY

Please enter your comment!
Please enter your name here