Elelo lyOshakati lya tameka opombela yoomwe mondoolopa ndjoka

0
340

ONGWEDIVA – Ewiliko lyondoolopa yaShakati melongelokumwe nUuministeli Wuundjolowele nOnkalonawa owa tameke okupombela omagumbo moshilando shoka oku kondjitha oomwe ndhoka dhilipo dha vuka. Iilonga yopombela oya tamekele Omaandaha oshiwike shika na otayi tsikile sigo opehulilo lyomwedhi nguka.

Pahapu dhomupopiliko gwelelo lyoshilando shaShakati, Jackson Muma, oshilonga shika otashi ningwa oshoka omayalulo giiningwanima yomukithi gwamalaria oga ulike kutya mbika oyuuka pombanda miilando. Omayalulo gUuministeli Wuundjolowele gomumvo 2012 oga ulike kutya miilando omwa holokele aantu oyendji ye niwe komalaria oku yeleka naamboka ya li ya kwatwa kuuvu mboka komikunda. Onkene opombela momagumbo mondoolopa yaShakati ota yi lalakanene oku shonopeka iiningwanima ya tya ngaaka ngaashi tashi vulika.

Iilonga yopombela ota yi kwata oshilando ashihe sha Shakati okuza tuu kOshakati shokUuninginino, okuya kOshakati shOkuuzilo , nokutsikila momalukanda agehe.Iilonga yokupombela ota yi kala  ha yi tameke aluhe pohetatu[8h00] ongula sigo opontano [17h00] komatango. Omuti ngoka tagu longithwa oku pombela oongoka goludhi lwo K Othrine, tagu pombwa muuwindji wookubike centimeta dhili 2,5 mombinemeta yimwe meni lyegumbo.

Omuti nguka ogwa thanekwa oku longithwa pamayele ge hangano lyUundjolowele Muuyuni (WHO) oku kondolola oomwe. Ka gu na iilandu ya sha, shampa gwa longithwa muuwindji mboka wa uthwa no ishewe ihagu luudhike oshoka ka gu na lwaala no iha gu pononoka.

Ogwa yooloka koDDT ndjoka olundji ha yi longithwa okupombela omagumbo momikunda.

Muma okwa indile aakalimo yaShakati opo ya gandje elongelokumwe lyawo moku pitika aapombeli ya pombele momagumbo gawo. Okwa indile wo po aanegumbo kehe ya soshimpwiyu kutya megumbo omuna omuntu ngoka ta kwathele aanambelewa yepombelo uuna ya thikimo.Okwa ti “Omagumbo moka mwaana aantu opo ya kwathele aapombeli ita ga ka pombelwa.’ Onkene mboka tashi vulika ta ya ka, kala yaamo momagumbo ota ya indilwa opo ye shi tseyithile elelo manga kuyele.
Ku Omunambelewa

 

 

LEAVE A REPLY

Please enter your comment!
Please enter your name here