Iingangamithi nuudhudhu wa vuka moosikola

0
290

WINDHOEK – Ekonakono lyosheendelela  kombinga yelongitho lyiingangamithi mosikola yimwe moWindhoek olya eta puuyelele oshili ta yi tilitha. Ekonakono ndika olya ulike kutya aalongwa 24 yomaalongwa omilongo 30 oya monika kutya ohaya longitha iingangamithi.”Elongitho lyiingangamithi noshowo iikolitha mokati kaanasikola olya fala meindjipalo  lyuudhudhu mokati kawo, nomathimbo gamwe okwaana evuliko okwa lundu  mokati kaalongwa mboka, yamwe yiiningi uungundu woku longa uudhudhu, omalugodhi nago oga holoka wo mokati kawo nopoompito dhimwe shika osha hulile medhipago poosikola’ ndika ehokololo ndyoka Minista Yelongo David Namwandi a li gandja momutumba gwopashigwana oshiwike shika kombinga yelundalalo lyelongitho lyiingangamithi niikolitha momanongelo.

“Otandi thikama mpaka monkalo yuutile okutseyithila egumbo ndika kutya otuna ondjamba ya gwayela moshigunda” Namwandi a ti tuulike omaipulo omanene kombinga yelongitho lyiingangamithi mokati kaanona yosikola nokwa indile aakuluntu opo ya tonatele nawa oyana.

Namwandi okwa ti oosikola mpoka pwa ningwa omakonakono ngoka oku tala ngele aalongwa oha ya longitha iingangamithi, odho moshitopolwa sha Khomas, go omakonakono oga ningwa kopolisi. Ndele Namwandi ina tumbula omanongelo ngoka komadhina, kakele kokweendulula kutya elongitho lyiingangamithi mokati kaanasikola olya ninga oshinima tashi etitha omaipulo ogendji unene koshikondo shElongo.Okwa ti iiningwanima yelongitho lyiingangamithi oya vuka moosikola dhomiilando nonando ndhoka dhokomikunda nadho itadhi kuthwamo moshinima shika.

Okwa ti moshitopolwa sha Khomas aanasikola oyendji oha ya longitha  iingangamithi ngaashi epangwe nococaine, a ti  ndjika onkalo ta yi eta omalimbililo .”Aanasikola mboka haya nana iingangamithi oha ya dhimbululwa nuupu oshoka oha ya ulike uuhwapindi kaalongwa ooyakwawo noshowo kaalongi” Namwandi ta tseyithile aatotimpango ngaaka.

Okwa ti osha ndhindhilikwa wo kutya aanasikola oha ya landa iingangamithi niimaliwa yomondjato mbyoka yo ha ya pewa kaakuluntu yawo.’Pamukalo nguka aakuluntu oya ningi aayambidhidhi ye longitho lyayo mokwaashishi , omanga moompito dhimwe aanona oya ya ka po iimaliwa yaakuluntu yawo opo ya vule oku ka landa iingangamithi.Yalwe oha ya longitha oonkondo meni nopondje yegumbo opo ya mone iimaliwa oku landa iingangamithi mbyoka ye ya pika.

Okwa ti oshiponga shelongitho lyiikolitha , iingangamithi osha monika mo kutya oshimwe shomomandangalati ngoka ge li mondjila yeputuko lyoshilongo, naashika osha kupikwa kelongitho lyoonkondo momagumbo, oluhepo, noshowo etaandelo lyo HIV/AIDS.

Namwandi okwa ti uumbangi mbuka wa zi momakonakono ga ningwa kopolisi , otawu ulike kutya osha pumbiwa oonkatu dhombala dhi katukwe opo onkalo ndjika yi yiwe moshipala manga kuyele. Okwi itaala kutya elongitho lyoonkondo, omaso, iiponga yomoondjila ota yi ulike kutya elongitho nayi lyiikolitha niingangamithi olya mena omidhi moshilongo shika noshowo mokati koosikola.

Okwa ti oshikondo she oshi uviteko oshiponga tashi etwa keshongo ndika na oshi ilongekidha oku longela kumwe nUuministeli wIikwagumbo, noshowo omahangano gaashi gopapangelo  okweetapo omalongekidho okutseyithila oshigwana kombinga yoshiponga shiingangamithi momanongelo.

Okwa indile wo epangelo opo li tulepo omandiki mpoka ta pa zulilwa mboka ya gwile momwigo gwiingangamiithi opo ya zigulwe melongitho lyayo.

Oshigwana ota shi indilwa wo shi lopote aalandithi yiingangamithi mboka ha ya yulu aagundjuka moku ya longa okulongitha iingangamithi moku ya hekela muyo pomatsakaneno gomapandaanda.

“Kala wo aluhe wu shi kutya oyana yoye oye li peni no na lye” Namwandi osho eedhile oshipopiwa she neindilo ndika eli ukitha kaakuluntu yaanona.


Ku Tonateni Shidhudhu

LEAVE A REPLY

Please enter your comment!
Please enter your name here