Ndohotola a taata omukulukadi waye meumbo

0
450

OSHAKATI – Ndohotola ashivika nawa nomoshilongo ashishe unene tuu mOshakati okwa kumwifa ovashiinda, novatali vamwe eshi eshipondola oku mona ombapila komhangu ya mangestalata oyo ye mupa eenghono opo a taatae omukadi meumbo.

Etitatu loshivike sha djako, Gorreth Asiiwa, omukulukadi wa Dr. David Mugimu, ovo aveshe va dile koUganda, okwa lombwelwa opo a longele nokutumba oinima yaye moipafi yopolifi  opo a fiye po eumbo olo e li tunga nomulume.

Asiiwa nounonamati vatatu, okwa taataelwa keumbo olo li li mepandaanda li li konima yeumbo liwa omo vakala nomulume, oko ku hena, eembete, omafiya, nokandjuo oke li pondje, nola kulupa oku yelakanifa neumbo olo ta hokolola kutya etungo lalo ola pwila komapepe aye.

Efimbo olo meme Asiiwa ta longele eekofa daye nokufiya po eumbo, omukainhu oo ta hokololwa kutya ohonda yomusamane waye, nokuli oshitukulwa shinene shomwaayo ya etifa oupyakadi mohombo yaye, okuli motuwa ya ndohotola oyo ya li ya kanghama pondje.

Eshi ashike otuwa oyo ya humbata meme Asiiwa tai pilamene ko yoo otuwa ya ndohotola oyo i na omakende ma laula nomuna omukainhu ta hokololwa kutya oumwe womeehonda da ndohotola otai i meumbo.

Asiiwa ta lombwele Kundana, kutya okwa shiva nale, okudja 2002, kutya omulume okwa kala e na ohonda oyo hai longo onga omutoloki komhangu ya mangestalata mOshakati.

“Omukainhu ou oye ngoo e mukwafa opo a mone ombaapila yoku taataa nge meumbo. Moshito nge nda ti ko sha kohonda yaye, omusamene oha ula nge kutya inandi popya sha, onda nyika oulai. Oha ti i na ndi mupula sha shaashi oye ha lande le nge oikulya, oye ha djaleke nge ame vali ondi li meumbo laye, hano nghina oufemba okutya sha,” omukainhu a hokolola.

Asiiwa oo ehena oilonga ta hokolola kutya voo nomulume ova kala vena omaupyakadi mohombo olule wefimbo li fike hanga peedula omilongo mbali ashike onghalo ei ya eta opo omulume emu taatae meumbo, oya etifwa konima eshi a uda omulume ta lombwele kaume kaye mongodi nghee a pa umwe womovanailonga vaye omateelelo avali, a pitilila po, nopaife eshi omukainhu oo oku li meteelelo etitatu olo natango e li pewa kundohotola tuu ou.

“Onda uda ta ti kutya ohonda yaye oyo hava longo nayo oya wa omadimo avali, nopaife eshi oina edimo etitatu. Efimbo alishe ta popi ota yolo ta hokolele kaume kaye oo ndihe shi kutya olye. Ame onda kala nda fikama nda pwilikina ashike ye ke wete nge,” Asiiwa ta hokolola.

Konima yefiku eshi Asiiwa a uda eenghunafana pokati komulume na kaume kaye, okwa kendabala ngeno aye meenghundafana nomusamane ashike eshi osha eta opo ovalihomboli ava valwe.

Asiiwa okwa kapatulula oshibofa kopolifi shenyenyepeko lokolutu ashike omulume okwe mu tetako ndee ta mono ombapila komhangu oyo yemu pa oufemba a taatae omukulukadi meumbo.

Oihokolola i na sha netaatae mo laAsiiwa meumbo, oya i udikile  momhangulilo ya magestalata mOshakati.


KuHelvy Shaanika

LEAVE A REPLY

Please enter your comment!
Please enter your name here