Epangelo ota li nenepeke eedjila moshilongo ashishe

0
250
Minista yOilonga noYeendifo, Erkki Nghimtina, Ngolonea waShana, Clemens Kashuupulwa, ta tete okalapi pefimbo le yeululo leenhopa yaNgwediva noyaKandjengedhi pehovelo lohani ei.

ONGWEDIVA – Ominista yOilonga nOyeendifo oya ti epangelo olina omafaneko oku wapaleka  eedjila dihapu domoshilongo noku di lundululila mwaado tadi dulu okushingwa koyeendifo ihapu yashaama ya uka kombinga imwe.

Minista Erkki Nghimtina, okwa ti epangelo  otali lalakanene okuninipika oiponga oyo hai holoka ngee oyeendifo yeli denga mumwe omutwe nomutwe  oyo ya hapupalane neenghono.

Pefimbo a yeulula odjila ya tamununwa mo pokati kOngwediva nOshakati Nghimtina okwa popya nokutya oholomende o ya faneka opo i wapeleke eedjila oshilongo ashishe.

Odjila yakula pokati kOshakati nOngwediva oya lundulilwa modjila yina omalila avali kombinga keshe, neenhopa yaNgwediva noyaKandjengedhi oda wapalekwa nokunenepekwa nosho yo oda ningwa dile opo omeva efundja nge leuya a pite nawa a manguluka koshi yado.

Eenhopa edi dili mOshakati nomOngwediva oda tungwa peenhele opo hapa pitile omeva efundja mahapu neenghono, no da monene oushada pefimbo lomuloka waliko momido 2008/2009 no 2010/2011. Endumbalalo loyeendifo modjila yo pokati keedolopa edi mbali olali likenyeneka , nola eta eudo nai mokati  kovalongifi vondjila ovo va kala tava nyenyeta kutya luhapu ohava fiki va tokelwa koilonga yavo.

Eshi osha eta epangelo okupitila mehangano leedjila ile Road Authority opo odjila ei i longululwe noku tulwa pomufika oo ili paife. Odjila pokati kOngwediva nOshakati oyo imwe yomeendjila deli pyakidila neenghono moshilongo ashishe.

Nghimtina okwa ti mondjila ei yonomola  (MR) 92, omo mwa tungwa eenhopa edi, oimwe yomeedjila da fimana pamaxupilo oshilongo, unene tuu komangeshefelo koumbangalanhu woshilongo.

Odjila ei o ili yoo oshitauwa shopashiwana osho sha kwatakanifa Namiba nAngola, onghee ewapaleko layo ota li xumifa komesho eameno lomeedjila nosho yo ota li ninipike  efimbo lokweenda kovanamatuwa okudja nosho yo okuya koAngola.

Minista okwa shiivifa yoo kutya pefimbo eli eenhopa nhatu modjila yopokati kaRehoboth-Mariental otadi longululwa, noshoyo  eenhopa dipe nhatu odo ta di tungwa pokati kOkahandja nOvitoto mondjila yonomola DR2102 moshitukulwa Otjozondjupa  odi li pokumanifwa.

Nghimtina okwa ti oilonga yoku tamununamo odjila yopokati kOmuthiya nOndangwa ikale nomalila avali kombinga keshe ota i tamekwa omudo tau ya.

Ku Helvy Shaanika

LEAVE A REPLY

Please enter your comment!
Please enter your name here