Ethigathano Lyoompata dhOshiwambo poSekundosikola yaNuuyoma

0
353

Ku: Autoni Petrus

Okangundu koompata melaka lyOshiwambo mOsekundosikola yaNuuyoma  Moshitopolwa shaMusati palongekidho lyomukuluntusikola,  osho wo aalongi yomalaka mosekundosikola  oyo tuu ndjoka otaka thaneke okulongekidha Ethigathano enenenene lyoompata melaka lyOshiwambo omumvo tagu ya (2014).  Ethigathano ndika otali ka hiya oosekundosikola adhihe mOshitopolwa  shaMusati naShana.

Oompata odho ethigathano moka aapopi taa tompathana nelalakano  okuulika uunongo wawo wokupopya nokutompa iinima yi ili noyi ili. Oshi li shasimana nosha uka ngele tatu ningi omathigathano goludhi nduka. Shika ondi wete tashi ka kwathela aalongwa mboka yondondo ontimulongo nambali (12) uunene tuu mekonakono lyawo  lyopakana (oral) lyahugunina  lyOshindonga. Onde shi ndhindhilike kutya aalongwa yomondondo ndjika ohaya nana nondatu ngele tashi ya mekonakono lyawo lyopakana (oral), naashika osha guma nayi iitsa yawo miilongwa mbika.

Oompata  otadhi kwatha wo aalongwa opo yi ilonge okulongitha ongulumambo ano (oLibrary) okumona uuyelele mboka wa pumbiwa noku wu longitha mokutompa oshipalanyolo shontumba, naashika otashi kwatha aalongwa opo yi ilonge okuninga iinima mondjila. Oompata odhi li woo tadhi kwathele aalongwa opo yi ilonge okundjandjukununa omikundu dha kitakana nokuyelekanitha omauyelele ngaashi naana hashi pulwa mekonakono. Otashi ka kwathela aalongwa mokuyoolola iitsa yasimana naambyoka inaayi simana. Onda koneke kutya aalongwa  oyendji ohaya nyola iinyolwa iifupi molwashoka  kaye na owino yokudhiladhila, onkene pamukalo nguka otayi  ilongo okudhiladhila meendelelo.

Otandi tsu omukumo aalongi yomalaka gOshiwambo  opo ya kwatele komeho aalongwa mokutotapo oongundu dhoompata posikola dhawo yo ya vule okukutha ombinga methigathano lyoompata ndika. Ngele omulongwa oku na owino mokupatana, nena ke na uumbanda wokupopya komeho gaantu, na  omulongwa nguka ota kala  e na omikalo omiwanawa nokulongitha omayinyengo golutu taga opalele. Onda koneke kutya aalongwa  oyendji ohaya nyola iinyolwa iifupi molwashoka  kaye na owino yokudhiladhila

Ethigathano olya kwatela mo aalongwa ayehe mboka ye li mosekundosikola okutameka pondondo 8- 12. Elalakano enene lyokuninga ethigathano ndika, okupyokola aalongwa  mokupopya elaka lyooyinakulu osho wo aalongwa ya likole uunongo wokudhiladhila meendelelo nokuyamukula meendelelo uuna ya pulwa omapulo. Shika itashi ti aalongwa otaya mono ashike owino yokupopya, ihe otaa mono woo owino yokudhiladhila meendeleolo uuna taa shanga omakonakono gawo. tashi kwathele aalongwa  mokunyola omatotwahokololo omakwakutompela niinyolwa yilwe. Okangundu koompata dhOshiwambo otaka lalakanene woo okuyambula po omalaka gookuku nootatekulu opo wo Aanona yi ilonge omithigululwakalo dhooyinakulu nohekulu tashi pitile miipalanyolo mbyoka taa tompathana.

Ompata otadhi longo wo aanona okupopya, opo  woo noshigwana shetu shi kale shi na aanona taa vulu okuthikama nokweetapo sha komeho gaantu. Onkee, otatu indile aantu oohandimwe, omahangano gopaumwene, nIikondo yepangelo, aanangeshefa opo yi tu kwathele tashi vulika oshimaliwa nenge na kehe tuu shoka  tashi vulu okugandjwa kaanona mboka taa ka kutha ombinga methigathano ndika. Gwonale okwa tile: “omunwe gumwe ihagu itombola” , onkee  otatu mu indile oshigwana oshiholike opo mu tu yamidhidhe, tu wape okutula ondungethaneko yetu miilonga. Elalakano lyetu okutsa omuko nokuhokitha aalongwa elaka lyoohekulu nooyinakulu.

Omukulu gwonale okwa tile: Ku na mutanda ku na ngombe, ku na mpagona ku na iilya  onkee oshigwana osha pumbwa okuhokithwa elaka lyooyinakulu  omanga shi li mepipi lyoomvula ooshona, oshoka omuwambo oha ti omuti ohagu uthwa manga omushona.

Uuyelele wa gwedha po tu dhengela ko: 0812163356 nenge ko email: hotibs@gmail.com

 

LEAVE A REPLY

Please enter your comment!
Please enter your name here