Hikumwah naNghuulile va udafana

0
264

ONGHA – Eemhata odo da tukukile shinasha noumwene wedu, wonhele opo pena ositaasi yopolifi yopOngha odeuya pexulilo.

Oshivike sha djako Omufita George Hikumwah oo ali nale mwene womukunda Ongha, nomunangeshefa Erastus Haindongo, oo a shivika nawa Nghuulile, keshe umwe okwa ifanene eembangi, daye opo di va talife do di yandje oumbangi kutya olye naana mwene wonhele opo pe na ositaasi yopolifi yopOngha, neengaba dayo o da enda peni.

Otaku hokololwa kutya omafimbo a pita opa kala pena okuhatwa kumwe pokati ka Hikumwah novanangeshefa vamwe mwa kwatelwa Frans Nepilu Nuuyoma oo ta hokolola kutya oye a yandjele oshipambu shonhele oyo kopolifi, ye ta landifa oshipambu shikwao ku Haindongo.

Hikumwah kombinga ikwao, ota hokolola kutya ponhele opo pena opolifi, okapangelo naikwao ihapu oya kala onhele yepangelo la South Africa omanga oshilongo inashi manguluka, nokonima yemanguluko onhele oyo tuu oyo oya ya momaka epangelo la Namibia.

Hikumwah ta hokolola kutya ekove omo muna  okakalafana oko haka longifwa onga ongulu yopolifi, kalishi nande lomunhu pauhandimwe, nokaalita oko ena ota ka ulike kutya, poushiinda wekove olo opena okanhele ka nini elela ka dengelwa onduda yoshipeleki.

Ashike vahapu vomovanhu ovo vali po onga eembangi ova patanifa omufita Hikumwah tava hokolola kutya onhele oyo oya Nuuyoma, ei landa nale manga nopolifi ina i ya po pOngha.

“Ovapolifi eshi ve ya apa ta va kongo onhele, onde va pula opo va fute, ndee Hamukonda oo a li omukulunhu wavo pefimbo opo ta lombwele nge ta ti, vo ina va ufilwa opo va lande edu, shapo ota va kakonga ashike onhele imwe.

“Ame onde mu lombwela kutya kashina ngaa nee ombudi, nava kale opo shaashi opolifi nafye otwe i pumbwa,” Nuuyoma ta hokolola.

Omunangeshefa Fillipus Aupa Nangolo, oo naye a li ombangi ya Haindongo, okwa pataneke okaalita oko ka li ku Hikumwah, ta ti kakele keenhele depangelo odo daulikwa mokaalita omo, omaumbo neengeshefa odo dili pomudingonoko opo kaemo, onghee okaalita oko ita ka dulu oku longifwa, shaashi ita ka yandje efano loshili lomudingonoko waNgha.

“Oshiima shimwe vali, George [Hikumwah] ito dulu okutu pula oumbaapila vomafutilo. Oushishi nawa kutya oovene vomikunda efimbo linya kamwa li hamu yandje eembapila,” Nangolo ta popi nokuhena mbili.

Lwopokati opo, umwe womovakalelipo vaau eli mwene womukunda paife, okwa ka fatulula kutya ye, mwene womukunda, Nuuyoma na Haindongo ova polile nale oshinima osho, ndele ta va udafana kutya opolifi na i pewe onhele ifike peni na Haindongo na pewe ko onhele ifike peni.

Ovakaleli po va mwene womukunda tava ulike yoo kutya ongaba yonhele oyo Nuuyoma a landifa ku Haindongo oya enda peni. Eshi osha tambulwa ko ku Nuuyoma, Hikumwah, naaveshe ovo va li po, mwa kwatelwa Haindongo.

“Ame kanda li ndina nande owii washa okwa li ashike nda hala ndi ulikilwe kutya onhele yange oya enda peni, opo ndi tameke okutunga. Kandali nda hala nande oikolokosha, nopaife ngaha onda manguluka nee,” Haindongo ta ti.

Ku Helvy Shaanika

LEAVE A REPLY

Please enter your comment!
Please enter your name here