Omukuluntusikola ta faula osikola kuukolwe

0
300

ONGWEDIVA- Aalongisikola yo pOmutundungu Combined School moshikandjolongo sha Etayi mOmusati ota ya piyaganekwa unene kefaulo lyomukuluntusikola,  Toivo Haungeda ngoka ta fekelwa hafaula kuukolwe. Ndele Haungeda omapopyo ngaka okwa ti ogo owala omalundilo gaashi goshili.

Haungeda ngoka taku ti oha longitha nayi iikolitha, otaku hokololwa kutya ngele a mono oshimaliwa she shokomwedhi aniwa, oha ningi omasiku nenge oshiwike ashihe ina ya kosikola ye ina tseyithila aalongi ye nenge omutaleli gwoskola kutya okuli peni.

“Ngame Haungeda okwa lulila ndje noonkondo. Ashike otandi dhilaadhila kutya omalovu ogo hage mu ningitha ngaaka,” omutalelishikandjo gwelongo moshikandjolongo shaEtayi Hans Shikongo ta ti.

Shikongo ina holeka nando komutoolinkundana nguka kutya Haungeda oha faula noonkondo na oshi yemateka unene tuu kaalongi naanasikola yoposikola.

“Ngame shoka shefaulo onde shi uvu nale kaalongi ndele tandi ningi omutumba na Haungeda noshowo iilyo yosikola yopombanda ndele omulumentu gwaKalunga ina uvako.  Nande popya, kemanya ku za woo ontsi. Oonkambadhala aadhihe ndhoka dhina okuningilwa omuntu gwoludhi nduka kombelewa yandje onde dhininga ashike i nashi kwatha sha,” Shikongo ta popi a lulilwa.

Omutalelisikola okwa gwedha po ta ti kutya omanyenyeto ngaka okwe ga undulila kombelewa yelongo moshitopolwa momumvo 2011 sigo onuumvo ihe ina puningwa sha, onkene keshi kutya na ninge ngiini.

Yamwe yomaalongi mboka ya popi na Kundana oya ti onkalo yokufaula kwa Haungeda oye ya lulila noonkondo unene ngaa pu Aguste sho konyala nokuli uunona waya mefudho kauna oonzapo oshoka kapuna ngu tedhi shaina.

“Mu Aguste nuumvo omukuluntu sikola okwa ya osikola inayi fudha, ye oonzapo dhuunona okwe dhi patela mombelewa ye. Onkee twa kambadhala opo tu ningulule po dhimwe eta tu dhi itopolele tse aalongi opo tu dhi shaine uunona wo wuvule okudhifala komagumbo,” omulongi gumwe ta ti.

Aalongi oya tumbula kutya gamwe gomomasiku ngoka omukuluntu sikola afaula ongaashi muAguste moka a faulamo omasiku gaali, muSeptemba gaali, muOktoba gaheyali omanga muNovemba limwe.

Aalongi oya ti ombelewa yomukuluntusikola oyo ondunda yomapungulilo gosikola ayihe, ihe omathimbo nomathimbo ohaya kala ya patelwa pondje uuna omukuluntusikola a faula.

Oya ti kutya shika ota shi uvitha nayi noonkondo, oshoka ngele omukuluntusikola ina holoka kosikola ongodhi ye yo peke nayo ohayi kala yadhima na ohashi kala  oshidhigu okuninga omakwatathano naye.

“Ongaashi ngaa nee wushishi kutya iinima oyindji posikola ihayi ningwa ka yina epitikolo lyomukuluntusikola, uuna puna nando oshinima sha endelela sha pumbwa okushaina komukuluntusikola nena oshina okushuna konima.

Aalongi mbaka oya ti wo omanyenyeto gawo oye ga undulila kombelewa yomutalelishikandjo gwelongo iikando oyindji, ihe iha pe ya elunduluko.

Sho Kundana emu dhengele, Haungeda okwa ti ota dhimbulukwa kutya okwa ningilwe omutumba shinasha nomalundilo ngaka ashike iinima ayihe ya popiwa kombinga yee iifundja iitokele.

“ Kashi shi oshili ngame MuOktoba onda faula tandi ehama, ashike moomweedhi onkwawo ina ndi faula mo nande nande,” Haundega ti ipatana.

Haungeda ina popya odhindji okwa ti ashike iinima ayihe mbyoka ta pulwa komutoolinkundana nguka ka yina uushili washa na ota lundilwa.

Kundana okwa ninga woo onkambadhala okupopya nomukuluntu gwelongo mOshitukulwa shaMusati, Loide Shatiwa ngoka ati kutya ombelewa ye ina yi yakula omanyenyeto ge nasha naHaungeda. Shatiwa okwa uvaneke kutya ota ka ninga ekwatathano nomutalelisikola ye a vule okulandula omulandu ngoka hagu landulwa mokukatukila onkatu mboka ha ya faula kaye na etompelo.


KuLoide Jason

LEAVE A REPLY

Please enter your comment!
Please enter your name here