Oondingoshi ndhi tuna naa ndhi tu na odha gwana

0
203

Ngashingeyi Namibia olya ninga evi lyoondingosho noongeshefa dhiikolitha oshoka kehe owala mpoka to ende moshilongo muka oto kundwa ashike koondingosho ndhoka.

Ano kapuna we edhilaadhilo limwe lyongeshefa ta yi endelele yi vule uundingosho womalovu? Oshoka ngashingeyi uundingosho kawu shi we omahala go ku inyanyudha ashike oga ninga omahala go ku tsilwa aantu noombele nenge gokudhipagelwa aantu.

Ano omolwashike itaa tu totopo oongeshefa dhuunafalama, dhokulonga nokulanditha nande iilikolomwa yomepya nenge oongeshefa dhokuhondja, shoka tatu tondokele ashike kokulanditha iikolitha mbyoka tayi teya nokuhanagulapo ombili moshigwana.

Ngele oto koneke nawa ngashingeyi aakuluntu oyendji ihaa tokelwa we momagumbo nomaluvalo gawo, ye ga longe kombinga yo ku kala mwenyo okuwanawa oshoka oya pikwa kiikolitha sha etithwa ke indjipalo lyoondingosho moNamibia .

Oshili shili aakuuyuni ooyakwetu otwa ukeni peni ano? Omukulugwonale okwa tile shamena osha za ke tindi ngele owa kala ho popi ashike oongeshefa dhuundingosho megumbo noluvalo lwoye, nena owa tegelela uunona wu katotepo wo nawo ongeshefa ndjoka itayi tungu ashike otayi hanagula.

Ngele otandi dhimbulukwa nawa moshilandopangelo shetu omuna omalukanda ngoka ha ga ithanwa Havana, Greenwell Matongo, Okuryangava nOmbili kapuna nando ehuliloshiwike tali piti po ino lesha miikundaneki kutya omuntu gwontumba  okwa tsuwa nombele molukanda lwontumba shono ya tameke iikolokosha pondingosho.

Shika monena oshaninga omukalondjigilile naaNamibia mboka yena natango omadhilaadhilo gokutotapo oongeshefa dhuundingosho naa dhilaadhilulule nawa.

Ngame mwene kandina ompinge noongeshafa dhoondingosho ashike epuko olili ashike mpaka kutya oondingosho odha indjipala noonkondo na odha lamininapo omadhilaadhilo goongeshefa dhimwe uunene tuu maagundjuka.

Ngashingeyi aantu iha ya longo we nuudhiginini oshoka oye shishi nawa nawa kutya ondingosho oyo omukalo omupu goku mona oshimaliwa  omanga pena woo ompito dhimwe dhoongeshefa kadhi shi oondingosho.

Ano ngashingeyi otandi kumike aakwashigwa oyakwetu opo tu toteni po oongeshefa dhimwe dhi ili kadhi shi uundingosho wiikolitha oshoka ota tu teye nipo oshilongo shetu tse yene uunene ngaa epipi ndyoka opo tali ya .

Ina tu ningeni aandende ashike tulongeni nuudhiginini haku pitila mokulanditha iikolitha aawe ihe omo ku tota po oongeshefa tadhi hokitha dho tadhi nyanyudha!
By The Editor

LEAVE A REPLY

Please enter your comment!
Please enter your name here