Ovakainhu na vo ova pumbwa okupewa edu

0
338
Ominista yOukashikekookanhu nOnghalonawa younona, Rosalia Nghidinwa

ONGWEDIVA-Ominista yOukashikekookanhu nOnghalonawa yOunona oya indila Ouministeli Wedu opo u yadje edu kovakainhu.

Rosalia Nghidinwa okwati Namibia oku na eefiye dili lwopo mayovi 100 000, dihapu domudo ohadi filwa oshisho nokukwafwa kovakainhu.

Nghidinwa okwa ninga eindilo eli oshivike shadjako poBennie’s Entertainment Park, mOngwediva pefimbo a li ta popifa pambelewa oshoongalele tashi lalakanene omaxupilo, okushitalela mefano lopaukashikekookanhu noshoyo ovo veli moluhepo.

Nghidinwa okwa ti eepelesenda hanga 44 domaumbo momikunda oku li mefiloshisho lovakainhu, namahapu omo maumbo aa otashi dulika eli momhumbwe ile a hepa neenghono.

“Omuvalu wovakainhu have li longele odjabi omunini oku yelakanifa nomuvalu wovalumenhu oo wa fikama peepelesenda 49 fiyo 60 nosho yo eepelesenda 47 moimhungulonga oyo ihefi younamapya nouteku woimuna,” osho Nghidinwa a ti.

Nghidinwa ta  weda po yoo kutya pamufyuululwakalo oukadona iha valulwa moshinima shoufiye wedu lovakulunhu ile vovatekuli vavo.

“Omukalo ou mwii neenghono iha u pitike opo okaana kokadona ka fyuulule edu ile eumbo lovakulunhu vako, luhapu oha u eta opo edu ile eumbo li fyuululwe po kounona voumati,” Nghidinua ta ulike.

Okwa ti omukalo oo owa tongola ounona voukadona nota u tumbaleke ovo voumati va dilaadile kutya vo ova fimana vedule oukadona.

Pamivalu dehangano lomavalulo moshilongo loNamibian Statistics Agency (NSA), ounona moNamibia ve li koshi yomido 18 ova li hanga po miliona 1,3 omo mwa kwatelwa ovakainhu 653,404 novalumenhu 647, 358 oku ya momudo 2012.

Onghee Nghidinwa okwa pula oshoongalele opo shi kundafane efimano ledu mekwatafano noukashikekookanhu, nomekwatafano naavo veli monghalo yanyika oluhepo noshoyo ovo veli moudjuu, na nhumbi tava kwafelwa opo eenghalamwenyo davo di xwepopale.

“Ita tu dulu oku kala mounyuni wonena tu na omuvalu munini wovakainhu mokuninga omatokolo moikondo yopashiwana ile yopaumwene,” Nghidinwa ta ti.

Okwa ti oshinakuwanifa eshi kashi fi ashike shoshikondo shaye, ndele osha kwatela mo oikondo aishe.

Moshipopiwa shaye, Ngolonea woshitukulwa shaShana, Clemens Kashuupulwa oo a popifa yoo oshiongalele eshi okwa ti vahapu vomovanhu ovo vena omaliko hae linyenge naa ihae linyenge ovakengeli.

“Eehepele naavo veli momhumbwe ova fa vehena omhito yokuli monena edu ile eedjo dilili nadilili dopaushitwe moshilongo omu,” Kashuupulwa ta ti.

Ngoloneya ta holola kutya ope na omhumbwe opo eeveta dedu di talululwe opo etukulo ledu moshilongo likale pauyuuki, novanhu aveshe vadule okumona edu, pehana ondjoolola youkashikekookanhu, yopamuhoko, nosho tuu.

Kashuupulwa okwa ti inashi yuka opo ovanhu vamwe va twikile nonghalamwenyo yoluhepo ile yoluhepo lilula omanga vamwe ve li monghalamwenyo youpuna wepitilila.

Moshiongalele omwa li yoo ovaleli vopamifyuululwakalo noshoyo omukalelipo wo Millennium Challenge Account moNamibia.

Ku Loide Jason

 

LEAVE A REPLY

Please enter your comment!
Please enter your name here