Aakulupe yasa moshiponga shoshihauto

0
368

ONGWEDIVA- Aakulupe yaali  yomimvo omilongo 63 yomOshitopolwa shaMusati oya hulithile moshiponga shohauto moMaandaha goshiwike shika sho oshihauto moka ya li sha kandoma.

Okwa hokololwa kutya  oshiponga shika osha holoka sho omuhingi omunamimvo 58, ngoka taku fekelwa kutya omupolisi pa ithano, ngoka aniwa keena ombapila yokuhinga, a nyengwa oku pangela ohauto etayi kandoma.

Oshiponga osha holoka lwopotundi 13h00, pokati kOnesi nEpalela pomukunda Okalonga mOshitopolwa shaNesi, noshihauto shika shali tashi hingwa okuza kOnesi okuya kEpalela.

Otaku hokololwa nee kutya mohauto muka omwali  muna aantu yeli yahamano, mwa kwatelwa omuhingi.

Ookatalekonawa oya lombwele Kundana kutya aafalelwa yaali okwa li ya ehamekwa noonkondo na oyali ya falwa koshipangelo shepangelo shaTsandi moka yeli taya mono omakwatho gopauhaku ngashingeyi na oyeli monkalo hwepo.

Omufalelwa omukwawo nomuhingi oya li ya hokololwa yaningi ashike ya ningwa uukwagunyuna na inaya taambelwa nando omoshipangelo.

Oshipotha shoku hinga nuuhasha nosho ku hinga keena ombapila yokuhinga oshali sha patululwa nomutamanekwa okwa li a kwa twapo na okwa tegelelwa oku holoka mompangu yaMengestrata mOutapi.

Opolisi yomOmusati oya koleke oshiponga shika mEtitatu lyoshiwike shika.

Oonakusila moshiponga oyo nee Helvi Thomas Makili 63 gwo komukunda Onetutu koTsandi  na Monika Kahindi 63 gwokomukunda  Okathakongala mOnesi.

Aakwanezimo yawo oya tseyithilwa nale aapolisi yati.

Ku Loide Jason

LEAVE A REPLY

Please enter your comment!
Please enter your name here