Oshikondo shOvanyasha nomaudano sha pulwa shi li dope mewiliko lobokisa Onhumwafo

0
286
Hiskia Swartz
Hiskia Swartz

WINDHOEK:Ohai pandula eshi wa pange onhele moshifokudana eshi shafimana , ndi tukule omaliudo ange nomalipulo kombinga yewiliko loudano wobokisa moNamibia pamwe novaleshi voshifo eshi. Ame ondililepo omadilongo ongudu yo Namibian Boxing Concerned Group ei ya fikama moilyo yi shiivike nawa yovabokisi vonale noshoyo yovadeuli vovabokisi ava.

Elalakano letu okushivifila oshiwana konghalo ya naipala moshitopolwa shoudano wokudenga eengonyo. Ohatu tange nokutumbaleka osho sha djambulwapo kovaboksi va Namibia ovo va longa noudiinini  noshoo ovadeuli moudano ou , oshihopaenenwa oNestor Tobias oo a longa noku tula edina laNamibia pomufika wopaiwana. Fye ohatu tula yoo ewi letu ku laavo ve he udite ombili newiliko loudano oo.

Fye ohatu ambidida omuwiliki ta vatele moshikondo shomaudano oo a li a popi na New ERA a ti, ewiliko lobokisa moshilongo ola pumbwa oku tula eumbo lalo melandulafano

Shotete eumbo lobokisa olo ashike omakulukuma ongaho, noshoyo ovanambelewa ove limo shi heli paveta, osheshi efimbo lavo lewiliko ola pwako nale.Fye otuudite  nayi komipopyo taku tiwa onda popiwa komuperesidende keeli paveta wehangano lo Namibia lo bokisa eshi vati a ti ye okwa humbata  owua wobokisa` moshilongo“komutima waye.

Eshi otashi pukifa molwasho omupresidende wolutu lobokisa oku li mombelewa oyo shiheli paveta, lo ishewe ewiliko lae ola dudakana neenghono.

Ovanhu ovo ve heshi eshi tashi linyenge mobokisa otashi dulika ve tu tale twafa hatu popi aanambelewa yewiliko momhepo ii . Fye otwa didilike nghee omuperesidende keeli paveta wewiliko lobokisa a kendambala okufufya oshiwana eshi ati ye oku li kolukalwapangelo lobokisa molwasho okwa indilwa kovashiivi nawa moudano ou opo a twikile noilonga oo.Omuperesidende ou pamwe novayambididi vaye otava kendambala vali oku kala mewiliko lobokisa omido tuuka.

Paveta yomaudano ya Namibia 2003 omunhu kena vali oufemba oku kala mombelewa oule womido 10 fimbo inaa ulikwa a ninge omuwiliki wolutu lonhumba loudano.Konima yemanguluko loshilongo  olutu lobokisa ka lali la ningi oshoongalele shomahoololo. Omudo 1994 opa li pa longekidwa oshoongalele shomahololo ndele eshi osha dopa molwashi kapali ovakalelipo vahapu okudja koitukulwa yoshilongo, onghee ame kandi uditeko nghee omuperesidende ou ehe li paveta kutya okwa hoololwa nomukalo ulipipo.

Vali ewiliko lobokisa iheshi yopaifano nalo oli li koshi yomuwiliki kee heli paveta, noshiima eshi osha pumbwa oku talwa yoo.Efimbo lewiliko la amushanga ou nalo ola pwako lafa ashike olo lomuperesidende wolutu lobokisa. Ame ondi wete nokutya ye okwe li fininikila koshipundi osho eshi tati okuna eyambidido lolutu lobokisa moshilongo eshi.

 

Onghalo ya  Namibia moudano oo ota yi ka la ihe li nawa molwa ewiliko olo lihe li paveta, onghee oshikondo shomaudano ina shi pitikwa okuyambidida okulongifa oimaliwa mewiliko lobokisa liheli paveta.

Shikwawo omuperesidende wobokisa okwa tauluka ekotamphango lo NBF eshi a tindila moshipundi osho fimbo ekotamhango inaali pitika omuperesidende ta kalele.

Shikwawo osha fa oshikondo shOmaudano sha pitika onghalo eyi yi twikile.

Nonando hatu ambidida eindilo lomuwiliki wokulipo womaudano nokutya obokisa nai tule eumbo layo melandulafano otwa hala yoo Oministeli eyi yi ingide nokutya na pa longekidwe oshoongalele shomahoololo ewilikongundu lipe loNBF.Otatu indile opo ovo va tindila mewiliko eli veli fiyepo diva omolwa eyokomesho moshitukulwa shobokisa.

 

Nomakundo,

 

Hiskia Swartz

(Omukalelipo wo: Namibian Boxing Concerned Group)

LEAVE A REPLY

Please enter your comment!
Please enter your name here