Ovalumenhu mEenhana tava hepeke ovaSan pamilele

0
317
Tate Shamhaulimo (kolumosho) mwene wepundo oo tati kutya ovalumenhu vOvawambo otava longifa nai ovakainhu vovaSan okuya navo momilelela inadi amenwa.

EENHANA – Ovalumenhu vomomuhoko wovaSan mEenhana otava ti kutya ovalumenhu veheshi ovaSan ota va hepeke ovakainhu vavo eshi hava i navo momilele inadi longekidwa osho tashi hapupaleke oHIV/Aids mokati kovaSan.

Omafiku aa Kundana okwa talela po epundo li li molukanda Ombili mEenhana, omo ovaSan tava hokolola kutya ovalumhenhu ohave li vakele komapundo komatango nge kwa laula, oko hava ka ya moixulo novakainhu vovaSan.

Omukulunhu wepundo oo ashivika ashike nedina Shamhaulimo ota hokolola kutya, omolwa odino nokuhafimaneka ovaSan, ovo fiyo onena have li ufana Ovakwanghala nohava ifana Ovawambo Ovayamba, vamwe vomovalumenhu polukanda opo ohava dengele ovakulukadi vovaSan, nefimbo limwe ohave va landele otombo, veva kolwife va shive okuya moixulo novakainhu vovaSan.

Mupya munene ovakainhu ava ohave li hange ve na omateelelo nokonima eshi ounona va  dalwa, ovalumenhu veheshi ovaSan, vamwe ovo Ovawambo, ohave li kale ounona, nohava efelwa momake ooina noluhapu ohava kulu veheshi ooxe.

Kemanguluko ya Daniel Shikongo, omukainhu wOmuwambo oo ta hokolola kutya okwa kala omushiinda nepundo molukanda oule wefimbo lile, ota hokolola yoo kutya ovalumenhu vOvawambo ova hala ashike ovakainhu vovaSan vakale oilongifwa yavo yoluhondelo, ashike kuvo, ohoni oku monika navo ile oku tambula ko okaana vekadala nomukainhu womuhoko oo.

Omolwaasho hava teelele kutoke opo va endele kumwe nomilaulu ngee tave li vakele komapundo, oko hava ka ya momilele inandi longekidwa. Omolwa onghalo yatya ngaha, ovalumenhu Ovawambo ova talika ko onga oshitukulwa sha kula metandavelifo lomukifi woHIV/Aids mokati kovaSan vomEenhana.

“Ovakwanghala eshi vakala kave na oHIV, ashike Ovayamba ovo tava tandavelifa ombuto mokati [kovaSan]. Omutenya pepundo apa ito mono po nande omulumenhu wOmuyamba ta nyonghola po, ndee komatango eshi taku wiwile oto mono Ovawambo veli mepundo omu tava fifila vakaye moixulo novakulukadi [vovaSan], omhanga ovalumenhu vavo veli pomalodu. Efimbo limwe nge ova hangika mo, [ovaSan] ava ve litumba ohava tameke okulwa shike Ovamwambo oveva te, oto hange Omukwanghala wovanhu a dengwa nai,” Shikongo ta hokolola.

Ovanailonga mopologalama ha i ifanwa Total Control of the Epidemic (TCE) oyo i lile po okuyandja ouyelele shinasha noHIV/Aids no TB momikunda, ovo vali yoo tava talele po epundo ota va hokolola kutya, efimbo nefimbo ohava talele po ovaSan, opo veva pe ouyelele kombinga yo HIV. Ovanashilonga ava otava hokolola kutya ouyelele ou ha va yandje omwakatelwa okuyambidida ovo veli kepango opo va nwe omiti melandulafano, noku tumina ovo tava ehama koshipangelo.

“Ovayamba vahapu pomudingonoko apa ove na omukifi, ohatu kala nee alushe hatu kumaida Ovakwanghala opo veli kaleke kokule navo, ile va ye momilele da amenwa. Ashike nge takutoko fye iha tu kala po, fye vali katu na eenghono oku kelela ovanhu. Ohatu dulu ashike oku va kumaida, okuva tuma koshipangelo nokuva lopota keembelewa dookansela ngee ve na omhumbwe yoikulya,” umwe womovanambelewa vo TCE ta ti.

 

KuHelvy Shaanika

LEAVE A REPLY

Please enter your comment!
Please enter your name here