Sam Nujoma: Where Others Wavered – Ondjokana noku ethapo iilonga moVenduka

0
491

Onda kala maandja Tatekulu Hiskia Kondombolo, no konima onda landa egumbo lyandje molukanda Olukulu moVenduka. Ngaashi onkalo yomo Katutura, olukanda hoka kwa thiminikilwa aaluudhe, okuza kwaandoka Olukulu, olukanda lwa Old Location olwa li lwa topolwa pamihoko dhaakalimo yamo.Oshitopolwa shaaHerero omagumbo oga li ga nyolwa “H”komiyelo dhago, oshitopolwa shaaWambo pomiyelo dhomagumbo opwa li pwa tulwa “OV” ya shangwa moondanda oonene, pomagumbo gaaDamara opwa li pwa shangwa”D” onene  noshowo pomiyelo dhomagumbo gaaNama opwa li pwa nyolwa “N” onene.

Ngele omuntu kushi gwomuhoko tu tye gwaaHerero nena ito vulu oku pewa uuthemba oku kala nehala lyegumbo moshitopolwa shaantu mboka.Nguka ogwa li omulandu gwokatongo gwepangelo oku topola nokupangela aantu mbaka.Omumvo 1956 pethimbo ndali handi kwata ondjambi konyala ya fa oyindji miilonga yolutenda onda hokana na Theopoldine Kovambo Katjimune.Okwa li ha ithanwa Kovambo molwashoka okwa li omunona gwOmuwambo , okwa li a valwa  ku yina omuHerero omanga he ali  Omuwambo. Okwa valelwa moVenduka, nomazimo getu ogena ekwatathano kombinga ya he gwokulipo. He gwokulipo nguka okwa li Johannes Mushimba, ngoka ena ekwatathano enene na Tate noshowo namemegona kOmbaye. Yo ayehe mbaka oyo mezimo lyaaua yUukwambi.Oya li yetu talelepo mOmbaye oshoka oya li kuume kamemegona onkene tse otwa li aanona pamwe.Sho Kovambo a ka shuna koVenduka onda kala handi mu shangele oombapila nekwatathano lyetu olya koko ngaaka.Ehokano.lyetu olya ningilwa mOld Location, ohango ndjika oyo yotango ya li ya kalwa komuthaneki oshilumbu a li a zi kehangano lyaathaneki lya Ottilie Nitzschke,hoka ngame nda li nda futu iiponda ihamano.

Mondjokana yetu omwa valwa aanona aalumentu yatatu  ,  nomukiintu gumwe ngoka a ka hulitha sho ena omumvo gumwe noomwedhi hamano.Aamwetu aamati oyo, Utoni Daniel, John Ndeshipanda na Sakaria Nefungo mbaka oya valwa momimvo 1952,1955 noshowo 1957. Omwetukadhona Nelago okwa valwa momumvo 1959 na okwa si manga ena omvo gumwe noomwedhi hamano, sho tashi uvitha oluhodhi ooshoka kutya nguka okwa mana oondjenda dhe manga ngame ndili muundjendi no inandi vula oku kala pefumviko lye  oshoka oonalunanga ando odha kwata ndje eta dhi tula ndje mondjedhillo.Onda li handi mono ompito yokweenda okuza moVenduka oku ya palwe moNamibia nenge pondje ya Namibia, unene tuu molwiilonga yandje miilonga yomalutenda.MoNamibia pethimbo ndiyaka aaluudhe oyendji ka ya li haya vulu okweenda apehe mpoka ya hala molwaashoka oye na oku kala noombapila dhuuthemba wokweenda Pokati komimvo 1955-1956 onda mwene ompito oku ka talelapo ko Kapa, hoka kwali ku na aaNamibia oyendji ya kalako. Otwa li hatu tsakane pokakululilo ka Timothy Kambonde mepandaanda lya Somerset. Onda li wo ndiilongo onkalo yopolitika yiilumbu ndjoka nda li nda kuminwa oshoka iilumbu yoongundu dhopolitika dha yooloka ngaashi ndjoka yo National Party noshowo ndjoka yo United Party oya li ashike ha yi lesha iifonkundana mbyoka ya guma koongudu dhayo, iifo mbika ongaashi Die Suidwester, Suidwest Afrikaner noshowo Windhoek Advertiser.

Ndele ngame nookuume kandje otwa li ha tu lesha iifo mbika ayihe  okwiilonga Oshiingilisa noshowo wo okwiimonena uuyelele woonkundana ndhoka tadhi inyenge moshilongo.Otwa lesha woo iifo yo ko South Afrca mbyoka twa li tu wete hayi shanga nawa oku yeleka naambyoka ya Namibia oshoka mbika oya  li hayi nyola oonkundana wo ndhoka tadhi inyenge palwe muuyuni. Iifo mbika, Star, Cape Times noshowo Argus oya li ya kundaneke ngaashi eyo koshipundi koonkondo lya Sukarno mo Indonesia,1945, emanguluko lya India mo 1947, esindano lya Abdel Nasser sho a dhenge Britania na France noku kuthako iilonga pomukanka gwa Suez mo Egipiti omumvo 1956.Ndele onkundana onene ndjoka yetu tsu omukumo oondjoka yemanguluko lya Ghana omumvo 1957, ndjka oye tu pe etegameno kutya otatu ka mona woo emanguluko miilongo yetu.Pethimbo ndyoka onkalamwenyo yandje oya adhika ya lunduluka okuza tuu sho Omusitagongalo Michael Scott a tameke oku shangela kIigwana Hangano pehala lyOmukwaniilwa Hosea Kutako na Samuel Witbooi okutameka omumvo 1947.Omumvo 1957 mepipi lyomimvo 29 onda thigipo iilonga yomalutenda, nelalakano oku ya mopolitika ethimbo alihe. Ndele eshongo ndyoka lya li lya taalelandje oondyoka li na sha noveta yokatongo, ndjoka yi ndika omuAfrica kaa kale moVenduka nenge palwe moshilando ngele nguka keli miilonga yomuhona omutiligane. Onkene onda kongo iilonga mu Muni gwa Venduka ongo okleleka, ndele iilonga mbika onde ke yi ethapo mbala molwashoka ongame nda kala noku longapo iilonga yuumbulu mboka wa kala wu na onyalo, nando ngame onda li nda futwa ondjambi oshona. Onda kongo iilonga moshitayi shehangano lyoko South Africa lyedhina Hubert Davis lya li ha li landitha iikwamalusheno yoku tula momatungo omape. Nando omuwiliki gwehangano ndika okwa li a panda iilonga yandje iilumbu iikwawo kaya li ya panda shoka ndali tandi longo, onkene ngame onda thigipo iilonga mbyoka ishewe na onda ka longela ehangano lyaSouth Africa hali longo iilongomwa ndyoka lya li lya kalelwapo ku Carsten Veld.

Ongundu yoOvamboland Peopl’e Congress oya li ya totwa kaaNamibia mboka ya li moKapa mo South Africa mesiku 2 Auguste 1957 elalakano lyayo okunyolela kIigwana ya Hangana ta yi indile  opo iilonga yokondalaka , mbyoka ya hepeka aaluudhe unene yokuumbangalantu nokuumbangalantu zilo yi hulithwepo moompadhi oontalala. OPC okwa li woo a shangele Iigwana ya Hangana opo yi kutheko ewiliko lyopapangelo moNamibia pamautho gayo kombinga yiilongo mbyoka ya li nale iikolonyekwa yiilongo mbyoka ya dhengwa miita iitiyali yuuyuni.Hailwa Andimba Toivo ya Toivo okwa li gumwe gwaaniilonga mboka ya longa pakondalaka okuza omumvo 1944-45, pethimbo ndyoka okwa li ha futwa ondjambi yoodola konyala N$10-N$11 komwedhi.Omvo 1958 hailwa Ya Toivo okwa li a tumine omushangwa kIigwana Ya Hangana tagu yi indile opo yi lombwele epangelo lyokatongo lya South Africa li gandje epangelo lya Namibia kolutu lwiiGwana ya Hangana olwo lu kale talu wilike Namibia noku mu longekidhila emanguluko. Omushangwa nguka Ya Toivo okwa li egu pe Mburumba Kerina ngoka a li omwiilongi moUnivesiti ya Lincoln. Etumwalaka ndyoka okwa li eli shanga noshowo eli tula mokakola, nolyeendithwa meni lyembo lyedhina Treasure Island lya nyolwa ku Robert Louis Stephenson.Etumwalaka Kerina okwe li thikitha nawa na olya leshwa kokomittee ontine yoshigongi shaayehe shIigwana ya Hangana, nonando ndjika konima oya ka tinda oku pulakena okakola molwashoka oya ti etumwalaka ndyoka lilimo olya fa ekwawo ndyoka lya li mombapila.Etumwalaka ndika olya li limwe lyomoonkundana dha simana dha shangwa koshifo sho New York Times, naashika osha fala mpoka kutya Ya Toivo okwa tidhwa koKapa sho a pewa omasiku gatatu ageke opo a thigepo oshilando shoka, Ya Toivo okwa li eshi thigipo momasiku 4 Desemba 1958, opamwe na Jariretundu Kozonguizi, ya tidhilwa koVenduka nokOndangwa.Momumvo 1959 omanga tandi longo na Carsten Veld onda tuminwa ombapila ya zi ku Ya Toivo ta yi ti oonalunanga otadhi longele kumwe naaPutu aniwa opo dhi mu tidhile koAngola okuza moNamibia. Ngame onda tumine ondelekema kwAmushanga Ndjayi gwIigwana Ya Hangana nde mu tseyithile shoka epangelo lyokatongo lya South Africa lya li ta li longekidhapo. Konima ashike yootundi ooshona dhokutuma ondelekelama ndjika, aapolisi yaali ya za koshitayi shetanga lya shewa lyopolisi yokatongo oye ya piilonga yandje, yafa aantu taya zi kehangano aniwa nda li nda ningila ko eindilo lyiilonga, nando ngame onda li ndi shishi kutya kandali nda ningile ko eindilo hoka. Ndele nando ongaaka onda yi nayo pondje pohauto yawo ndjoka ya li ya thikama  popepi noombelewa dhiilonga yetu.Shono ashike nda thiki popepi nosheenditho shoka, Blaauw ngoka aadhika ashike opo a tuminwa koVenduka okwa pula ngele ongame nda tumine ondelekelama kuAmushanga Ndjayi gwIigwana ya Hangana kombinga ya Ya Toivo. Onda yamukula kutya eeno ongame . Okwa tameke ta tuku ndje nokupopya kutya otandi popi iifundja. Molwashoka Blaauw okwa li omufupi ye omushona molutu onde mu kwata noku mu undulila moshihauto she momeho giilumbu iikwawo yopiilonga yetu.

Iiningwanima ngashi shika oyo ya koleke etokolo lyandje oku longa nuudhiginini ndi etepo elunduluko monkalo yopolitika yatya ngaaka.Onkalo oya ka dhigupala noonkondo sho kepangelo lyokatongo kwe ya omuwiliki omupe ha ithanwa Hendrik Verwoerd ngoka a landula JG Strydom ongo ominista onkuluntu omvo 1958.Ooveta dhokatongo konyala ka guma komuluudhe odha tulwa miilonga kuVerwoerd odhindji dhomudho odha lolelwa moNamibia, moka kaamwa li ngoka ha yelutha nando omunwe a popye sha kuuwnayi wadho unene okuza kombinga yiilumbu oku yeleka nomoSouth Africa moka  iilumbu iipopi yoshiingilisa ethimbo limwe ya popi kutya ooveta ndhoka kadhi shi dhopantu .Onkalo oya ka ninga ombwinayi unene tuu moVenduka moka iilumbu yokatongoo ya li tayi thindile aaluudhe ya tembuke mOld Location opo yaye kolukanda lwa Katutura, ya kale kashona kokule naampoka pena iilumbu. Oshinima shika osho sha ka fala mokutinda kwaakalimo yOld Location mboka ya mwe yomuyo ya dhipagwa kopolisi yokatongo momasiku 10 Desemba 1959.

 

LEAVE A REPLY

Please enter your comment!
Please enter your name here