Omukainhu a dipawa ku suala shaye

0
236

 

OSHAKATI – Omukainhu weedula 47 okwa pakwa oshivike shadjako komukunda Andambombali, omanga okamonakadona keedula 17 oka lekelwa mokangulu kefiloshisho lakwata moiti (ICU) moshipangelo konima eshi va dengwa noku ehamekwa neenghono kusuala shaye.

Omafiku kemale eshi meme Anna Ndeumona Iiyambo womomukunda Andambombali, Moshikandjohoololo Uuvudhiya mOshitukulwa shaShana a dengwa noshitenda noku ehamekwa neenghono komutwe komulumenhu, taku hokololwa kutya omumwaina womusamane waye. Otaku fekelwa kutya omulumenhu ou ke li nawa momutwe.

Moshiponga omo tuu omo omwa ehamekelwa neenghono okamonakadona ka Iiyambo oko ka li taka kendabala oku amena ina.

Umwe womovashivikile va nakusa Iiyambo okwa lombwela Kundana kutya, meme Iiyambo okwa li opo ashike a di mo meumbo taka pitula umwe womovashiinda shaye vaye komapatululo omamanya pomikunda davo opo, eshi a ponokelwa ku suala shaye wedina Johannes Petrus.

“Tete nakudipaya okwa kala ha ningile xe omatilifo kutya ote mu dipaa, naashi osha eta opo a kakale keumbo la mumwaina oo a li a hombola nakufya. Ashike eshi a ya keumbo la mumwaina okwa kala vali ehe ehole nakufya, nokwa kala alushe ta tilifa kutya ote mu dipaa. Eshi kwa monika kutya okwa fa a nyika oshiponga, meumbo okwa kufwa mo ndee ta ningilwa onduda yoshipeleki mekove,” omushivikile ta hokolola.

Nonande ongaho omulumenhu ou vati okwa kala teuya keumbo meumbo lamumwaina ta ningile Iiyambo omatilifo.

Nefiku nee olo loshiponga, omusamane wa meme Iiyambo okwa dimbulula kutya mumwaina okwafa aha lelepo nawa, omolwaasho a lombwela omukadi ngeno eli vakemo meumbo eshi ta i komamanya opo a hamonike ku Petrus. Ashike mboli Petrus okwa kala nale emu wete, nokwe mu teta kondjila noku mu ponokela.

“Eshi a dengwa ngaho okwa kufa ongodi ndee ta dengele omunhu oo kwali ta ka pitula ngeno va ye naye komamamanya, temu lombwele kutya neuye emutwale koshipangelo shaashi okwa dipawa ku John,” omushivikile ta hokolola.

Omusamane wa meme Iiyambo oo a li meumbo pefimbo loshiningwanima okwa hanga omukadi nokamonakadona va monifwa nale oiponga.

Ova twala kOshipangelo kOshakati ashike mupya munene meme Iiyambo okwa xulifa konima yokafimbo kashona eshi va fika moshipangelo.

Okamonakadona okali ka tambulilwa mo ICU ashike oka ka lekelwa mo, nonghalo yako ota ku tiwa oili xwepo paife.

Komufala woshitukulwa shaShana Ndahangwapo Kashihakumwa okwa koleka oshiningwanimwa eshi nokwa hokolola kutya omufekelwa okwa dilweko naye kopolifi, nokwa tambulilwa moSaala 16 mOshipangelo shEpangelo mOshakati omo hamu tambulilwa ovanhu ve na ouvela womadilaadilo.

Ku Helvy Shaanika

LEAVE A REPLY

Please enter your comment!
Please enter your name here