Omulumenhu a dipaa ohonda naye mwene

0
221

 

ONGWEDIVA -Omukainhu weedula 38 moshitukulwa shaUtapi okwa fya exuliloshivike ladjako konima eshi a dipawa kohonda yaye yeedula 30.

Pamulombo oo wadja kopolifi, omukainhu wedina Tresia Nghishiiko womomukunda Oshixwa shaAluholo okweli tuwa ongula yOlomakaya la djako monduda yaye a fya, a tetwa nekatana kofingo omhanga ohonda yaye yedina Sakeus Shaumbwako Ishitile ya hangwa ya endjelela ya fya, eshi ye li mangelekela monduda tuu omo. Omulumenhu ou ota ku hokololwa kutya okwa dile komukunda Eehama dhaShinani moshitukulwahoololo shUtapi.

Omupopiliko wOpolifi mOshitukulwa shaMusati Warrant Officer Lineekela Shikongo okwa lombwela Kundana kutya nonande ovanhu ava vavali inava fiya po omushangwa ta u hokolola kutya oshike sha etifa efyo, ovakwanedimo vanakufya ova holola kutya ekwatafano pokati koonakufya ava vavali ola kala la nyika ehepekafano.

“Otaku hokololwa kutya omulumenhu ou ope na efimbo limwe kwali hadi meumbo lookakadona ndee ofamili yakakadona ta i mulekele mo, medina lomahepekafano oo. Okwa dja mo meumbo ashike ina ve li efa, okwa kala ngoo mboli hayiko keumbo oko,” Shikongo tati.

Shikongo i na yandja ouyelele ngeenge eehonda edi oda twikila noku ha udafana konima eshi omulumenhu a lekelwa. Shikongo ta holola kutya omalutu avo okwe li tuwa kumumwainagona womukainhu oo a dipawa.

Shikongo okwa kunghilila kutya ovakwashiwana nava tameke oku lopotela opolifi ngee va didilike onghalo ya nyika omahepekafano lopalutu ile pamikalo dimwe pokati kovalihomboli ile eehonda, opo opolifi i kufe ombinga oku va kumaida nokukwafela oku alulila po ombili meenghalamwenyo davo, noku xupifa eemwenyo.

“Opolifi ka i lile po ashike oku kwata ovanhu ashike oi lile po yoo oku kwate la po ombili, oku kumaida noku tuma ovanhu kovaxungimwenyo opo tashi dulika,” Shikongo tati.

ku Helvy Shaanika

LEAVE A REPLY

Please enter your comment!
Please enter your name here