Ovadali pEenhana ovanyakukilwa oilonga yofikola yovana

0
436

EENHANA – Omukulunhufikola pEenhana Primary school, Olivia Nakale okwa pandula eshi ovahongwa vedule 154 pofikola yaye vapewa eedjapo  neendjabi omolwa oilonga yavo iwa moihongwa yofikola noshoyo moinyangadalwa ihe fi yopahongo.

“Ame ondina elineekelo lakula moilonga yovahongi vange osheshi omudo wadjako ovahongwa veli 126 ova pelwe eendjabi eshi ve shi endifile nawa moihongwa yavo, ndele nee neudo omuvalu waavo va pewa eendjabi needjapo owa ya pombanda.Eshi otashi ti fye ohatu longo neenghono opo tu hange elalakano lenongelo eli,” osho omukulunhufikola a ti.

Nakale okwa kumika ovahongi vaye opo va twikile noku longa noudiinini opo va tule Eenhana Primary School pamufika muwa wehongo, opo i dule oku ya mefiyafano neefikola odo da shivika nawa molwa ongushu yelongo mOhangwena, ngaashi Mouwa English Private School.

“Ngeno ka pa li ovahongi ava ngeno oshivilo eshi sho ku yandja eendjabi ngeno inashi dula oku ningwa. Ondi udite etumba okutala ovo va pewa eendjabi noshoyo eedjapo ta va menyemo opamwe novakulunhu vavo. Fye otwa hala efiyafanepo liwa mokati kovanafikola, meefikola adishe moshilongo, unene tuu eshi eyandjo lomapole eli ladja moilonga ye itulemo lovahongwa ava,” Nakale ta twikile.

Koshivilo yoo kwe uya ovadali vovanafikola ovo va longa nawa neendjabi oda yandjwa kwaavo velihonga nawa moondodo okudja pondondo yotete fiyo onhiheyali.

Olupale lenongelo ola li liyandi ndo, ovahongwa va teleela oku uda kutya oolyelye tava pewa oishani.

Paula Ndayambekwa oye omuhongwa oo a kufapo odjapo nepapa lomuhongwa dingi mondodo yopedu pofikola nomulihongi dingi mondodo yopombada oRauna Shikukumwa.Ova pewa eendjapo, eedjato dofikola noupakete vomaano.

“Ondi udite nawa nonando ondjabi otwe itukula nomulihongi mukwetu, Rauna Shikukumwa. Ame ohandi pwilikine noukeka fimbo omuhongi ta hongo, handi shange osho tashi hongwa nashi handi i keumbo ohandi leshulula moihongwa yange

“Onda hala oku kumika ovahongwa vakwetu opo vaha nwefwemo kookaume kavo ndele va longife omaano nomaadilaadilo avo nawa,” osho omuhongwa Ndayambekwa a ti.

Ovahongwa ovo va longa nawa  mondodo onhi5 ovo, Lylie Shikukumwa, Rackel Ndavela na Sesta Ikanda.

Ofikola yopaumwene, Mouwa English Private School nayo oya ningile oshivilo shoku yandja eedjapo neendjabi kwaava  va longa nawa.

Mwaavo va longa nawa omwakwatelwa Daphne Shahonga mondodo yotete a pita noitwa efele mOshiingilisha na Dalton Hedimbi a pita Omuvalu noitwa 90 mondodo yoo yotete.

Odjapo yovahongwa ovo vena elandulafano liwa pofikola oya pewa Charles Ngalula, Alba Mwaningange va pewa eedjapo neemhuda domaano. Keyandjo lomapapa eli okwa li kwe uya ovakulunhu ile ovadali mwa kwatelwa yo naKansela wOshikandjohoololo Ondobe, Mandume Pohamba.

Ku  Clemence Tashaya

LEAVE A REPLY

Please enter your comment!
Please enter your name here